IPL 2023 ના રોમાંચક મુકાબલામાં રાજસ્થાન રોયલ્સે ગુજરાત ટાઇટન્સને ત્રણ વિકેટે હરાવ્યું. પ્રથમ બેટિંગ કરતા ગુજરાત ટાઇટન્સે 20 ઓવરમાં 7 વિકેટ ગુમાવીને 177 રન બનાવ્યા હતા. જવાબમાં રાજસ્થાન રોયલ્સે ચાર બોલ બાકી રહેતા મેચ જીતી લીધી હતી. રાજસ્થાન રોયલ્સ તરફથી કેપ્ટન સંજુ સેમસને સૌથી વધુ 60 રન બનાવ્યા હતા. અને શિમરોન હેટમાયર 56 રન બનાવીને અણનમ રહ્યો હતો. ગુજરાત તરફથી મોહમ્મદ શમીએ સૌથી વધુ ત્રણ વિકેટ ઝડપી હતી. રાશિદને બે, હાર્દિક અને નૂરને 1-1 વિકેટ મળી હતી.
ગુજરાતના 178 રનના લક્ષ્યાંકનો પીછો કરવા ઉતરેલી રાજસ્થાન રોયલ્સની શરૂઆત ખરાબ રહી હતી. ટીમે ત્રણ ઓવરમાં જ બંને ઓપનરોની વિકેટ ગુમાવી દીધી હતી. યશસ્વી જયસ્વાલ બીજી ઓવરમાં એક રન બનાવીને આઉટ થયો હતો. આ પછી જોસ બટલર ત્રીજી ઓવરમાં ખાતું ખોલાવ્યા વગર જ પેવેલિયન પરત ફર્યો હતો. દેવદત્ત પડિકલ થોડો સમય ક્રિઝ પર રહ્યો અને 25 બોલમાં 26 રન બનાવીને આઉટ થયો. રિયાન પરાગ ફરી એકવાર સસ્તામાં પેવેલિયન પરત ફર્યો હતો. સંજુ સેમસને શિમરોન હેટમાયર સાથે પાંચમી વિકેટ માટે 50 થી વધુની ભાગીદારી કરી, ટીમને વિજયની નજીક પહોંચવામાં મદદ કરી. કેપ્ટન સંજુ સેમસન 32 બોલમાં 60 રન બનાવીને પેવેલિયન પરત ફર્યો હતો. સંજુએ પોતાની ઇનિંગમાં 6 સિક્સર અને 3 ફોર ફટકારી હતી. ધ્રુવ જુરેલ 18 રન બનાવી શક્યો હતો. આ પછી અશ્વિન તોફાની ઇનિંગ રમીને ત્રણ બોલમાં 10 રન બનાવીને પેવેલિયન પરત ફર્યો હતો. હેટમાયર એક છેડેથી બેટિંગ કરવાનું ચાલુ રાખ્યું અને છેલ્લી ઓવરમાં સિક્સ ફટકારીને ટીમને જીત તરફ લઈ ગયો
ડેવિડ મિલરના 46 અને શુભમન ગિલની 45 રનની ઇનિંગ બાદ પણ રાજસ્થાન રોયલ્સે રવિવારે ઈન્ડિયન પ્રીમિયર લીગ T20 મેચમાં ગુજરાત ટાઇટન્સને સાત વિકેટે 177 રન પર રોકી દીધી હતી. મિલરે તેની 30 બોલની ઇનિંગ્સમાં ત્રણ ચોગ્ગા અને બે છગ્ગા ફટકારીને છ રન પર મળેલી લાઇફલાઇનનો લાભ લીધો. ગિલે તેની 34 બોલની ઇનિંગ્સમાં ચાર ચોગ્ગા અને એક છગ્ગો મારવા ઉપરાંત ત્રીજી વિકેટ માટે કેપ્ટન હાર્દિક પંડ્યા સાથે 33 બોલમાં 59 રનની ભાગીદારી કરી હતી. પંડ્યાએ 19 બોલમાં ત્રણ ચોગ્ગા અને એક છગ્ગાની મદદથી 28 રન બનાવ્યા હતા.
છેલ્લી ઓવરમાં અભિનવ મનોહરે 13 બોલમાં ત્રણ છગ્ગાની મદદથી 27 રન ફટકારીને ટીમમાં પોતાની પસંદગીને યોગ્ય ઠેરવી હતી. તેણે મિલર સાથે પાંચમી વિકેટ માટે 22 બોલમાં 45 રનની ભાગીદારી કરી હતી. ટીમે છેલ્લી ચાર ઓવરમાં 52 રન ઉમેર્યા હતા. છેલ્લી મેચમાં ચેન્નાઈ સુપર કિંગ્સ સામે મહેન્દ્ર સિંહ ધોનીની સામે શાનદાર બોલિંગ કરનાર સંદીપ શર્માએ ફરી એકવાર પ્રભાવિત કરીને ચાર ઓવરમાં 25 રન આપીને બે વિકેટ ઝડપી હતી. ટ્રેન્ટ બોલ્ટ, એડમ ઝમ્પા અને યુઝવેન્દ્ર ચહલને એક-એક સફળતા મળી.
