Uttar Pradesh News: ઉત્તર પ્રદેશના કૌશાંબી જિલ્લામાં શુક્રવારે વહેલી સવારે એક ગંભીર અકસ્માત સર્જાયો હતો. કાનપુર તરફથી ગંગા પાર તરફ જઈ રહેલા LPG (લિક્વિફાઇડ પેટ્રોલિયમ ગેસ) ભરેલા ટેન્કરમાં અચાનક ગેસ લીકેજ થતાં આગ ભભૂકી ઊઠી હતી. આગ લાગતાં ટેન્કર બેકાબૂ બની ગયું અને કોખરાજ વિસ્તારના સિરોહી ટોલ પ્લાઝાના એક ટોલ બૂથ સાથે ધડાકાભેર અથડાયું હતું.
અકસ્માત બાદ ટોલ બૂથમાં હાજર પાંચ કર્મચારીઓ આગની ઝપેટમાં આવી ગંભીર રીતે દાઝી ગયા હતા. જ્યારે અન્ય 8થી 10 કર્મચારીઓએ સમયસર ભાગીને પોતાનો જીવ બચાવ્યો હતો.
ઇજાગ્રસ્ત કર્મચારીઓની ઓળખ હીરામણી, આલોક, કૃષ્ણ પાલ, અતુલ અને ગનમેન રાજૂ તરીકે થઈ છે. તમામને તાત્કાલિક જિલ્લા હોસ્પિટલમાં સારવાર માટે ખસેડવામાં આવ્યા છે.
આગ એટલી ભયાનક હતી કે ટોલ પ્લાઝા નજીક પાર્ક કરાયેલા બે-ત્રણ દ્વિચક્રી અને એકથી બે ચારચક્રી વાહનો પણ બળીને ખાખ થઈ ગયા હતા.
ઘટનાની જાણ થતાં કોખરાજ સહિત આસપાસના અનેક પોલીસ સ્ટેશનોની ટીમો અને ફાયર બ્રિગેડ ઘટનાસ્થળે પહોંચી ગઈ હતી. સુરક્ષાના ભાગરૂપે પોલીસે આશરે અડધા કિલોમીટર વિસ્તારને બેરિકેડ કરીને વાહનવ્યવહાર પર તાત્કાલિક રોક લગાવી હતી. હાલ આગ લાગવાનું ચોક્કસ કારણ અને સમગ્ર ઘટનાની તપાસ હાથ ધરવામાં આવી રહી છે.
