પાકિસ્તાનમાં સત્તા પરિવર્તન બાદ હવે સ્થિતિ સુધરવાને બદલે વધુ ખરાબ થતી જોવા મળી રહી છે. ઈમરાન ખાન ચૂંટણીની માંગને લઈને પોતાના સમર્થકો સાથે ઈસ્લામાબાદમાં પ્રવેશ્યા છે. ઈમરાન ખાનની આ સ્વતંત્રતા કૂચને રોકવા માટે પાકિસ્તાન સરકારે રેડ ઝોનમાં સેના પણ તૈનાત કરી છે.પ્રદર્શનકારીઓ અને સુરક્ષાકર્મીઓ વચ્ચે ઘર્ષણના અહેવાલો પણ મળ્યા છે. ઈમરાનના સમર્થકોએ ત્યાં એક મેટ્રો સ્ટેશનને પણ આગ લગાવી દીધી છે. પીટીઆઈ પાર્ટીના નેતા ફવાદ ચૌધરીનું કહેવું છે કે ઈમરાન ખાન સેન્ટૌરસ બ્રિજ પર સમર્થકોને સંબોધિત કરશે.
ઈમરાનનો કાફલો સ્વાબી વાલીથી રવાના થયો હતો અને શ્રીનગર હાઈવે (પાકિસ્તાનમાં) થઈને ડી-ચોક પહોંચશે. ડી-ચોક પર તેમની પાર્ટીના કેટલાક કાર્યકરો પહેલેથી જ હાજર છે, તેમને હટાવવા માટે સતત ટીયર ગેસના શેલ છોડવામાં આવી રહ્યા છે.
પાકિસ્તાનના પૂર્વ પીએમ ઈમરાન ખાન તેમના સમર્થકો સાથે ડી-ચોક તરફ આગળ વધી રહ્યા છે. હાલમાં સરકાર દ્વારા બહાર પાડવામાં આવેલા આદેશમાં કહેવામાં આવ્યું છે કે તેમની પ્રાથમિકતા સરકારી ઈમારતોની સુરક્ષા છે.
શાહબાઝ શરીફની સરકારનું કહેવું છે કે ઈમરાનના સમર્થકો સુપ્રીમ કોર્ટ, સંસદ ભવન, પીએમ હાઉસ, પ્રેસિડેન્સી, પાકિસ્તાન સચિવાલય અને ડિપ્લોમેટિક એન્ક્લેવને નિશાન બનાવી શકે છે.પાકિસ્તાન તહરીક-એ-ઈન્સાફ (પીટીઆઈ)ના સમર્થકોને રોકવાના પણ પ્રયાસો થઈ રહ્યા છે. પાકિસ્તાન મુસ્લિમ લીગ (એન)ના કાર્યકર્તાઓએ પંજાબ અને ખૈબર પખ્તુનખ્વામાં ઘણા રસ્તાઓ બ્લોક કરી દીધા છે.
