Mehsana News: મહેસાણા જિલ્લાના વિસનગર તાલુકાના પુદગામ ગામ નજીક રૂપેણ નદી કિનારે આવેલા ચેકડેમમાં (Pudgam Check Dam) મોટી સંખ્યામાં માછલીઓ, કાચબાઓ અને અન્ય જળચર જીવોના મોતની ઘટના સામે આવતા વિસ્તારમાં ચકચાર મચી છે. ચેકડેમના પાણીમાં ઝેરી અથવા કેમિકલયુક્ત પાણી ભળ્યું (Water Pollution) હોવાના આક્ષેપો વચ્ચે સ્થાનિકોમાં ભારે ચિંતા અને રોષ જોવા મળી રહ્યો છે.
Pudgam Check Dam: ગટરનું ગંદુ કે કેમિકલયુક્ત પાણી ભળ્યાની આશંકા
સ્થાનિકોના આક્ષેપ મુજબ, કોઈ બેજવાબદાર તત્વો દ્વારા ચેકડેમમાં ગટરનું અત્યંત ગંદુ પાણી અથવા ફેક્ટરીઓનું કેમિકલયુક્ત પાણી ઠાલવવામાં આવ્યું હોવાની શંકા છે. પાણીની ગુણવત્તા બગડતાં મોટી સંખ્યામાં જળચર જીવોના મોત થયા હોવાનું સ્થાનિકોનું કહેવું છે. ચેકડેમમાં મૃત માછલીઓ(Dead Fish) , કાચબાઓ (Dead Turtles) અને અન્ય જળચર જીવો પાણીની સપાટી પર તરતા જોવા મળતાં પર્યાવરણને થયેલા નુકસાનને લઈને ગંભીર સવાલો ઊભા થયા છે. જોકે, પાણીના સેમ્પલની વૈજ્ઞાનિક તપાસ બાદ જ મોતનું ચોક્કસ કારણ સ્પષ્ટ થઈ શકશે.
દુર્ગંધથી સ્થાનિકો પરેશાન, પશુપાલકોમાં ચિંતા
મૃત જળચર જીવોના કારણે ચેકડેમ અને આસપાસના વિસ્તારમાં તીવ્ર દુર્ગંધ ફેલાઈ હોવાનું સ્થાનિકોએ જણાવ્યું છે. જેના કારણે આસપાસ રહેતા લોકો મુશ્કેલીમાં મુકાયા છે. બીજી તરફ, ચેકડેમનું પાણી દૂષિત હોવાની આશંકાને કારણે સ્થાનિક પશુપાલકોમાં પણ ચિંતા વધી છે. પશુઓ આ પાણી પીવાથી કોઈ અસર ન થાય તે માટે પશુપાલકો સાવચેતી રાખી રહ્યા છે.
GPCB અને તંત્ર પાસે તાત્કાલિક તપાસની માંગ
આ ઘટનાને લઈને સ્થાનિક લોકો અને પશુપાલકોએ તંત્ર તેમજ ગુજરાત પ્રદૂષણ નિયંત્રણ બોર્ડ (GPCB) પાસે ચેકડેમના પાણીના નમૂના લઈ તાત્કાલિક પરીક્ષણ કરવાની માંગ કરી છે. સ્થાનિકોની માંગ છે કે જો તપાસમાં ઝેરી રસાયણો અથવા ગેરકાયદેસર રીતે છોડવામાં આવેલા પ્રદૂષિત પાણીની પુષ્ટિ થાય તો જવાબદાર વ્યક્તિઓ કે સંસ્થાઓ સામે કડક કાયદાકીય કાર્યવાહી કરવામાં આવે.
પર્યાવરણ માટે ગંભીર ચેતવણીરૂપ ઘટના
હજારો જળચર જીવોના મોતની આ ઘટના માત્ર સ્થાનિક સમસ્યા નહીં પરંતુ જળ પ્રદૂષણ અને પર્યાવરણની સુરક્ષા અંગે ગંભીર ચેતવણીરૂપ બની છે. હવે તપાસમાં પાણીમાં પ્રદૂષણનું (Environmental Pollution) ચોક્કસ કારણ શું હતું અને તેની પાછળ કોણ જવાબદાર છે તે બહાર આવે તેની રાહ જોવાઈ રહી છે.
આ પણ વાંચો: અમદાવાદ અને બાવળામાં દારૂનો મોટો જથ્થો ઝડપાયો: બે અલગ કાર્યવાહીમાં 377 પેટી અને 7,164 બોટલ કબજે
આ પણ વાંચો: રાજ્યમાં ભેળસેળિયાઓ પર તંત્રનો મોટો પ્રહાર! સુરત-ડીસામાંથી રૂ.35 લાખથી વધુનો શંકાસ્પદ ઘી-તેલનો જથ્થો જપ્ત
આ પણ વાંચો: અમદાવાદમાં રૂ.23.52 લાખનો હાઇબ્રિડ ગાંજો ઝડપાયો, SOGએ યુવકને ઝડપી પાડ્યો
