Malda Violence Mastermind Arrested: પશ્ચિમ બંગાળના માલદા જિલ્લાના કાલિયાચક અને સુજાપુરમાં થયેલી તાજેતરની હિંસા અને તણાવના મામલે પોલીસને મોટી સફળતા મળી છે. બંગાળ પોલીસે આ સમગ્ર હિંસાના મુખ્ય સૂત્રધાર ગણાતા એડવોકેટ અને AIMIM નેતા મોફક્કરુલ ઈસ્લામની ધરપકડ કરી છે. આ ધરપકડ ત્યારે થઈ જ્યારે તે બાગડોગરા એરપોર્ટ પરથી રાજ્ય છોડીને ભાગવાની તૈયારીમાં હતો.

એરપોર્ટ પર બિછાવેલી જાળમાં ફસાયો નેતા

પોલીસ સૂત્રોના જણાવ્યા અનુસાર, મોફક્કરુલ ઈસ્લામ વિરુદ્ધ પુખ્ત પુરાવા મળ્યા બાદ તેની શોધખોળ ચાલી રહી હતી. ગુપ્ત માહિતી મળી હતી કે તે ધરપકડથી બચવા માટે સિલીગુડી પાસેના બાગડોગરા એરપોર્ટ પરથી ફ્લાઈટ પકડવાનો છે. પોલીસની સ્પેશિયલ ટીમે વોચ ગોઠવીને તેને ટર્મિનલ પાસેથી દબોચી લીધો હતો. વ્યવસાયે વકીલ હોવા છતાં તે પોલીસની નજરમાંથી બચી શક્યો નહોતો.

પોલીસ અને પ્રશાસનને આપી હતી ખુલ્લી ચેતવણી

મોફક્કરુલ ઈસ્લામનો એક વીડિયો તાજેતરમાં વાયરલ થયો હતો, જેમાં તે ખૂબ જ આક્રમક તેવરમાં જોવા મળ્યો હતો. વીડિયોમાં તે જિલ્લાના ઉચ્ચ અધિકારીઓને પડકારતા બોલી રહ્યો હતો કે, “ઓય ડીએમ, એસપી.. સીઆઈડી ક્યાં છો? આઈબી ક્યાં છે? તમે બધા ક્યાં છો? અહીં આવો…” પ્રશાસન વિરુદ્ધ આ પ્રકારની ઉશ્કેરણીજનક નિવેદનબાજી કર્યા બાદ તે પોલીસના રડાર પર હતો.

કોણ છે Mastermind મોફક્કરુલ ઈસ્લામ?

તે અસદુદ્દીન ઓવૈસીની પાર્ટી AIMIM નો બંગાળમાં મુખ્ય ચહેરો છે. તેણે વર્ષ 2021ની પશ્ચિમ બંગાળ વિધાનસભા ચૂંટણીમાં ઉત્તર દિનાજપુર જિલ્લાની ઇટાહાર (Itahar) બેઠક પરથી AIMIM ની ટિકિટ પર ચૂંટણી લડી હતી. આ ઉપરાંત, તપાસમાં એ પણ સામે આવ્યું છે કે સુજાપુર અને કાલિયાચક આસપાસ થયેલા વિરોધ પ્રદર્શનોનું નેતૃત્વ તે જ કરી રહ્યો હતો.

હિંસા પાછળ મોટું ષડયંત્ર હોવાની આશંકા

પોલીસ હવે એ તપાસ કરી રહી છે કે શું આ હિંસા પાછળ કોઈ ઊંડું રાજકીય ષડયંત્ર હતું કે પછી આ અચાનક ફાટી નીકળેલો આક્રોશ હતો. મોફક્કરુલ ઈસ્લામ અત્યારે પોલીસ કસ્ટડીમાં છે અને તેની કડક પૂછપરછ ચાલી રહી છે. આ ધરપકડથી વિસ્તારમાં હિંસા ફેલાવનારા રાજકીય ગઠબંધનનો પર્દાફાશ થવાની શક્યતા છે.

આ પણ વાંચો: બંગાળ ચૂંટણીમાં ભારે હોબાળો, ફોર્મ-6 મુદ્દે કોલકાતામાં TMC-BJP વચ્ચે હિંસક અથડામણ

આ પણ વાંચો: મહુઆ મોઈત્રાના નિવેદનથી બંગાળી vs ગુજરાતી વિવાદ ગરમાયો

આ પણ વાંચો: સુરતથી બંગાળ સુધી ભાજપની મોટી ચાલ, 5000 મતદારોને મફત ટ્રેન સુવિધા