Lucknow Rain: ઉત્તર પ્રદેશની રાજધાની લખનઉમાં(Lucknow) ભારે વરસાદ બાદ રસ્તો ધસી પડતાં એક મોટો અને ખતરનાક ખાડો સર્જાયો છે. લખનઉ યુનિવર્સિટી નજીક બનેલા આ ખાડાની ઊંડાઈ આશરે 10થી 12 ફૂટ હોવાનું સામે આવ્યું છે. આ દરમિયાન એક મોટરસાઈકલ(બાઇક) ખાડામાં ખાબકી હતી, જ્યારે એક યુવક પણ તેમાં પડી જતાં ઈજાગ્રસ્ત થયો હતો. ઈજાગ્રસ્ત યુવકને તાત્કાલિક સારવાર માટે હોસ્પિટલ ખસેડવામાં આવ્યો હતો.
ભારે વરસાદ બાદ રસ્તાનો મોટો હિસ્સો ધસી પડ્યો
મળતી માહિતી પ્રમાણે, ભારે વરસાદના કારણે યુનિવર્સિટી(Lucknow) નજીકના રસ્તા પર પાણી ભરાઈ ગયું હતું. ત્યારબાદ અચાનક રસ્તાનો એક મોટો ભાગ ધસી પડ્યો અને ઊંડો ખાડો બની ગયો. આ ખાડામાં મોટરસાઈકલ પણ પડી ગઈ હતી. મોટરસાઈકલ(Motorcycle) કઈ રીતે ખાડામાં પડી અને ઘટના સમયે વાહન પર કોણ સવાર હતું, તેની સંપૂર્ણ માહિતી હજુ સામે આવી નથી. જોકે ખાડો અત્યંત ઊંડો હોવાથી સ્થાનિક લોકો અને વાહનચાલકોમાં ભયનો માહોલ જોવા મળ્યો હતો. ઘટનાની જાણ થતાં જ પોલીસ(Police) અને નગર નિગમની ટીમો સ્થળ પર પહોંચી ગઈ હતી. રસ્તા પર વરસાદી પાણી ભરાયેલું હોવાથી બચાવ કામગીરીમાં પણ મુશ્કેલી પડી હતી. ખાડામાં ફસાયેલી મોટરસાઈકલને બહાર કાઢવા માટે ક્રેનની મદદ લેવામાં આવી. અનેક પ્રયાસો બાદ ક્રેન મારફતે બાઈકને સુરક્ષિત રીતે બહાર કાઢવામાં આવી હતી.
રસ્તો બંધ, વાહનચાલકો માટે મોટું જોખમ
10થી 12 ફૂટ ઊંડો ખાડો સર્જાતા આ રસ્તો વાહનવ્યવહાર માટે જોખમી બની ગયો હતો. અકસ્માતની શક્યતાને ધ્યાનમાં રાખીને રસ્તાનો આ ભાગ બંધ કરવામાં આવ્યો છે. હાલ નગર નિગમની ટીમ દ્વારા ખાડાને ભરવાની કામગીરી હાથ ધરવામાં આવી રહી છે. જોકે આ ઘટનાએ રાજધાનીમાં રસ્તાઓની જાળવણી અને વરસાદ દરમિયાન પ્રશાસનની તૈયારીઓ સામે ગંભીર સવાલો ઊભા કર્યા છે. ભારે વરસાદ બાદ રસ્તા પર આટલો મોટો ખાડો સર્જાય ત્યાં સુધી તંત્રનું ધ્યાન કેમ ન ગયું, તે અંગે પણ હવે સવાલ ઉઠી રહ્યા છે. રાજધાનીની(Lucknow) સડકોની ગુણવત્તા અને મોનસૂન પહેલાંની તૈયારીઓને લઈને આ ઘટના તંત્ર માટે મોટો એલર્ટ બની છે.
આ પણ વાંચો: માર્ચના અંતમાં ફરી બદલાશે વાતાવરણ, આ 12 રાજ્યોમાં વરસાદ અને વાવાઝોડાનો ખતરો
આ પણ વાંચો:સનરાઈઝર્સ હૈદરાબાદ અને લખનઉ સુપર જાયન્ટ્સ વચ્ચે જંગ, ઈશાન કિશન કે રિષભ પંત કોણ મારશે બાજી?
આ પણ વાંચો: તિરાડ પડતી દીવાલો, ડૂબતી જમીન… હિમાચલના આ વિસ્તારમાં વરસાદનું દરેક ટીપું મૃત્યુના અવાજ જેવું લાગે છે!
