Russia-Ukraine War : રશિયા-યુક્રેન યુદ્ધને સમાપ્ત કરવા માટે ભારત દ્વારા કરવામાં આવી રહેલા શાંતિ પ્રયાસોને રશિયાએ મજબૂત સમર્થન આપ્યું છે. રશિયાએ કહ્યું છે કે તે યુક્રેન સાથે યુદ્ધ રોકવા માટે વાતચીત કરવા તૈયાર છે, પરંતુ હવે આગળની પ્રક્રિયા માટે નિર્ણય યુક્રેનને લેવાનો છે. ભારતમાં રશિયાના રાજદૂત ડેનિસ અલીપોવે ભારતની ડાયલોગ અને ડિપ્લોમસીની નીતિની પ્રશંસા કરી છે.
Russiaએ મિન્સ્ક કરારનો પણ ઉલ્લેખ કર્યો
રશિયન રાજદૂત ડેનિસ અલીપોવે એક ઇન્ટરવ્યૂમાં જણાવ્યું હતું કે વિશ્વના વિવિધ સંઘર્ષોના ઉકેલ માટે ભારત હંમેશાં વાતચીત અને કૂટનીતિને પ્રાથમિકતા આપે છે. રશિયા પણ શાંતિ ઈચ્છે છે અને આ મુદ્દે બંને દેશોની સ્થિતિ ઘણી હદ સુધી સમાન હોવાનું તેમણે જણાવ્યું. અલીપોવે ભારતની શાંતિ પહેલને મહત્વપૂર્ણ ગણાવી છે.
અલીપોવે દાવો કર્યો કે રશિયા(Russia) લાંબા સમયથી સંઘર્ષોના ઉકેલ માટે વાતચીતના પક્ષમાં રહ્યું છે. તેમણે લગભગ એક દાયકા પહેલાં થયેલા મિન્સ્ક કરારનો ઉલ્લેખ કરીને કહ્યું કે તે સમયે પણ રશિયા શાંતિના પ્રયાસોમાં સામેલ હતું. જોકે, તેમણે કીવ અને યુરોપના કેટલાક દેશો પર આ પ્રક્રિયાને ગંભીરતાથી ન લેવાનો આરોપ લગાવ્યો હતો. તેમના જણાવ્યા મુજબ, રશિયાને પોતાની સુરક્ષા અંગે જોખમની લાગણી હતી.
જયશંકર-ઝેલેન્સ્કીની મુલાકાત બાદ ચર્ચા તેજ
આ દરમિયાન ભારતના વિદેશ મંત્રી ડૉ. એસ. જયશંકરે કીવમાં યુક્રેનના રાષ્ટ્રપતિ વોલોદિમિર ઝેલેન્સ્કી સાથે મુલાકાત કરી હતી. બંને નેતાઓ વચ્ચે રશિયા-યુક્રેન યુદ્ધ સહિત અનેક મુદ્દાઓ પર ચર્ચા થઈ હતી. યુક્રેન તરફથી પણ યુદ્ધ સમાપ્ત કરવા માટે ભારતની ભૂમિકા અને શાંતિ પ્રયાસોની પ્રશંસા કરવામાં આવી છે.
રશિયન રાજદૂતે કહ્યું કે રશિયા(Russia) વાતચીત માટે તૈયાર છે, પરંતુ યુક્રેન અને તેના સમર્થકો તરફથી પણ સંવાદ માટે તૈયારીઓ જરૂરી છે. તેમણે કાળા સમુદ્ર સહિતના વિસ્તારોમાં થયેલા હુમલાઓનો ઉલ્લેખ કરીને ભારતીય નાગરિકો અને નાવિકોને થયેલા નુકસાન અંગે પણ ચિંતા વ્યક્ત કરી હતી. તેમના મતે, કીવને વાતચીતના ટેબલ પર લાવવા માટે આંતરરાષ્ટ્રીય સ્તરે પ્રયાસો જરૂરી છે.
PM મોદીની પહેલથી શાંતિની આશા
SCO શિખર સંમેલનમાં વડાપ્રધાન નરેન્દ્ર મોદીએ(PM Modi) વિશ્વના વિવિધ સંઘર્ષોનો ઉકેલ વાતચીત અને કૂટનીતિ દ્વારા લાવવાની અપીલ કરી હતી. ભારત સતત બંને પક્ષોને સંવાદ અને શાંતિ તરફ આગળ વધવા માટે પ્રોત્સાહિત કરી રહ્યું છે. હવે રશિયા તરફથી ભારતની પહેલને મળેલા સમર્થનથી યુદ્ધ સમાપ્ત કરવાના રાજદ્વારી પ્રયાસોને નવી દિશા મળવાની આશા વ્યક્ત થઈ રહી છે.
રશિયા(Russia) અને યુક્રેન વચ્ચે ફેબ્રુઆરી 2022થી યુદ્ધ ચાલી રહ્યું છે. સાડા ચાર વર્ષથી વધુ સમય વીતી ગયા છતાં સંઘર્ષનો કોઈ કાયમી ઉકેલ આવ્યો નથી. બંને દેશો વચ્ચે સતત સૈન્ય કાર્યવાહી ચાલી રહી છે અને વિશ્વના અનેક દેશો યુદ્ધનો અંત લાવવા માટે રાજદ્વારી પ્રયાસો કરી રહ્યા છે.
આ પણ વાંચો: નેપાળમાં પૂરની તબાહી વચ્ચે તિબેટમાં 5.0નો ભૂકંપ, લાપતા લોકોની આશા ધૂંધળી
આ પણ વાંચો:વિનાશક પૂર-ભૂસ્ખલનથી નેપાળમાં તારાજી, 1200થી વધુનાં મોત અને 4000થી વધુ લાપતા
આ પણ વાંચો: ઓપરેશન સિંદૂર બાદ તૂર્કિયેનો બદલાયો સૂર, ભારત સાથે સંબંધો સુધારવા તૈયાર!
