World News : યુકેમાં વાયુ પ્રદૂષણને લઈને એક ચોંકાવનારું સંશોધન સામે આવ્યું છે, જેમાં જણાયું છે કે પ્રદૂષિત હવા લોકોમાં લાંબા ગાળાની બીમારીઓને વહેલી શરૂ કરાવી શકે છે અને સ્વસ્થ જીવનના વર્ષો ઘટાડે છે.
Sun Yat-sen Universityના પ્રોફેસર હુઆલિયાંગ લિનના નેતૃત્વ હેઠળ થયેલા આ અભ્યાસમાં જણાવાયું છે કે વાયુ પ્રદૂષણ માત્ર બીમારીઓનું જોખમ વધારતું નથી, પરંતુ તે “શાંત પ્રવેગક” તરીકે કાર્ય કરીને લોકોને સમય પહેલાં બીમાર બનાવે છે.
અભ્યાસ માટે 15 વર્ષ સુધીના આરોગ્ય ડેટાનો ઉપયોગ કરવામાં આવ્યો હતો, જેમાં UK Biobankમાં નોંધાયેલા આશરે 3.96 લાખ લોકોનો સમાવેશ થાય છે. સંશોધકોએ 78 પ્રકારની બીમારીઓ અને 9 લાખથી વધુ હોસ્પિટલમાં દાખલ થવાના કેસોનું વિશ્લેષણ કર્યું.
વાયુ પ્રદૂષણ(Pollution)ના સંપર્કમાં આવતા લોકોમાં બે વર્ષ સુધી વહેલી બીમારી શરૂ થવાની શક્યતા
સંશોધન અનુસાર, વાયુ પ્રદૂષણના સંપર્કમાં આવતા લોકોમાં બે વર્ષ સુધી વહેલી બીમારી શરૂ થવાની શક્યતા છે. ખાસ કરીને મગજ અને માનસિક આરોગ્ય સંબંધિત રોગો પર તેની ગંભીર અસર જોવા મળી છે, જેમાં Schizophrenia, Parkinson’s disease, Dementia અને Dystonia જેવા રોગોનો સમાવેશ થાય છે.
આ અભ્યાસમાં એવું પણ જાણવા મળ્યું કે જો યુકે World Health Organization (WHO) દ્વારા 2021માં નક્કી કરાયેલા વાયુ ગુણવત્તા ધોરણોનું પાલન કરત, તો ઘણી બીમારીઓને ટાળી શકાય હોત.
સંશોધકોના અંદાજ મુજબ, અભ્યાસમાં સામેલ લોકો કુલ મળીને આશરે 5.39 લાખ સ્વસ્થ જીવનના વર્ષો વધારી શક્યા હોત. સરેરાશ રીતે દરેક વ્યક્તિને એક વર્ષથી વધુ સ્વસ્થ જીવન મળી શક્યું હોત.
કણ પ્રદૂષણમાં ઘટાડો કરવાથી Hypertension, Diabetes, અસ્થમા અને હાડકાંના ફ્રેક્ચર જેવી બીમારીઓ મોડે શરૂ થઈ શકે છે. આથી આરોગ્યસંભાળ પરનો ભાર પણ ઓછો થઈ શકે છે.
King’s College Londonની ડૉ. એમી રોનાલ્ડસને જણાવ્યું કે પ્રદૂષણના વધુ સ્તરનો સામનો કરનારા લોકોમાં એકથી વધુ લાંબા ગાળાની બીમારીઓ થવાની શક્યતા વધારે હોય છે અને હવે પુરાવા દર્શાવે છે કે આ બીમારીઓ વહેલી શરૂ પણ થઈ શકે છે.
વિશેષજ્ઞોના મતે, વાયુ પ્રદૂષણમાં ઘટાડો કરવો આરોગ્ય અસમાનતા ઘટાડવા, આરોગ્ય પ્રણાલીઓ પરનો દબાણ ઓછો કરવા અને લોકોના કુલ સ્વાસ્થ્યમાં સુધારો લાવવા માટે અત્યંત જરૂરી છે.
