Gandhinagar News: દેશમાં ‘વન નેશન-વન ઈલેક્શન’ (One Nation One Election) મુદ્દે ચર્ચા વધુ તેજ બની રહી છે. ગુજરાતની ત્રણ દિવસીય મુલાકાતે આવેલી જોઈન્ટ પાર્લામેન્ટરી કમિટી (JPC)ના ચેરમેને દાવો કર્યો છે કે જો દેશમાં લોકસભા અને તમામ રાજ્યોની વિધાનસભાની ચૂંટણીઓ એકસાથે યોજવામાં આવે તો દેશના અંદાજે ₹7 લાખ કરોડ જેટલા ખર્ચમાં બચત થઈ શકે છે.
તેમણે જણાવ્યું હતું કે આ બચેલી રકમનો ઉપયોગ દેશના વિકાસ કાર્યો, માળખાકીય સુવિધાઓ, ગરીબ કલ્યાણ, આરોગ્ય, શિક્ષણ અને જાહેર સેવાઓને વધુ મજબૂત બનાવવા માટે થઈ શકે છે. સાથે જ ‘વન નેશન-વન ઈલેક્શન’ (One Nation One Election) અમલમાં આવશે તો દેશના જીડીપીમાં લગભગ 1.6 ટકા સુધીનો વધારો થવાની શક્યતા પણ વ્યક્ત કરવામાં આવી છે.
One Nation One Election:ગુજરાતમાં અધિકારીઓ સાથે મહત્વપૂર્ણ બેઠક
20 મેના રોજ JPCના સભ્યોએ ગુજરાતના ચીફ સેક્રેટરી સહિતના ઉચ્ચ અધિકારીઓ તેમજ સત્તારૂઢ ભાજપના પદાધિકારીઓ સાથે બેઠક યોજી હતી. બેઠક દરમિયાન રાજ્ય સરકાર તરફથી વિસ્તૃત પ્રેઝન્ટેશન રજૂ કરવામાં આવ્યું હતું, જેમાં ચૂંટણી પ્રક્રિયા, વહીવટી ખર્ચ અને વિકાસ પર થતી અસર જેવા અનેક મુદ્દાઓનો સમાવેશ કરવામાં આવ્યો હતો.JPCના ચેરમેને જણાવ્યું કે ગુજરાત સરકારે કેટલાક એવા મહત્વપૂર્ણ મુદ્દાઓ રજૂ કર્યા છે, જે અગાઉ ધ્યાનમાં લેવામાં આવ્યા નહોતા. કમિટીએ રાજ્ય સરકાર પાસેથી વિવિધ વિભાગોના સૂચનો અને ઇનપુટનો વિગતવાર રિપોર્ટ પણ માંગ્યો છે.
18 હજાર પાનાનો રિપોર્ટ સરકારને સોંપાયો
‘વન નેશન-વન ઈલેક્શન’ (One Nation One Election) મુદ્દે કમિટીએ આશરે 18 હજાર પાનાનો વિશાળ રિપોર્ટ તૈયાર કર્યો છે. આ રિપોર્ટમાં દેશભરના વિવિધ રાજ્યોના સૂચનો, ચૂંટણી ખર્ચ, સુરક્ષા વ્યવસ્થા, વહીવટી અસર અને વિકાસ પર થતી અસરનો સમાવેશ કરવામાં આવ્યો હોવાનું જાણવા મળે છે.કમિટીના જણાવ્યા મુજબ કેન્દ્ર સરકારે આ રિપોર્ટને સ્વીકારી લીધો છે અને હવે આગળની પ્રક્રિયા અંગે ચર્ચા ચાલી રહી છે.
પાલિકા-પંચાયત ચૂંટણી અંગે પણ મહત્વની ભલામણ
કમિટીએ ભલામણ કરી છે કે જો લોકસભા અને વિધાનસભાની ચૂંટણીઓ એકસાથે યોજાય તો ત્યારબાદ 100 દિવસની અંદર પાલિકા અને પંચાયતોની ચૂંટણીઓ યોજવી જોઈએ. આથી ચૂંટણી પ્રક્રિયા વધુ સુવ્યવસ્થિત બનશે અને વારંવાર લાગતા આચારસંહિતાના કારણે વિકાસ કાર્યોમાં આવતો વિક્ષેપ ઘટશે.
અનેક રાજ્યોની મુલાકાત બાદ ગુજરાતમાં ચર્ચા
JPC અત્યાર સુધીમાં મહારાષ્ટ્ર, ઉત્તરાખંડ, હિમાચલ પ્રદેશ, હરિયાણા, પંજાબ અને કર્ણાટક જેવા રાજ્યોની મુલાકાત લઈ ચૂકી છે. હવે ગુજરાતમાં યોજાયેલી ચર્ચા બાદ કમિટી વધુ વિસ્તૃત અભ્યાસ અને સૂચનોના આધારે અંતિમ અભિપ્રાય તૈયાર કરશે.
આ પણ વાંચો:‘વન નેશન, વન ઈલેક્શન’ને ગુજરાત સરકારનો સંપૂર્ણ ટેકો, હર્ષ સંઘવીનું મોટું નિવેદન
આ પણ વાંચો:‘વન નેશન વન ઇલેક્શન’ બિલ આવતીકાલે લોકસભામાં રજૂ થશે, ભાજપે સાંસદોને વ્હીપ જારી કર્યો
