Gujarat News: વડાપ્રધાનના સુશાસનના 12 વર્ષ પૂર્ણ થવાના અવસરે નર્મદા જિલ્લાના રાજપીપળા ખાતે યોજાયેલા કાર્યક્રમમાં ભાજપની આંતરિક નારાજગી ખુલ્લેઆમ સામે આવી છે. નાંદોદ વિધાનસભાના ભાજપના મહિલા ધારાસભ્ય ડો. દર્શનાબેન દેશમુખે (Darshanaben Deshmukh) કાર્યક્રમ દરમિયાન પોતાનું અપમાન થયું હોવાનો આક્ષેપ કરીને કાર્યક્રમમાંથી વોકઆઉટ કર્યું હતું. ત્યારબાદ તેઓ ગાંધી ચોક ખાતે ધરણા પર બેસી ગયા હતા.

મળતી માહિતી મુજબ રાજપીપળાના આંબેડકર હોલ ખાતે પ્રબુદ્ધ નાગરિકોના સન્માન માટે વિશેષ કાર્યક્રમ યોજાયો હતો. કાર્યક્રમમાં જિલ્લાના પ્રભારી મંત્રી ઈશ્વરસિંહ પટેલ (Ishwar Singh Patel), પૂર્વ વનમંત્રી ગણપત વસાવા (Ganpati Vasava) સહિત ભાજપ (BJP)ના અનેક આગેવાનો હાજર રહ્યા હતા. જોકે સ્થાનિક ધારાસભ્ય હોવા છતાં પ્રોટોકોલનું પાલન ન થયું હોવાનો આક્ષેપ કરીને ડો. દર્શનાબેન દેશમુખે (Darshanaben Deshmukh) નારાજગી વ્યક્ત કરી હતી.

Darshanaben Deshmukh: જિલ્લા સંગઠન સામે આકરા આરોપ

કાર્યક્રમ બાદ મીડિયા સાથે વાત કરતા ડો. દર્શનાબેન દેશમુખે (Darshanaben Deshmukh) જિલ્લા ભાજપ સંગઠન પર ગંભીર આક્ષેપો કર્યા હતા. તેમણે જણાવ્યું હતું કે છેલ્લા બે વર્ષથી જિલ્લા ભાજપ પ્રમુખ દ્વારા સતત તેમની અવગણના અને અપમાન કરવામાં આવી રહ્યું છે.તેમણે વધુમાં દાવો કર્યો હતો કે ગાંધીનગરના એક પ્રભાવશાળી મંત્રીના પીઠબળના કારણે જિલ્લા સ્તરે મનમાની ચાલી રહી છે. સંગઠન દ્વારા ટિકિટ ફાળવણી સહિતના નિર્ણયો પણ મનફાવે તે રીતે લેવામાં આવ્યા હોવાનું તેમણે જણાવ્યું હતું. આ પ્રકારની કામગીરીના કારણે ચૂંટણીમાં પણ નુકસાન થયું હોવાનો આરોપ તેમણે લગાવ્યો હતો.

રાજીનામાની ચીમકી

ધરણા દરમિયાન ધારાસભ્યએ સ્પષ્ટ સંકેત આપ્યો હતો કે જો પરિસ્થિતિમાં સુધારો નહીં આવે તો તેઓ સંગઠન અને ધારાસભ્ય પદ અંગે પણ કડક નિર્ણય લઈ શકે છે. તેમના નિવેદન બાદ જિલ્લા રાજકારણમાં ભારે ચર્ચા શરૂ થઈ છે.

મનસુખ વસાવા આવ્યા સમર્થનમાં

આ સમગ્ર વિવાદમાં ભરૂચના ભાજપ સાંસદ મનસુખ વસાવા (Mansukh Vasava) પણ ખુલ્લેઆમ ડો. દર્શનાબેન દેશમુખના સમર્થનમાં આવ્યા છે. મનસુખ વસાવાએ આ ઘટનાને આદિવાસી સમાજના અપમાન સાથે જોડીને રજૂ કરી હતી અને જિલ્લા ભાજપ પ્રમુખ નીલ રાવના રાજીનામાની માંગણી કરી હતી.તેમણે જણાવ્યું કે ચૂંટાયેલા પ્રતિનિધિઓના સન્માન અને પ્રોટોકોલનું પાલન થવું જરૂરી છે. આ મુદ્દે યોગ્ય કાર્યવાહી ન થાય તો સંગઠનને નુકસાન થઈ શકે છે.

ભાજપમાં જૂથવાદ ફરી ચર્ચામાં

સુશાસન કાર્યક્રમના દિવસે જ ભાજપના આંતરિક મતભેદો અને જૂથવાદ જાહેરમાં સામે આવતા રાજકીય વર્તુળોમાં ચર્ચાનો માહોલ સર્જાયો છે. એક તરફ કાર્યક્રમ દ્વારા સરકારની સિદ્ધિઓ લોકો સુધી પહોંચાડવાનો પ્રયાસ કરવામાં આવી રહ્યો હતો, ત્યારે બીજી તરફ પક્ષની અંદરની નારાજગી ખુલ્લેઆમ સામે આવતાં વિપક્ષને પણ હુમલો કરવાની તક મળી છે.હવે જિલ્લા અને રાજ્ય સ્તરના ભાજપ નેતૃત્વ દ્વારા આ સમગ્ર વિવાદને કેવી રીતે સંભાળવામાં આવે છે તેના પર સૌની નજર છે.

આ પણ વાંચો:નર્મદા જિલ્લામાં ભાજપમાં ભારેલો અગ્નિ, મનસુખ વસાવાએ તોપનું નાળચું દર્શનાબેન તરફ ફેરવ્યું

આ પણ વાંચો:મનસુખ વસાવાની પ્રેસ કોન્ફરન્સ: ડૉ. દર્શના દેશમુખના આરોપો નકાર્યા, ચૈતર વસાવાને ભાણેજ તરીકે સ્વીકાર્યા

આ પણ વાંચો:મનસુખ વસાવાનો ભાજપ પર જ પ્રહાર, જિલ્લા નેતાઓ સામે જાહેરમાં આક્ષેપ