નવી દિલ્હી,
જો તમે ડ્રોન ચલાવવાની ઈચ્છા રાખો છો તો હવે તમારે સાવધાન થઈ જવાની જરુર છે, કારણ કે, હવે ડ્રોન ચલાવવા માટે લાઈસન્સ લેવુ પડશે. માત્ર એટલુ જ નહીં ડ્રોન ચલાવવા માટે ગૃહ મંત્રાલયની મંજૂરી તેમજ ટ્રેનિંગ પણ લેવી પડશે.
ડીરેક્ટોરેટ જનરલ ઓફ સીવીલ એવીએશન (DGCA)એ ડ્રોન વિમાનો માટે કડક અને ખાસ નિયમો તૈયાર કર્યા છે. આ નિયમો મારફતે રીમોટલી પાયલેટિડ એરક્રાફ્ટ સિસ્ટમ (આરપીએએસ) પર નજર રાખવામાં આવશે.
આ નિર્ણય બાદ હવે ૨ કિલોથી વધુનું ડ્રોન ચલાવનારા લોકોએ લાઈસન્સ લેવા માટે ૨૫ હજાર રુપિયા ચુકવવા પડશે. તેમજ પોતાના લાઈસન્સને રીન્યુ કરાવવા માટે ૧૦ હજાર રુપિયા ચુકવવાના રહેશે. આ ઉપરાંત ડ્રોનને ચલાવનાર શખ્સે ડીજીસીએની માન્યતા પ્રાપ્ત ઉડાણ તાલીમ સંસ્થા પાસેથી ટ્રેનિંગ લેવાની રહેશે.
DGCA દ્વારા આ નિયમ દેશની સુરક્ષાને ધ્યાનમાં રાખીને બનાવવામાં આવ્યા છે. સુરક્ષા એજન્સીઓ સિવાય ડ્રોન ચલાવનાર લોકોએ સૌથી પહેલા યૂનિક આઇડેન્ટિફિકેશન નંબર (યુઆઈએન)લેવો પડશે.
ડીજીસીએએ આરપીએએસને પાંચ શ્રેણીમાં વહેંચી છે. નૈનો-૨૫૦ ગ્રામ, માઈક્રો-૨૫૦થી ૨ કિલો, સ્મોલ-૨થી ૨૫ કિલો, મિડીયમ-૨૫થી ૧૫૦ કિલો અને લાર્જ-૧૫૦ કિલોથી ઉપરના આધારે વહેંચવામાં આવ્યુ છે.