ગીર સોમનાથ પોલીસે સરકારી નોકરીઓ માટે નકલી નિમણૂક પત્રો જાહેર કરીને 30 ઉમેદવારોની સાથે રૂ. 1 કરોડની છેતરપિંડી કરનારી ટોળકીના રેકેટનો પર્દાફાશ કર્યો છે. આરોપીઓએ દલિત છોકરા-છોકરીઓને નિશાન બનાવ્યા હતા. આ દરમિયાન પોલીસે ત્રણ લોકોની ધરપકડ કરી છે. પોલીસે સોમવારે સુત્રાપાડા તાલુકાના રહેવાસી જેઠા ઉર્ફે સુભાષ ચુડાસમા (35), હરસુખ ચૌહાણ (55), ભૂતપૂર્વ આર્મીમેન અને જૂનાગઢના રહેવાસી અને મહેસાણાના રહેવાસી નીલકંઠ પટેલ (45)ની ધરપકડ કરી હતી.
ચુડાસમા મુખ્ય સૂત્રધાર હતો. 2021મા દેવભૂમિ દ્વારકા પોલીસે આર્મી ભરતીમાં ગેરરીતિ આચરવા બદલ તેની સામે ગુનો નોંધ્યો હતો અને ત્યારથી તે ધરપકડથી બચી રહ્યો હતો. ગીર સોમનાથના પોલીસ અધિક્ષક મનોહરસિંહ જાડેજાએ જણાવ્યું હતું કે “આરોપીઓ 2019થી આ રેકેટમાં સંડોવાયેલા હતા. ચુડાસમા ગીર સોમનાથ જિલ્લાના સુત્રાપાડા તાલુકાના એક ગામમાં દલિત યુવાનો માટે ‘જ્યોતિબા ફૂલે એકેડમી’ નામની એકેડમી ચલાવતા હતા. એકેડેમી વિવિધ સ્પર્ધાત્મક પરીક્ષાઓની તૈયારી કરતા ઉમેદવારોને કોચિંગ આપવા માટે હતી,”
કાનજી વાલા નામની વ્યક્તિએ સુત્રાપાડા પોલીસ સ્ટેશનનો સંપર્ક કરતાં પોલીસ એક્શનમાં આવી હતી. કાનજીએ 18 મહિના પહેલા ચુડાસમાની એકેડમીનો સંપર્ક કર્યો હતો કારણ કે તેઓ ઈચ્છતા હતા કે તેમની પુત્રી ત્યાં પ્રવેશ મેળવે. ત્યાં તેઓ ચુડાસમાને મળ્યા જેઓ પોતાની ઓળખ એકેડમીના પ્રમુખ તરીકે અને આરોગ્ય વિભાગ સાથે કામ કરતા હતા એવું દર્શાવ્યું હતું.
ચુડાસમાએ પોલીસ વિભાગમાં ભરતી માટે શારીરિક કસોટીમાં નાપાસ થયેલી મહિલાઓ માટે કાનજી વાલાને નિમણૂક પત્રો બતાવ્યા હતા. તેણે તેમની પુત્રી માટે 6 લાખ રૂપિયાની માંગણી કરી હતી પરંતુ સોદો 3 લાખ રૂપિયામાં ફાઇનલ થયો હતો. વાલાએ તેમને તેમના સંબંધીઓના છ ઉમેદવારો માટે કુલ રૂ. 7 લાખ ચૂકવ્યા હતા.
ત્યારબાદ ચુડાસમા 21 માર્ચના રોજ તમામને ગાંધીનગરના સચિવાલયમાં લઈ ગયા હતા અને ઓફિસ આસિસ્ટન્ટની વર્ગ-3ની જગ્યાઓ માટે નિમણૂક પત્રો આપ્યા હતા. ત્યારબાદ ઉમેદવારોને જૂનાગઢ કલેક્ટર કચેરીએ લઈ જવામાં આવ્યા, જ્યાંથી ચુડાસમા ગાયબ થઈ ગયા. જ્યારે કાનજી વાલાએ તેના પર દબાણ કર્યું ત્યારે ચુડાસમાએ કબૂલ્યું કે તેણે નકલી નોકરીના પત્રો આપ્યા હતા. તેણે તેને ચૂકવેલી રકમનો ચેક આપ્યો પરંતુ ચેક બાઉન્સ થયો હતો.
અન્ય આરોપી ચૌહાણને પરીક્ષામાં હાજરી આપ્યા વિના SC/ST ક્વોટામાં સરકારી નોકરીઓ માટે ઉમેદવારો શોધવાનું કામ સોંપવામાં આવ્યું હતું. ત્રીજો આરોપી પટેલ સચિવાલયમાં ક્લાર્ક તરીકે પોતાની ઓળખ આપતો હતો અને ઉમેદવારોને નકલી નિમણૂક પત્રો વહેંચતો હતો. ચુડાસમા ઉમેદવારો પાસેથી રોકડમાં નાણાં સ્વીકારતો હતો અને સ્ટેમ્પ પેપર પર તેમની સહીઓ મેળવતો હતો જેમાં લખેલું હતું કે તે ઉમેદવારો પાસેથી રકમ ઉછીના લઈ રહ્યો છે અને તે વ્યાજ સાથે પરત કરશે.
પરંતુ જ્યારે ઉમેદવારોને સત્ય ખબર પડી જતી ત્યારે તે કહી દેતો કે ભાઈ તારી પાસે શું પુરાવા છે કે મે જ તને આ સરકારી નોકરીની લાલચે રૂપિયા પડાવી લીધા છે.
આ પણ વાંચો:
આ પણ વાંચો:
આ પણ વાંચો:
