એશિયા કપ 2023ની શરૂઆત રેકોર્ડ જીત સાથે શાનદાર રીતે થઈ. આ ટૂર્નામેન્ટની પ્રથમ મેચ નેપાળ અને પાકિસ્તાન વચ્ચે મુલતાનમાં રમાઈ હતી. આ મેચમાં પાકિસ્તાની ટીમના કેપ્ટન બાબર આઝમ અને ઈફ્તિખાર અહેમદે શાનદાર સદી ફટકારી હતી. તેના આધારે પાકિસ્તાનની ટીમે 238 રનના માર્જિનથી રેકોર્ડ જીત નોંધાવી હતી.
મેચમાં નેપાળની ટીમને 343 રનનો ટાર્ગેટ મળ્યો હતો જેના જવાબમાં આખી ટીમ 23.4 ઓવરમાં 104 રનમાં ઓલઆઉટ થઈ ગઈ હતી. સોમપાલ કામીએ 28, આરીફ શેખે 26 અને ગુલશન ઝાએ 13 રન બનાવ્યા હતા. આ સિવાય કોઈ બેટ્સમેન ડબલ ફિગરને સ્પર્શી શક્યો નહોતો.પાકિસ્તાન તરફથી લેગ સ્પિનર શાદાબ ખાને 27 રનમાં 4 વિકેટ લીધી હતી. જ્યારે ઝડપી બોલર શાહીન શાહ આફ્રિદી અને હરિસ રઉફે 2-2 વિકેટ ઝડપી હતી. આ રીતે પાકિસ્તાને એશિયા કપમાં શાનદાર જીત સાથે પોતાનું ખાતું ખોલ્યું. તમને જણાવી દઈએ કે નેપાળ પહેલીવાર એશિયા કપ રમી રહ્યું છે. જ્યારે પાકિસ્તાન ICC ODI રેન્કિંગમાં નંબર-1 ટીમ છે.