Mehsana News:મહેસાણા જિલ્લામાં ખનીજ માફિયાઓની (Mining Mafia) બેફામ ગતિવિધિઓ વધુ એક વખત સામે આવી છે. ગેરકાયદે રેતી વહન કરતા ડમ્પરો પકડવા ગયેલા રોયલ્ટી ઇન્સ્પેક્ટર પર માફિયાઓએ અદાવત રાખીને હુમલો કર્યો હતો. આ ઘટનામાં અધિકારીનો કોલર પકડીને ધમકીઓ આપવામાં આવી હતી અને તેમને છોડાવવા વચ્ચે પડેલા એક ડ્રાઇવર સાથે પણ મારપીટ કરવામાં આવી હતી. ઘટના માનવ આશ્રમ ચોકડી નજીક બની હતી.
રોયલ્ટી ઇન્સ્પેક્ટરની ટીમે પકડ્યા હતા ડમ્પર
2 દિવસ પહેલા રાત્રે ખાણ-ખનીજ વિભાગની ટીમે ગેરકાયદે રેતી ભરેલા ડમ્પરો તપાસ કરતી વખતે ત્રણ ડમ્પરોને ઝડપ્યા હતા. રોયલ્ટી ઇન્સ્પેક્ટર યોગીરાજસિંહ પરમારની આગેવાની હેઠળની ટીમે આ વાહનો પર કાર્યવાહી કરીને દંડ ફટકાર્યો હતો.આ કાર્યવાહીની અદાવત રાખીને ખનીજ માફિયાઓએ (Mining Mafia) બીજા દિવસે સવારે અધિકારી પર હુમલો કર્યો. આરોપીઓએ ઇન્સ્પેક્ટર યોગીરાજસિંહ પરમારનો કોલર પકડીને દાદાગીરી કરી અને જીવલેણ ધમકીઓ આપી.
અદાવત રાખી ખનીજ માફિયાએ (Mining Mafia) ધમકી આપી માર માર્યો
જ્યારે એક ડ્રાઇવરે અધિકારીને છોડાવવા વચ્ચે પડવાનો પ્રયાસ કર્યો ત્યારે તેને પણ માર મારવામાં આવ્યો.આરોપીઓમાં ગોવિંદ ઠાકોર અને સગલા સહિત અન્યોનો સમાવેશ થાય છે.ઇન્સ્પેક્ટર યોગીરાજસિંહ પરમારે તાત્કાલિક સારવાર લીધા બાદ મહેસાણા તાલુકા પોલીસ સ્ટેશનમાં ફરિયાદ નોંધાવી છે. પોલીસે આરોપીઓ વિરુદ્ધ કેસ નોંધીને તપાસ શરૂ કરી છે.
