સાબરમતી સેન્ટ્રલ જેલની ચોંકાવનારી ઘટના સામે આવી છે. જેલના મહિલા વોર્ડમાં લેડી ડોન અને અન્ય મહિલા કેદી વચ્ચે પ્રેમપ્રકરણ સામે આવતા અને તેમના લેસ્બિયન સબંધોથી અન્ય મહિલા કેદીઓ પરેશાન હોવાનો લેટર લખવામાં આવ્યો હતો. આ લેટરમાં લેડીડોનની દાદાગીરી, ધાકધમકીથી અન્ય મહિલા કેદીઓ હેરાન થાય છે તેની રજૂઆત કરવામાં આવી છે.
મહિલા કેદીઓની કુપન અને નાસ્તા પણ આ લેડી ડોન ધમકાવીને લઇ લેતી હોવાનું પત્રમાં જણાવાયુ છે. આ સાથે મહિલા વોર્ડમાં મોબાઈલ ફોનના કોલ દીઠ રૂ.50, તમાકુના પેકેટના રૂ.500 અને સિગારેટના રૂ.100 લઈ ગેરકાયદેસર વેપાર કરતી હોવાની વિગતોનો પણ સમાવેશ કરવામાં આવ્યો છે. પોલીસના ઉચ્ચ અધિકારીઓને લેડી ડોન પર આક્ષેપો કરતો આ પત્ર મળતા ઇન્ક્વાયરી બેસાડવામાં આવી છે. અધિકારીઓના જણાવ્યા પ્રમાણે, જેલમાં સ્ટ્રોંગ જામર છે જેથી કોઇ કેદી પાસે મોબાઇલ હોય તે વાત શક્ય ન હોય શકે, જો કે આ અંગે પણ તપાસ ચાલી રહી છે. સાબરમતી સેન્ટ્રલ જેલના એસપી રોહન આનંદે પ્રેસ કોન્ફરન્સ કરતા તેમણે જણાવ્યું હતું કે, આ પ્રકારના આક્ષેપો કરતો પત્ર અમને મળ્યો છે. જે પત્રની ખરાઈ અને તેમાં થયેલા આક્ષેપો બાબતે અમે ઈન્કવાયરી શરૂ કરી છે
મહિલા વિભાગમાં કેદી માટે મોબાઈલ વાપરવો અશક્ય બાબત છે. આ વિભાગમાં જામર એટલા સ્ટ્રોંગ છે કે, ત્યાંથી ફોન ઓપરેટ થઈ શકે તેમ નથી. મોબાઈલ ફોન કોઈ મહિલા કેદી પાસે હોય તે વાત માનવી અશક્ય છે. લેડી ડોન સામે પત્રમાં આક્ષેપોની વણજાર કરવામાં આવી છે. તેમાં એવી પણ ચોંકાવનારી બાબત સામે આવી છે કે, લેડી ડોનથી જેલના અધિકારીઓ પણ ડરે છે, તે અધિકારીઓને ખુલ્લેઆમ બદલી કરાવી દેવાની ધમકી આપી તેનું કામ અન્ય મહિલા કેદી પાસે કરાવીને પગાર પોતે લઈ લે છે. એટલુ જ નહીં લેડી ડોનને અન્ય મહિલા કેદી સાથે લેસ્બિયન સબંધો હોવાથી બંને બેરેકના બાથરૂમમાં જાહેરમાં શારીરિક ચેષ્ટાઓ કરે છે. જેના કારણે અન્ય મહિલા કેદીઓ શરમમાં મૂકાય જાય છે. આ વીશેની ફરિયાદ અન્ય મહિલા કેદીઓએ કરી હતી.
