New Delhi: ખાંડના ભાવમાં વધારો લોકોને પરેશાન કરી રહ્યો છે ત્યારે હવે ડુંગળીના વધતા ભાવે (Onion Price Hike) પણ સામાન્ય પરિવારનું બજેટ ખોરવી નાખ્યું છે. દેશના કેટલાક મોટા શહેરોમાં ડુંગળીનો છૂટક ભાવ રૂ. 60થી 65 પ્રતિ કિલો સુધી પહોંચી ગયો છે. વધતા ભાવને કાબૂમાં લેવા કેન્દ્ર સરકારે પોતાના બફર સ્ટોકમાંથી ડુંગળી બજારમાં ઉતારવાનો નિર્ણય કર્યો છે. સરકાર સોમવારે નાસિકથી દિલ્હી, ચેન્નાઈ, કોચી અને ગુવાહાટી તરફ ‘કાંદા એક્સપ્રેસ’ ચલાવીને ડુંગળીનો પુરવઠો પહોંચાડશે. જે શહેરોમાં ભાવ વધારે છે ત્યાં વધારાનો પુરવઠો પહોંચાડી બજાર પર ભાવ નિયંત્રણ લાવવાનો પ્રયાસ કરવામાં આવશે.
દિલ્હીમાં ડુંગળીનો ભાવ રૂ. 65 સુધી પહોંચ્યો
ગ્રાહક મંત્રાલયના આંકડા મુજબ દિલ્હીમાં શનિવારે ડુંગળીનો છૂટક ભાવ રૂ. 65 પ્રતિ કિલો નોંધાયો હતો. ગયા વર્ષે આ જ સમયગાળામાં દિલ્હીમાં ડુંગળી લગભગ રૂ. 35 પ્રતિ કિલોના ભાવે મળતી હતી. એટલે કે એક વર્ષમાં દિલ્હીમાં ડુંગળીના ભાવ (Onion Price Hike)માં નોંધપાત્ર વધારો થયો છે. ચેન્નાઈમાં પણ ડુંગળીનો ભાવ રૂ. 58 પ્રતિ કિલો સુધી પહોંચી ગયો છે, જ્યારે ગયા વર્ષે અહીં ભાવ લગભગ રૂ. 33 પ્રતિ કિલો હતો. કેરળ અને આસામના કેટલાક વિસ્તારોમાં પણ ડુંગળીના ભાવ (Onion Price Hike)માં વધારો નોંધાયો છે.
ભાવ કાબૂમાં લેવા બફર સ્ટોકમાંથી સપ્લાય
કેન્દ્ર સરકાર બજારમાં એકસાથે મોટી માત્રામાં ડુંગળી ઉતારવાને બદલે પરિસ્થિતિ પ્રમાણે તબક્કાવાર પુરવઠો વધારવાની યોજના ધરાવે છે. સરકારી અધિકારીઓના જણાવ્યા પ્રમાણે, બજારમાં ડુંગળીનો પૂરતો પુરવઠો જળવાઈ રહે અને કૃત્રિમ રીતે ભાવ વધારવાની કોઈ શક્યતા હોય તો તેના પર નિયંત્રણ લાવી શકાય તે માટે બફર સ્ટોકનો ઉપયોગ કરવામાં આવશે.
Onion Price Hike: ડુંગળી મોંઘી થવાનું કારણ શું?
ડુંગળીના ભાવ (Onion Price Hike)માં વધારા પાછળનું એક મુખ્ય કારણ મહારાષ્ટ્રમાં ખરીફ ડુંગળીના ઉત્પાદનમાં ઘટાડો હોવાનું બજાર સાથે સંકળાયેલા લોકોનું કહેવું છે. મહારાષ્ટ્ર દેશના સૌથી મોટા ડુંગળી ઉત્પાદક રાજ્યોમાંનું એક છે. ઉપલબ્ધ અંદાજ પ્રમાણે રાજ્યમાં ખરીફ ડુંગળીનું ઉત્પાદન આશરે 5થી 7 ટકા ઘટ્યું હોવાની માહિતી સામે આવી છે. જોકે, સરકારનું કહેવું છે કે આગામી સમયની જરૂરિયાત પૂરી કરવા માટે દેશ પાસે પૂરતો સ્ટોક ઉપલબ્ધ છે. ખેડૂતો પાસે રહેલા સ્ટોક ઉપરાંત સરકારી બફર સ્ટોક પણ ઉપલબ્ધ હોવાથી પુરવઠાની મોટી અછત સર્જાય તેવી સ્થિતિ નથી.
NAFED અને NCCFએ 1.2 લાખ ટન ડુંગળી ખરીદી
કેન્દ્ર સરકારે ડુંગળીનો બફર સ્ટોક તૈયાર કરવાની જવાબદારી NAFED અને National Cooperative Consumers’ Federation (NCCF) જેવી એજન્સીઓને સોંપી છે. ચાલુ નાણાકીય વર્ષમાં બંને એજન્સીઓ દ્વારા આશરે 1.2 લાખ ટન ડુંગળીની ખરીદી કરવામાં આવી હોવાનું જણાવાયું છે. સરકાર વધુ ડુંગળીની ખરીદી કરી બફર સ્ટોક મજબૂત બનાવવા માંગે છે. બજારમાં ભાવ વધે ત્યારે આ જ સ્ટોકમાંથી ડુંગળી (Onion Price Hike) બહાર પાડીને ભાવ પર નિયંત્રણ લાવવાની રણનીતિ છે. ડુંગળીની સરકારી ખરીદી માટેનો ભાવ પણ વધારીને રૂ. 2,645 પ્રતિ ક્વિન્ટલ કરવામાં આવ્યો છે.
કુલ ઉત્પાદનમાં મોટો ઘટાડો નહીં થાય
કૃષિ મંત્રાલયના અંદાજ પ્રમાણે 2025-26 દરમિયાન દેશમાં ડુંગળીનું કુલ ઉત્પાદન આશરે 307 લાખ ટન રહેવાની ધારણા છે. આ આંકડો અગાઉના વર્ષના ઉત્પાદનની આસપાસ જ છે. એટલે સમગ્ર દેશમાં ડુંગળીના કુલ ઉત્પાદનમાં મોટો ઘટાડો થવાની શક્યતા નથી. જોકે, અલગ-અલગ રાજ્યોમાં ઉત્પાદન અને બજારમાં આવતી ડુંગળીના પુરવઠામાં થતા ફેરફારની સીધી અસર સ્થાનિક ભાવ પર પડી રહી છે.
ગયા વર્ષે પણ દોડાવી હતી ‘કાંદા એક્સપ્રેસ’
ડુંગળીના ભાવ (Onion Price Hike)ને નિયંત્રણમાં રાખવા માટે કેન્દ્ર સરકાર અગાઉ પણ ‘કાંદા એક્સપ્રેસ’નો ઉપયોગ કરી ચૂકી છે. ઓક્ટોબર 2024માં નાસિકથી દિલ્હી સહિતના વિસ્તારોમાં ડુંગળી પહોંચાડવા માટે ખાસ ટ્રેનો મારફતે સપ્લાય કરવામાં આવ્યો હતો. હવે ફરી એક વખત નાસિકથી દેશના એવા શહેરો સુધી ડુંગળી પહોંચાડવાની યોજના છે જ્યાં ભાવ સરેરાશ કરતાં વધારે છે.
ખાંડના ભાવમાં પણ વધારો
ડુંગળીની સાથે ખાંડના ભાવ (Onion Price Hike)માં પણ વધારો સામાન્ય ગ્રાહકો માટે ચિંતાનો વિષય બન્યો છે. શનિવારે ખાંડનો છૂટક ભાવ આશરે રૂ. 62.50 પ્રતિ કિલો નોંધાયો હતો. એક મહિના પહેલાં તે લગભગ રૂ. 46 પ્રતિ કિલો હતો. એટલે કે એક મહિનામાં ખાંડના ભાવમાં નોંધપાત્ર વધારો થયો છે. દિલ્હીમાં ખાંડનો ભાવ આશરે રૂ. 65 પ્રતિ કિલો, જ્યારે મુંબઈમાં તે રૂ. 69 પ્રતિ કિલો સુધી પહોંચ્યો હોવાનું જણાવાયું છે. જોકે, ખાદ્ય મંત્રાલયના જણાવ્યા પ્રમાણે દેશમાં ખાંડનો પૂરતો સ્ટોક ઉપલબ્ધ છે.
ગૃહિણીઓના બજેટ પર મોંઘવારીનો બેવડો માર
એક તરફ ખાંડ મોંઘી થઈ રહી છે અને બીજી તરફ રસોડાની રોજિંદી જરૂરિયાત એવી ડુંગળીના ભાવ (Onion Price Hike)માં પણ વધારો થયો છે. જેના કારણે સામાન્ય પરિવારના માસિક ઘરખર્ચ પર વધારાનું ભારણ પડી રહ્યું છે. હવે સરકારની ‘કાંદા એક્સપ્રેસ’ અને બફર સ્ટોકમાંથી ડુંગળીની સપ્લાય બાદ સ્થાનિક બજારમાં ભાવ કેટલા ઘટે છે તેના પર ગ્રાહકોની નજર રહેશે.
આ પણ વાંચો:મોંઘવારીનો માર: ડુંગળી, ખાંડ, દાળ અને ખાદ્ય તેલના ભાવમાં ઉછાળો
આ પણ વાંચો:વૈશ્વિક ગતિવિધિઓ અને કથળતા હવામાનનો બેવડો માર: દેશમાં મોંઘવારીનો પારો વધુ ઊંચકાવવાની ભીતિ
આ પણ વાંચો:મોંઘવારીએ વધારી ચિંતા! RBI લોનની EMI પર લઈ શકે મોટો નિર્ણય? જાણો શું કહે છે નિષ્ણાતો
