PM Modi Gujarat Visit: વડાપ્રધાન નરેન્દ્ર મોદી 9 થી 11 ઓક્ટોબર દરમિયાન ગુજરાતની મુલાકાતે આવી રહ્યા છે. આ ત્રણ દિવસ દરમિયાન PM મોદી ગુજરાતમાં અનેક વિકાસ કાર્યોની ભેટ આપશે. આ દરમિયાન તેઓ મહેસાણા જશે. વડાપ્રધાન મહેસાણાના મોઢેરા પાસેના દેલવાડા ખાતે વિશાળ જનસભાને સંબોધશે અને જિલ્લાના વિવિધ વિકાસ કાર્યોની ભેટ આપશે. આ સાથે તેઓ મા મોડેશ્વરીના દર્શન પણ કરશે. તમને જણાવી દઈએ કે સોમનાથ અને અંબાજી બાદ હવે મોઢેરાના સૂર્ય મંદિરમાં લાઈટ એન્ડ સાઉન્ડ શો શરૂ થવા જઈ રહ્યો છે. વડાપ્રધાન મોદી 9 ઓક્ટોબરે આ લાઇટ એન્ડ સાઉન્ડ શોનું ઉદ્ઘાટન કરશે. જેમાં સૂર્ય મંદિરનું મહત્વ, વિશ્વ અને ભારતમાં સ્થાપિત સૂર્ય મંદિરોની માહિતી અને આદિત્ય અને પ્રકૃતિ વચ્ચેના સંબંધો જોવા મળશે. શો દરમિયાન સૌર ઉર્જાનું મહત્વ સમજાવતું પીએમ મોદીનું ભાષણ પણ રજૂ કરવામાં આવશે. રાત્રે 7 થી 8 દરમિયાન લાઇટ એન્ડ સાઉન્ડ શો કરવામાં આવશે.
આ વિકાસકાર્યોમાં રૂ.511 કરોડના ખર્ચે સાબરમતી-જગુદણ ગેજ કન્વર્ઝન (53.43 કિમી)નું લોકાર્પણ કરવામાં આવશે, જે અમદાવાદ-મહેસાણા ગેજ કન્વર્ઝન પ્રોજેક્ટ (68.78 કિમી)નો એક ભાગ છે. સાથે જ, રૂ.336 કરોડના ખર્ચે ONGC-નંદાસણ સરફેસ ફેસિલિટીનું લોકાર્પણ કરવામાં આવશે. આ ઉપરાંત, જે વિકાસકાર્યોનું લોકાર્પણ થશે, તેમાં એમ.એસ. પાઇપલાઇન પ્રોજેક્ટ, મોઢેરા સોલાર વિલેજ, ધરોઇ ડેમ આધારિત વડનગર, ખેરાલુ અને ધરોઇ ગ્રુપ રિફોર્મ સ્કીમ, બેચરાજી-મોઢેરા-ચાણસ્મા રોડ, ઉંઝા-દસાજ-ઉપેરા-લાડોલ રોડ એક્સપાન્શનની કામગીરી, મહેસાણા ખાતે રિજિયોનલ ટ્રેનિંગ સેન્ટર (SPIPA) અને મોઢેરા સૂર્યમંદિર ખાતે લાઇટ એન્ડ સાઉન્ડ શૉનો સમાવેશ થાય છે. કુલ મળીને રૂ.1145.64 કરોડના વિકાસકાર્યોનું લોકાર્પણ કરવામાં આવશે. સાથે જ, રૂ.1181.34 કરોડના ખર્ચે NH-68 ના પાટણથી ગોઝારિયા સુધીના રસ્તાનું 4 લેન અપગ્રેડેશન અને પીએસ હાઇવેની કામગીરીનું ખાતમુહૂર્ત પણ કરવામાં આવશે.
આ ઉપરાંત, રૂ.340 કરોડના ખર્ચે મિલ્ક પાવડર પ્લાન્ટ, રૂ.110 કરોડના ખર્ચે ટેટ્રા પેક પ્લાન્ટ અને રૂ.106 કરોડના ખર્ચે વોટર ટ્રીટમેન્ટ પ્લાન્ટના કાર્યોનું પણ ખાતમુહૂર્ત કરવામાં આવશે. વિસનગર-ઉમટા-સુંઢિયા-ખેરાલુ રોડ પર બ્રિજીસના બાંધકામનું પણ ખાતમુહૂર્ત કરવામાં આવશે. બધું મળીને કુલ રૂ.1747.38 કરોડના કામોનું ખાતમુહૂર્ત કરવામાં આવશે. આમ, મહેસાણાને રૂ.2893.02 કરોડના વિકાસકાર્યોની ભેટ મળવા જઇ રહી છે.
આ પણ વાંચો: Carbon Dating/ જ્ઞાનવાપી પર ચુકાદો: કાર્બન ડેટિંગ દ્વારા ‘શિવલિંગ’ની ઉંમર જાણી શકાશે? શું આ શક્ય છે?
