પૂર્વ કેન્દ્રીય મંત્રી અને બીજેપી સાંસદ રાજ્યવર્ધન સિંહ રાઠોડે રાજસ્થાનની કોંગ્રેસ સરકાર પર નિશાન સાધ્યું છે. તેમણે મુખ્યમંત્રી અશોક ગેહલોત પર રાજ્યને તાલિબાનમાં ફેરવવાનો આરોપ લગાવ્યો. અલવરની ઘટના પર બોલતા કહ્યું, “રાજસ્થાનને તાલિબાન બનાવી દેવામાં આવ્યું છે. આપણું રાજ્ય જે બહાદુરી અને મહિલાઓના સન્માન માટે જાણીતું હતું તે હવે મહિલાઓની ઉત્પીડનમાં નંબર વન પર છે. મંદિર તોડવાની બાબતમાં રાજ્ય નંબર વન પર છે.”
અલવર જિલ્લાના રાજગઢ શહેરમાં અતિક્રમણ વિરોધી ઝુંબેશ દરમિયાન બે મંદિરો તોડી પાડવાને લઈને ભાજપ અને કોંગ્રેસ વચ્ચે ઝઘડો ચાલી રહ્યો છે. રાજગઢ કોંગ્રેસ શાસિત રાજ્યમાં ભાજપ શાસિત નગરપાલિકા છે. અલવરના બીજેપી સાંસદ બાલકનાથે આરોપ લગાવ્યો હતો કે આ સપ્તાહની શરૂઆતમાં કરવામાં આવેલી કાર્યવાહીમાં મંદિરની પ્રતિમાને પણ નુકસાન થયું હતું. રાજસ્થાનના મંત્રી શાંતિ ધારીવાલે ભાજપ પર આરોપ લગાવ્યો અને કહ્યું કે રાજ્ય સરકાર આ મામલાની દેખરેખ રાખી રહી છે.
ઉલ્લેખનીય છે કે રાજગઢમાં રવિવાર અને સોમવારે બે મંદિરો અને કેટલીક દુકાનો તોડી પાડવામાં આવી હતી. અધિકારીઓએ શહેરમાં રસ્તાને પહોળો કરવા માટે લેવામાં આવેલી આ કાર્યવાહીને અતિક્રમણ વિરોધી અભિયાન ગણાવ્યું છે. તેમણે કહ્યું કે આ કાર્યવાહીને ભાજપ શાસિત રાજગઢ મ્યુનિસિપલ બોર્ડ દ્વારા મંજૂરી આપવામાં આવી હતી અને કાર્યવાહીમાં કોઈપણ પ્રતિમા અથવા ગર્ભગૃહને નુકસાન થવાની શક્યતા નકારી કાઢી હતી.
ભાજપના રાજ્યસભા સભ્ય કિરોરી મલ મીના શુક્રવારે રાજગઢ પહોંચ્યા અને મંદિર તોડી પાડવાના વિરોધમાં પોલીસ સ્ટેશનની સામે ધરણા પર બેઠા. ભાજપનો દાવો છે કે આ મંદિર 300 વર્ષ જૂનું હતું. ભાજપે કહ્યું કે કોંગ્રેસે પરિણામ ભોગવવા પડશે. ભાજપના રાજસ્થાન એકમના વડા સતીશ પુનિયાએ આ કાર્યવાહી પાછળ કોંગ્રેસનો હાથ હોવાનો આરોપ લગાવ્યો. તેમણે કહ્યું કે સોશિયલ મીડિયા પર સામે આવેલા વીડિયોમાં બુલડોઝર એક પ્રાચીન શિવ મંદિરને તોડી પાડતું જોઈ શકાય છે. તેમણે કહ્યું કે લોકો જાણે છે કે આ તમામ કાર્યવાહી રાજ્ય સરકારના ઈશારે કરવામાં આવી રહી છે.
આ પણ વાંચો: સીધી બાત, નો બકવાસ/ પંજાબ સરકારનો વધુ એક મોટો નિર્ણય : હવેથી આ 184 VIPને નહીં આપે સુરક્ષા
આ પણ વાંચો: Tweet/ રાહુલ ગાંધીનાં નિશાને મોદી સરકાર, વધતી મોંઘવારી અને ઘટતા FD વ્યાજ દર પર કહ્યું…
