Raksha bandhan2025: રક્ષાબંધન 2025ને ગણતરીના કલાકો જ બાકી છે. આ વખતે 9 મી ઑગસ્ટે, એટલે કે આવતી કાલે આ તહેવાર મનાવવામાં આવશે. ભાઈ-બહેનના પ્રેમભર્યા સંબંધનું પ્રતીક એવા આ ખાસ તહેવારની ઉજવણીમાં ભેટ-સોગાદની આપ-લે સાથે, ભાત-ભાતની મીઠાઈઓ પણ ખવડાવવામાં આવે છે. પણ જો તમે બજારમાંથી મીઠાઈ ન લાવીને જાતે બનાવેલી મીઠાઈ તમારા ભાઈને ખવડાવો તો કેવું રહેશે? વીરા માટે તમારા હૈયામાં છુપાયેલા પ્રેમને દર્શાવવાની આ સૌથી ઉત્તમ અભિવ્યક્તિ હશે! તો ચાલો આ વર્ષે, તમારા ભાઈને ફરાળમાં પણ ખવાય એવી સ્વાદિષ્ટ અને સ્વાસ્થ્યવર્ધક સાબુદાણાની બરફી બનાવીને ખવડાવો અને સુખદ સરપ્રાઇઝ આપો!!

બરફી બનાવવાની સામગ્રી:

1 વાડકી સાબુદાણા

2 નાની ચમચી દળેલી ખાંડ/સાકર

2 ચમચી દૂધ (નારિયેળ/બદામનું દૂધ પણ ઉપયોગમાં લઇ શકાય)

1 નાની ચમચી ઘી

1 નાની ચમચી સૂકા ટોપરાનું છીણ

1/4 નાની ચમચી ઇલાયચી પાઉડર

1 મોટી ચમચી સમારેલા કાજુ-બદામ

સજાવવા માટે પિસ્તાની કતરણ

શી રીતે બનાવવી સાબુદાણાની બરફી?

1. બરફી બનાવવા માટે સૌપ્રથમ સાબુદાણાને એક તાવડીમાં ડ્રાય રોસ્ટ કરી લો. આ માટે સાબુદાણાને જાડા તળિયાવાળી તાવડીમાં નાખીને, જ્યાં સુધી એનો રંગ સોનેરી ન થઇ જાય એને એનો દાણો ફૂલી ન જાય ત્યાં સુધી, હલાવતા રહીને શેકી લો.

2. હવે આ શેકેલા સાબુદાણાને ઠંડા કરી લો અને મિક્સર અથવા ગ્રાઇન્ડરની મદદથી બારીક પીસી લો.

3. એક મોટો બાઉલ લઇને એમાં સાબુદાણા પાઉડરની સાથે દળેલી ખાંડ કે સાકર, સૂકા કોપરાનું છીણ અને ઇલાયચી પાઉડર મિક્સ કરી દો. હવે એમાં ધીમે-ધીમે દૂધ ઉમેરીને લચકા જેવી ગાઢ અને લીસી પેસ્ટ બનાવો.

4. સાબુદાણા બરફીની પેસ્ટ તૈયાર છે. હવે એક પ્લેટમાં ઘી લગાવીને આ મિશ્રણને એકસરખું ફેલાવી દો. એને એક સ્પૅચ્યુલા કે તાવેથાની મદદથી સમથળ કરો.

5. આ મિશ્રણને લગભગ 10-15 મિનિટ સુધી જામવા દો. ત્યારબાદ, એક છરીની મદદથી ચોરસ અથવા ડાયમંડ આકારમાં કાપી લો. આ રીતે તૈયાર સાબુદાણાની સ્વાદિષ્ટ બરફીને ઝીણા સમારેલા પિસ્તા અને ડ્રાયફ્રુટ્સની કતરણથી સજાવી દો.

આ પણ વાંચો:શ્રાવણના બીજા સોમવારે આ જ્યોતિર્લિંગની કરવી પૂજા, અનેરી મહિમા અને પરમ શાંતિનો અનુભવ થશે!

આ પણ વાંચો:રક્ષાબંધનને હવે માત્ર છ દિવસ બાકી, કેવી રીતે મોકલશો વીરાને રાખડી, પ્રસ્તુત છે જૂના-નવા તમામ વિકલ્પો!