જુગારની લતમાં ચડેલા વ્યક્તિને ફકત જુગાર રમવાની તક મળવી જોઈએ. જો તક મળી જાય તેવો ગમે ત્યાં જુગારની રમઝટ બોલાવી દેતા હોય છે.
પત્તાનો ખેલ એવો છે કે ક્યાં તો વ્યક્તિ નો ભોગ લે છે અથવા વ્યક્તિને બરબાદ કરી નાખે છે. ઇતિહાસ ગવાહ છે કે જુગારની પ્રવુતિ સાથે જોડાયા બાદ કોઈ પણ વ્યકિતનું ભલું થયું નથી.
તાજેતરની એક આવી જ ઘટના ગુજરાતમાં બની હતી. જેમાં પોલીસના દરોડામાં જુગારી ભાગવા જતાં તે કૂવામાં પડી ગયો હતો. જેના લીધે તેનું મોત નિપજ્યું હતું.
ચોટીલા પંથકમાં જુગાર રમતા શખસોને પકડવા ગયેલી પોલીસની ટીમ સામે ગંભીર આક્ષેપ કરવામાં આવ્યો છે. હકીકતમાં, નાની મોલડી પોલીસની એક ટીમ જુગારીઓને પકડવા ગઈ હતી. એ દરમિયાન ભાગવા જતા એક યુવક કૂવામાં પડી ગયો હતો અને તેનું મોત થઈ ગયું. મૃતકના પરિવારજનોનોએ પોલીસ પર આક્ષેપ કર્યો છે કે, સવારે 4 વાગ્યે યુવક કૂવામાં પડ્યો હતો અને પોલીસને જાણ હોવા છતાં તેને બહાર કાઢ્યો ન હતો અને છેક બપોરે તેની લાશ બહાર કાઢવામાં આવી હતી.
બનાવની વિગત મુજબ, ચોટીલાના ઢોકળવા ગામે જુગાર રમતા શખસોને પકડવા પોલીસે રવિવારની વહેલી સવારે 4 વાગ્યે દરોડો પાડ્યો હતો. પોલીસને જોઈને જુગારીઓમાં નાસભાગ મચી ગઈ હતી. આ દરમિયાન પોલીસથી બચવા ભાગેલો એક યુવક એક કૂવામાં પડી ગયો હતો. મૃતક યુવકના પરિવારજનોએ આક્ષેપ કર્યો છે કે, તે કૂવામાં પડી ગયો હોવાની જાણ હોવા છતાં પોલીસ બાકીના 7 જુગારીઓને પકડીને રવાના થઈ ગઈ હતી અને કૂવામાં પડેલા યુવકને બહાર કાઢ્યો ન હતો. આ યુવકની લાશ છેક બપોરે કૂવામાંથી બહાર કાઢવામાં આવી હતી.
યુવકની લાશ કૂવામાંથી બહાર કઢાયા બાદ ગામમાં કોઈ અનિચ્છનીય બનાવ ન બને તે માટે સમગ્ર જિલ્લાનો પોલીસ કાફલો પહોંચી ગયો હતો. મૃતક યુવાનના પરિવારજનોએ જવાબદાર પોલીસ કર્મીઓ સામે કાર્યવાહી ન કરવામાં આવે ત્યાં સુધી લાશ ન સ્વીકારવાની વાત કરતા સ્થિતિ તંગ બની જવા પામી હતી. બાદમાં સ્થાનિક રાજકારણીઓ અને ડીવાએસપી મુંધવાએ ન્યાયની ખાતરી આપ્યા બાદ પરિવારજનો માન્યા હતા અને બાદમાં લાશને પોસ્ટમોર્ટમ માટે લઈ જવામાં આવી હતી.
