America-Iran War: અમેરિકા-ઈરાન તણાવ ફરી વધતાં વૈશ્વિક બજારોમાં હલચલ જોવા મળી છે. હોર્મુઝ સ્ટ્રેટ પર નાકાબંધી અને બદલાની કાર્યવાહી વચ્ચે ક્રૂડ ઓઈલના ભાવમાં જોરદાર ઉછાળો આવ્યો છે. બ્રેન્ટ ક્રૂડ લગભગ 6% વધતાં એનર્જી માર્કેટમાં ચિંતા વધી છે. તેની અસર સોમવારે શેરબજાર પર પણ જોવા મળી, જ્યાં સેન્સેક્સ અને નિફ્ટીમાં શરૂઆતમાં ઘટાડો નોંધાયો હતો, જોકે પછીના ટ્રેડિંગમાં થોડો સુધારો જોવા મળ્યો.
પરંતુ થોડી જ મિનિટોમાં બજારની દિશા બદલાઈ ગઈ હતી. સેન્સેક્સ અને નિફ્ટીએ યુદ્ધના ભય અને ક્રૂડ ઓઈલના આંચકાને અવગણીને ઝડપી રિકવરી દર્શાવી. બોમ્બે સ્ટોક એક્સચેન્જ પર 30 શેરનો સેન્સેક્સ 200 પોઈન્ટથી વધુ ઉછાળા સાથે ટ્રેડ થતો જોવા મળ્યો હતો. જોકે આ તેજી લાંબા સમય સુધી ટકી નહોતી અને થોડા જ સમયમાં બંને મુખ્ય સૂચકાંકો ફરીથી દબાણ હેઠળ આવીને નીચે સરકવા લાગ્યા હતા.
સેન્સેક્સ-નિફ્ટીમાં સતત ઉતાર-ચઢાવ
સોમવારે શેરબજારની શરૂઆત નબળાઈ સાથે થઈ હતી અને રેડ ઝોનમાં થઇ હતી. તેમજ ગયા શુક્રવારે 78,493 પર બંધ થયેલો BSE સેન્સેક્સ ખુલતા જ દબાણમાં આવીને 78,203 સુધી નીચે ગયો હતો. જોકે, થોડી જ વારમાં બજારમાં ઝડપી રિકવરી જોવા મળી અને સેન્સેક્સ ઉછળી 78,733ના સ્તર સુધી પહોંચી ગયો હતો. પરંતુ આ તેજી લાંબા સમય સુધી ટકી નહીં અને થોડા જ સમય બાદ ફરી વેચવાલીનો દબાણ વધતાં સેન્સેક્સ 140 પોઈન્ટથી વધુ નીચે સરકી ગયો હતો.
NSE નિફ્ટીમાં શરૂઆતથી જ ભારે ઉથલપાથલ જોવા મળી. 50 શેરનો ઇન્ડેક્સ પ્રારંભિક સમયે 24,241 સુધી ગબડ્યો હતો, જે અગાઉના બંધ 23,353ની સરખામણીમાં ઘટાડો દર્શાવે છે. જોકે, થોડા સમય બાદ તેમાં ઝડપી રિકવરી જોવા મળી અને તે 24,420 સુધી પહોંચી ગયો. પરંતુ આ ઉછાળો લાંબો ટક્યો નહીં અને પછી સેન્સેક્સ સાથે મળીને બજાર ફરીથી લાલ ઝોનમાં સરકી ગયું.
આ સ્ટોક્સે માર્કેટને સપોર્ટ આપ્યો
મધ્ય પૂર્વમાં વધતા તણાવ અને હોર્મુઝ વિસ્તારમાં ઉભી થયેલી મડાગાંઠને કારણે વૈશ્વિક બજારમાં ચિંતા જોવા મળી હતી. ક્રૂડ ઓઇલના ભાવમાં તેજી આવતા શરૂઆતના ટ્રેડિંગ સત્રમાં નિફ્ટી પર ભારે દબાણ રહ્યું અને સેન્સેક્સ-નિફ્ટી બંનેમાં ઘટાડાની આશંકા ઊભી થઈ હતી.
પરંતુ, બજાર ખૂલ્યા બાદ થોડા સમય પછી સ્થિતિ બદલાઈ ગઈ. કેટલીક મોટી અને બ્લુચિપ કંપનીઓના શેરોમાં ખરીદીનો પ્રવાહ વધતા સૂચકાંકોને ટેકો મળ્યો. પરિણામે, શરૂઆતના ઘટાડા પછી બજાર ધીમે ધીમે રિકવરી મોડમાં પ્રવેશ્યું અને સેન્સેક્સ તથા નિફ્ટીએ નુકસાનમાંથી બહાર આવવાનો પ્રયાસ કર્યો.
જો આપણે સૌથી ઝડપથી વિકસતા શેરો પર નજર કરીએ, તો લાર્જકેપ કેટેગરીમાં સમાવિષ્ટ SBI શેર (2.10%), ICICI બેંક શેર (2%) અને ટ્રેન્ટ શેર (1.10%) ઉછાળા સાથે ટ્રેડ થઈ રહ્યા હતા. આ ઉપરાંત, મિડકેપ કેટેગરીમાં સમાવિષ્ટ BHEL શેર (3%), AU બેંક શેર (1.50%), વોલ્ટાસ શેર (1.40%) ઉછાળા સાથે ટ્રેડ થઈ રહ્યા હતા. જો આપણે સ્મોલકેપ કેટેગરીમાં જોઈએ, તો CUB શેર (3%), રેડિકો ખેતાન શેર (2.50%) અહીં આગળ હતા.
આ પણ વાંચો: ચીનમાં રોબોટે માનવીને હરાવ્યા, 21 કિમીની મેરેથોનમાં બનાવ્યો નવો વર્લ્ડ રેકોર્ડ
આ પણ વાંચો: હોર્મુઝ સ્ટ્રેટ ખુલતા જ યુએસ માર્કેટમાં મોટી તેજી ,ભારત માટે પણ સારા સમાચાર
