Rajkot Rural Election Security: આવતીકાલે સમગ્ર ગુજરાતની સાથે રાજકોટ જિલ્લામાં પણ સ્થાનિક સ્વરાજ્યની ચૂંટણીનો જંગ જામશે. આ ચૂંટણી પ્રક્રિયા સંપૂર્ણપણે શાંતિપૂર્ણ અને ભયમુક્ત વાતાવરણમાં સંપન્ન થાય તે માટે રાજકોટ રેન્જ આઈજી નિર્લિપ્ત રાય અને જિલ્લા પોલીસ વડા વિજયસિંહ ગુર્જર દ્વારા અભેદ્ય સુરક્ષા કવચ તૈયાર કરવામાં આવ્યું છે. જિલ્લાના અતિ સંવેદનશીલ બુથો પર પોલીસની ખાસ નજર રહેશે.
Rajkot : સંવેદનશીલ બુથો પર વિશેષ સુરક્ષા
રાજકોટ જિલ્લામાં આવતીકાલે 647 બિલ્ડિંગના કુલ 1072 બુથ પર મતદાન યોજાશે, જેમાં પોલીસ તંત્ર દ્વારા ડેટાના આધારે સુરક્ષાનું ચોક્કસ વર્ગીકરણ કરવામાં આવ્યું છે. આ વર્ગીકરણ મુજબ, 81 બિલ્ડિંગના 165 બુથને અતિ સંવેદનશીલ જાહેર કરવામાં આવ્યા છે, જ્યારે 159 બિલ્ડિંગના 305 બુથને સંવેદનશીલ મથકો તરીકે ઓળખવામાં આવ્યા છે. આ તમામ મથકો પર સુરક્ષા જાળવવા માટે વધારાની ફોર્સ તૈનાત કરવામાં આવશે અને વિવિધ ટેકનોલોજીનો પણ વ્યાપક ઉપયોગ કરવામાં આવશે.
ડ્રોન અને બોડી વોર્ન કેમેરાથી સજ્જ પોલીસ
આ વખતની ચૂંટણી સુરક્ષામાં આધુનિક ટેકનોલોજીનો મહત્તમ ઉપયોગ કરવામાં આવ્યો છે, જેમાં 7 હાઈ-ટેક ડ્રોન દ્વારા આકાશી નજર રાખીને સંવેદનશીલ વિસ્તારોનું સતત મોનિટરિંગ કરવામાં આવશે. તેની સાથે જ 180 પોલીસ જવાનો બોડી વોર્ન કેમેરા સાથે બુથ પર તૈનાત રહેશે, જે દરેક ગતિવિધિનું જીવંત રેકોર્ડિંગ કરશે. કોઈપણ પરિસ્થિતિને પહોંચી વળવા માટે LCB, SOG અને QRTની 8 સ્પેશિયલ સ્ટ્રાઇકિંગ ફોર્સને સ્ટેન્ડબાય રાખવામાં આવી છે, જ્યારે 65 મોબાઈલ સેક્ટર વાન દ્વારા સતત રાઉન્ડ ધ ક્લોક પેટ્રોલિંગ પણ શરૂ કરી દેવાયું છે.
10 શખ્સો પાસા હેઠળ જેલભેગા
ચૂંટણી પહેલા શાંતિ જાળવવા માટે પોલીસે માથાભારે તત્વો સામે ‘લાલ આંખ’ કરી છે, જેના ભાગરૂપે 10 નામચીન શખ્સોને પાસા હેઠળ રાજ્યની અલગ-અલગ જેલોમાં ધકેલી દેવાયા છે. તદુપરાંત, 21 શખ્સોને જિલ્લામાંથી તડીપાર કરવામાં આવ્યા છે અને કાયદો તથા વ્યવસ્થા જળવાઈ રહે તે હેતુથી 8596 જેટલા શખ્સો સામે અટકાયતી કાર્યવાહી કરવામાં આવી છે.
સુરક્ષા સ્ટાફની વિગતો
ચૂંટણી જંગમાં કાયદો અને વ્યવસ્થા જાળવવા માટે કુલ 2616 પોલીસ કર્મચારીઓ ખડેપગે રહેશે, જેમાં 2 ASP અને 4 DYSP સ્તરના ઉચ્ચ અધિકારીઓ સહિત 29 PI અને 57 PSI તૈનાત કરવામાં આવ્યા છે. આ ઉપરાંત, સુરક્ષા વ્યવસ્થાને વધુ મજબૂત બનાવવા માટે 1154 પોલીસ કોન્સ્ટેબલ, 1292 હોમગાર્ડ અને 56 SRP જવાનોને પણ ફરજ પર લગાડવામાં આવ્યા છે.
જિલ્લા પોલીસ વડાએ નાગરિકોને નિર્ભય બનીને વધુમાં વધુ મતદાન કરવા અપીલ કરી છે. સોશિયલ મીડિયા પર પણ પોલીસની વિશેષ ટીમ બાજ નજર રાખી રહી છે જેથી કોઈ પણ અફવા ફેલાતી રોકી શકાય.
