Surat News: સુરતના નાસીરનગર વિસ્તારમાં થયેલા વિવાદિત ડિમોલિશન કેસ (Nasirnagar Demolition)ની સુનાવણી દરમિયાન ગુજરાત હાઈકોર્ટે (Gujarat High Court) રાજ્ય સરકાર, સુરત મહાનગરપાલિકા (SMC) અને સુરત પોલીસની કામગીરી અંગે ગંભીર સવાલો ઉઠાવ્યા છે. કોર્ટે ખાસ કરીને FIR નોંધવામાં થયેલા વિલંબ, તપાસની ગતિ અને રાજ્ય સરકારની ભૂમિકા અંગે કડક ટિપ્પણીઓ કરી હતી.
“રાજ્ય સરકાર કેમ સક્રિય નથી?”
સુનાવણી દરમિયાન હાઈકોર્ટે ડિમોલિશન (Nasirnagar Demolition)ની તપાસ માટે રચાયેલી ડેપ્યુટી કમિશનરની અધ્યક્ષતાવાળી તપાસ સમિતિ અંગે પણ સવાલ ઉઠાવ્યો. કોર્ટે પૂછ્યું કે આટલા ગંભીર મામલામાં રાજ્ય સરકાર કેમ સક્રિય નથી અને માત્ર સ્થાનિક અધિકારીઓ પર જ જવાબદારી કેમ મૂકવામાં આવી છે. કોર્ટે એવી પણ ટિપ્પણી કરી કે તપાસ સમિતિનો અહેવાલ મામલો દબાવવાનો પ્રયાસ હોવાનું પ્રથમ દ્રષ્ટિએ જણાય છે.
FIRમાં વિલંબ પર કોર્ટ નારાજ
હાઈકોર્ટે પોલીસને પૂછ્યું કે ઘટનાને એક મહિનાથી વધુ સમય વીતી ગયો હોવા છતાં હજુ સુધી FIR કેમ નોંધવામાં આવી નથી. કોર્ટે જણાવ્યું કે માત્ર તપાસ ચાલુ હોવાની દલીલ પૂરતી નથી. જો કોઈનું ઘર તોડી પાડવામાં આવ્યું હોય તો તે ફોજદારી ગુનો બની શકે છે અને તેની ગંભીરતાથી તપાસ થવી જોઈએ.
“પ્રથમદર્શી ગેરકાયદે ડિમોલિશન”
સુનાવણી દરમિયાન કોર્ટે પ્રાથમિક અવલોકનમાં જણાવ્યું કે આ ઘટના પ્રથમદર્શી રીતે ગેરકાયદે ડિમોલિશન (Nasirnagar Demolition) હોવાનું જણાય છે. સાથે જ કોર્ટે અરજદારોને દબાણકર્તા ગણાવવાનું યોગ્ય નથી હોવાનું જણાવ્યું અને અસરગ્રસ્ત લોકોને મૂળ સ્થળે અથવા અન્ય યોગ્ય સ્થળે પુનર્વસન માટે યોજના રજૂ કરવાની સૂચના આપી.
Nasirnagar Demolition: કોણે અરજી કરી?
આ મામલે કુલ 26 અરજદારોએ ગુજરાત હાઈકોર્ટમાં અરજી દાખલ કરી છે. અરજીમાં રાજ્ય સરકાર, સુરત મહાનગરપાલિકા, સુરત પોલીસ કમિશનર, SOGના DCP, સંબંધિત બિલ્ડર, પોલીસ અધિકારીઓ, SMCના કર્મચારીઓ તેમજ ટોરેન્ટ પાવરને પક્ષકાર બનાવવામાં આવ્યા છે.
સરકાર તરફથી કોર્ટમાં શું રજૂઆત?
અગાઉની સુનાવણી દરમિયાન સરકારી વકીલે કોર્ટને જણાવ્યું હતું કે પોલીસ સમક્ષ રજૂઆત 1 જૂને નહીં પરંતુ 10 જૂને કરવામાં આવી હતી. અરજી પહેલા સુરત પોલીસ જનરલ રજિસ્ટ્રીમાં નોંધાઈ હતી, ત્યારબાદ DCP ઝોન-3 અને પછી PI ચોકબજાર પોલીસ સ્ટેશનને મોકલવામાં આવી હતી. રાજ્ય પક્ષે કોર્ટને માહિતી આપી હતી કે તપાસ ચાલુ છે અને અત્યાર સુધીમાં 10થી વધુ પોલીસ કર્મચારીઓના નિવેદનો નોંધવામાં આવ્યા છે.
આગામી સુનાવણી પર નજર
હાઈકોર્ટની કડક ટિપ્પણીઓ બાદ હવે રાજ્ય સરકાર, પોલીસ અને સંબંધિત તંત્ર આગામી સુનાવણીમાં શું જવાબ આપે છે અને અસરગ્રસ્તોના પુનર્વસન અંગે શું યોજના રજૂ કરે છે તેના પર સૌની નજર રહેશે.
આ પણ વાંચો:સુરત નાસીરનગર ડિમોલિશન કેસમાં મોટી કાર્યવાહી: 5 એન્જિનિયર સસ્પેન્ડ, ખાતાકીય તપાસ શરૂ
આ પણ વાંચો:નાસીરનગર મુદ્દે ભાજપમાં ગરમાવો, ભાજપ નેતાની પોસ્ટથી વિવાદ
