ગુંઠા સેવ રેસીપી: શું તમે તમારા બાળકોને બજારમાં મળતી પ્રિઝર્વેટિવવાળી ચિપ્સ અને બિસ્કિટથી દૂર રાખવા માંગો છો? જો હા, તો ઘરે પરંપરાગત ગુંઠા સેવ (Guntha Sev) બનાવી શકો છો. ગોળ અને ચણાના લોટમાંથી બનતો આ સ્વાદિષ્ટ નાસ્તો માત્ર ટેસ્ટી જ નહીં પરંતુ સ્વાસ્થ્ય માટે પણ ફાયદાકારક છે. ખાસ વાત એ છે કે આ નાસ્તો રેફ્રિજરેશન વગર પણ લગભગ 2 મહિના સુધી સારી રીતે સ્ટોર કરી શકાય છે.
આજકાલ બાળકોને કોમર્શિયલ ચિપ્સ અને બિસ્કિટ ખૂબ પસંદ આવે છે, પરંતુ તેમાં રહેલા પ્રિઝર્વેટિવ્સ અને વધુ પ્રમાણમાં રહેલા કેમિકલ્સ તેમના સ્વાસ્થ્ય માટે નુકસાનકારક સાબિત થઈ શકે છે. તેથી માતાપિતા હેલ્ધી અને ઘરેલું વિકલ્પોની શોધમાં રહેતા હોય છે.
આ ઉનાળામાં બાળકો માટે સરળતાથી ઘરે બની જાય એવો અને પૌષ્ટિક નાસ્તો બનાવવો હોય તો ગુંઠા સેવ એક ઉત્તમ વિકલ્પ છે. પરંપરાગત સ્વાદ ધરાવતો આ નાસ્તો એનર્જી બાર જેવી મજા આપે છે અને લાંબા સમય સુધી તાજો રહે છે. ખાસ કરીને, તેને સ્ટોર કરવા માટે ફ્રિજની જરૂર પડતી નથી, એટલે મુસાફરી કે રોજિંદા ઉપયોગ માટે પણ આ એક પરફેક્ટ નાસ્તો બની શકે છે.
સામગ્રી:
* 2 કપ ચણાનો લોટ
* 2-3 ચમચી તેલ (ભેળવવા માટે)
* સ્વાદ પ્રમાણે મીઠું
* પાણી (લોટ ભેળવવા માટે)
* તળવા માટે તેલ
* 1 કપ ગોળ
* થોડું પાણી (ચાસણી માટે)
ઘરે બનાવો સ્વાદિષ્ટ અને કરકરી ગુઢા સેવ (Guntha Sev)
જો તમે બજારમાં મળતા પ્રિઝર્વેટિવવાળા નાસ્તાથી બચવા માંગતા હોવ, તો ઘરે બનાવેલી ગુંઠા સેવ એક ઉત્તમ વિકલ્પ છે. ચણાના લોટ અને ગોળથી બનતો આ પરંપરાગત નાસ્તો સ્વાદિષ્ટ હોવા ઉપરાંત લાંબા સમય સુધી તાજો રહે છે.
બનાવવાની રીત
લોટ બાંધવો: સૌપ્રથમ એક મોટા વાસણમાં ચણાનો લોટ લો. તેમાં મીઠું અને થોડું તેલ ઉમેરી સારી રીતે મિક્સ કરો. ત્યારબાદ થોડું-થોડું પાણી ઉમેરતા નરમ લોટ બાંધો. લોટ તૈયાર થઈ જાય પછી તેને ઢાંકીને આશરે 15થી 20 મિનિટ સુધી રહેવા દો, જેથી લોટ સારી રીતે સેટ થઈ જાય.
તળવું: હવે એક કડાઈમાં તેલ ગરમ કરો. સેવ બનાવવાના સંચામાં તૈયાર લોટ ભરો અને ગરમ તેલમાં સેવ પાડો. સેવને મધ્યમ તાપ પર સોનેરી રંગની અને કરકરી થાય ત્યાં સુધી તળી લો.
તળેલી સેવને બહાર કાઢીને સંપૂર્ણ ઠંડી થવા દો અને પછી તેને નાના ટુકડામાં તોડી લો. ત્યારબાદ બીજી કડાઈમાં થોડું પાણી અને ગોળ ઉમેરી ધીમા તાપ પર ગરમ કરો.
ગોળ સંપૂર્ણ ઓગળી જાય પછી ચાસણીને થોડું ઘટ્ટ થવા દો. ચાસણી તૈયાર થઈ છે કે નહીં તે ચકાસવા માટે ઠંડા પાણીમાં ચાસણીનું થોડું ટીપું નાખો. જો તે ગાંઠ જેવું થઈ જાય, તો સમજવું કે ચાસણી તૈયાર છે.
હવે ગેસ બંધ કરીને તૈયાર કરેલી સેવ ચાસણીમાં ઉમેરો અને સારી રીતે મિક્સ કરો, જેથી દરેક ટુકડા પર ગોળનું સરખું કોટિંગ થઈ જાય. ત્યારબાદ તેને ઠંડુ થવા દો. ઠંડુ થયા પછી સેવ વધુ કરકરી બની જશે અને એકબીજાથી અલગ થઈ જશે.
અંતમાં, તૈયાર ગુઢા સેવને હવાચુસ્ત સ્ટીલ અથવા કાચના ડબ્બામાં ભરી સ્ટોર કરો. આ નાસ્તો સરળતાથી 1થી 2 મહિના સુધી તાજો રહે છે.
આ પણ વાંચો: વરિયાળીમાં ભેળસેળ છે કે નહીં તે જાણવા માટે અપનાવો આ 4 સરળ ટિપ્સ
આ પણ વાંચો: સત્તુની શુગર ફ્રી બરફી…’વેટ લોસ જર્ની’માં ઉપયોગી…ઝટપટ બનતી રેસિપી..!
આ પણ વાંચો: ગરમીમાં ટમેટા સાચવવાની બેસ્ટ રીત, 15 દિવસ સુધી ટમેટા નહીં થાય ખરાબ; જાણો આ સ્માર્ટ ટિપ્સ
