Russia Ukraine War 2026: રશિયા અને યુક્રેન વચ્ચે ચાલી રહેલા યુદ્ધે હવે ભયાનક સ્વરૂપ ધારણ કર્યું છે. 7 ફેબ્રુઆરી, 2026ની મધ્યરાત્રિએ રશિયાએ યુક્રેનના ઉર્જા માળખા (Energy Infrastructure) પર એકસાથે અનેક પ્રહારો કર્યા છે. આ હુમલાને કારણે યુક્રેનની વીજ વ્યવસ્થા ખોરવાઈ ગઈ છે અને સરકારને દેશભરમાં ઇમરજન્સી પાવર કટ જાહેર કરવાની ફરજ પડી છે.
400 ડ્રોન અને 40 મિસાઈલનો મારો
યુક્રેનના રાષ્ટ્રપતિ વોલોદિમિર ઝેલેન્સ્કીએ આ હુમલાની પુષ્ટિ કરતા જણાવ્યું છે કે, રશિયન સેનાએ એક જ રાતમાં 400થી વધુ ડ્રોન અને 40 જેટલી મિસાઈલો છોડી છે. આ હુમલાનો મુખ્ય હેતુ યુક્રેનના પાવર ગ્રીડ, પાવર સ્ટેશનો અને સબસ્ટેશનોને નષ્ટ કરવાનો હતો, જેથી કડકડતી ઠંડીમાં લોકોને વીજળી વગર રહેવું પડે.
Russia Ukraine War: કયા શહેરોમાં સૌથી વધુ નુકસાન થયું?
રશિયાના આ ભીષણ હવાઈ હુમલાની અસર અનેક પ્રદેશોમાં જોવા મળી છે, જેમાં વોલિન અને લ્વીવમાં એનર્જી ઇન્ફ્રાસ્ટ્રક્ચરને વ્યાપક નુકસાન પહોંચ્યું છે. આ હુમલા દરમિયાન રિવને વિસ્તારમાં એક રહેણાંક એપાર્ટમેન્ટ બિલ્ડિંગ પણ ઝપેટમાં આવી છે, જ્યારે વિનિત્સિયાના લેડીઝિન વિસ્તારમાં આવેલી એક એગ્રીકલ્ચરલ કોલેજની વહીવટી ઇમારતને ડ્રોન વડે નિશાન બનાવવામાં આવી છે. કિવ અને ખાર્કિવ જેવા મોટા શહેરોમાં પણ હુમલાને રોકવા માટે એર ડિફેન્સ સિસ્ટમ સતત કાર્યરત રહી હતી.
Wherever the security situation allows, rescue and repair operations continue at the sites of Russian strikes. Last night’s attack involved more than 400 drones and around 40 missiles of various types. The main targets were the energy grid, generation facilities, and distribution… pic.twitter.com/KrFE60Q0xy
— Volodymyr Zelenskyy / Володимир Зеленський (@ZelenskyyUa) February 7, 2026
‘હિંસાનો રસ્તો પસંદ કર્યો’
રાષ્ટ્રપતિ ઝેલેન્સ્કીએ સોશિયલ મીડિયા ‘X’ પર પોતાની વેદના ઠાલવતા કહ્યું કે, “રશિયા પાસે શાંતિપૂર્ણ મંત્રણાનો વિકલ્પ હતો, પરંતુ તેણે ફરી એકવાર હિંસાનો માર્ગ અપનાવ્યો છે.” તેમણે વૈશ્વિક નેતાઓને અપીલ કરી છે કે રશિયાની આ હિંસા સામે અવાજ ઉઠાવવામાં આવે.
વૈશ્વિક મદદની આજીજી
યુક્રેને મિત્ર દેશો પાસે અદ્યતન એર ડિફેન્સ સિસ્ટમ જેવી કે Patriot (પેટ્રિયોટ) અને NASAMS માટે વધુ મિસાઈલોની માંગ કરી છે. યુક્રેનનું માનવું છે કે મોસ્કો આ શિયાળાની ઠંડીને એક હથિયાર તરીકે વાપરી રહ્યું છે, જેથી સામાન્ય નાગરિકોને મુશ્કેલીમાં મુકી શકાય.
