ફ્રાંસના રાષ્ટ્રપતિ ઈમેન્યુઅલ મેક્રોન તેમની બે દિવસીય સરકારી મુલાકાતે ભારત પહોંચ્યા છે. ગુરુવારે પીએમ મોદી અને મેક્રોંએ જયપુરમાં સંયુક્ત રોડ શો કર્યો હતો, જેમાં મોટી સંખ્યામાં લોકો એકઠા થયા હતા. આ દરમિયાન લોકોએ રોડ શોમાં ફૂલોની વર્ષા પણ કરી હતી. વાસ્તવમાં, મેક્રોન આ વર્ષે ગણતંત્ર દિવસ 2024ની પરેડના મુખ્ય અતિથિ છે. ગુરુવારે તેઓ જયપુર પહોંચ્યા, જ્યાં રાજસ્થાનના મુખ્યમંત્રી ભજનલાલ શર્માએ તેમનું સ્વાગત કર્યું. આ પછી તેઓ આમેર કિલ્લા પહોંચ્યા, જ્યાં તેમનું ઉષ્માભર્યું સ્વાગત કરવામાં આવ્યું.
વડાપ્રધાન નરેન્દ્ર મોદી અને ફ્રાન્સના રાષ્ટ્રપતિ ઈમેન્યુઅલ મેક્રોને જંતર-મંતરથી ખુલ્લા વાહનમાં રોડ શોની શરૂઆત કરી હતી, જે હવા મહેલ પર સમાપ્ત થઈ હતી. રોડ શો દરમિયાન બંને નેતાઓએ હાથ મિલાવીને લોકોનું અભિવાદન કર્યું હતું. આ પછી પીએમ મોદીએ ફ્રાન્સના રાષ્ટ્રપતિને રામ મંદિરનું મોડલ ગિફ્ટ કર્યું હતું. બંને નેતાઓએ એક દુકાન પર ચા પણ પીધી આ પહેલા વડાપ્રધાન મોદી અને ફ્રાન્સના રાષ્ટ્રપતિ મેક્રોન જંતર-મંતર વેધશાળામાં મળ્યા હતા અને એકબીજાને ગળે લગાવ્યા હતા. શાળાના વિદ્યાર્થીઓએ અમેર ફોર્ટ ખાતે રાષ્ટ્રપતિ ઈમેન્યુઅલ મેક્રોનનું સ્વાગત કર્યું. આ દરમિયાન મેક્રોને આ વિદ્યાર્થીઓ સાથે વાત પણ કરી હતી. આ પ્રસંગે તેમની સાથે વિદેશ મંત્રી ડૉ. એસ. જયશંકર અને રાજસ્થાનના ડેપ્યુટી સીએમ દિયા કુમારી પણ હાજર હતા.
