OTP વગર બેંક એકાઉન્ટ ખાલી! Scamથી બચવા માટે ડાયલ કરો ##002#

Mobile Call Forwarding Scam: અત્યાર સુધી આપણે સાંભળ્યું હતું કે કોઈને OTP ન આપવો જોઈએ, નહીંતર છેતરપિંડી થઈ શકે છે. પરંતુ હવે ઠગોએ એવી માસ્ટર માઈન્ડ ટ્રીક શોધી છે કે તેમને તમારા OTPની જરૂર જ નથી! માત્ર એક નાનકડો કોડ ડાયલ કરાવીને ઠગો તમારા આખા ફોનનો કંટ્રોલ લઈ શકે છે અને તમારી જાણ બહાર જ લાખો રૂપિયાની ચોરી કરી શકે છે.

કેવી રીતે શરૂ થાય છે આ ખેલ?

આ છેતરપિંડી (Scam) ની શરૂઆત એક સાધારણ ફોન કોલથી થાય છે. ઠગ પોતાને ડિલિવરી બોય, કસ્ટમર કેર એક્ઝિક્યુટિવ કે બેંક ઓફિસર તરીકે ઓળખાવશે. તે તમને કહેશે કે તમારું કોઈ પાર્સલ અટકી ગયું છે અથવા તમારી કોઈ સર્વિસ બંધ થવાની છે. વિશ્વાસ જીતવા માટે તે તમને કોઈ એપ ડાઉનલોડ કરવા કે લિંક પર ક્લિક કરવા નહીં કહે, પરંતુ માત્ર એક કોડ (જેમ કે 21 નંબર#) ડાયલ કરવા માટે મજબૂર કરશે.

શું છે ‘કોલ ફોરવર્ડિંગ Scam‘ની માયાજાળ?

તમે જેવો તે કોડ ડાયલ કરો છો, તમારા ફોનની તમામ સેટિંગ્સ બદલાઈ જાય છે:

તમારા નંબર પર આવતા તમામ OTP અને મેસેજ સીધા ઠગના મોબાઈલ પર ફોરવર્ડ થઈ જાય છે.

બેંકમાંથી આવતા કન્ફર્મેશન કોલ્સ પણ તમને મળવાને બદલે ઠગને જાય છે.

પરિણામ એ આવે છે કે ઠગ તમારા એકાઉન્ટમાંથી પૈસા ટ્રાન્સફર કરી લે છે અને તમને તેની જાણ સુદ્ધાં થતી નથી, કારણ કે મેસેજ તમને મળતા જ નથી!

તમારી સુરક્ષા તમારા હાથમાં

કોઈપણ કોડ ડાયલ ન કરો: અજાણી વ્યક્તિના કહેવા પર ક્યારેય ડાયલ પેડ પર જઈને કોઈ નંબર કે કોડ ડાયલ ન કરો.

સેટિંગ્સ ચેક કરો: તમારા ફોનના Call Settings માં જઈને વારંવાર તપાસો કે ‘Call Forwarding’માં કોઈ અજાણ્યો નંબર તો સેટ થયેલો નથી ને?

બ્રહ્માસ્ત્ર કોડ: જો તમને જરા પણ શંકા હોય કે તમારો ફોન હેક (Scam) થયો છે, તો તરત જ ##002# ડાયલ કરો. આ કોડ ડાયલ કરવાથી તમામ પ્રકારની કોલ ફોરવર્ડિંગ સેવાઓ તરત જ રદ થઈ જશે.