Sports News : વડોદરામાં ભારત અને ન્યુઝીલેન્ડ વચ્ચે રમાઈ રહેલી પ્રથમ વન-ડે મેચમાં ટોસ થતાની સાથે જ હોબાળો મચી ગયો છે. જ્યારે કેપ્ટન શુભમન ગિલે પ્લેઈંગ-11 નું લિસ્ટ જાહેર કર્યું, ત્યારે તેમાં સ્ટાર ડાબોડી બોલર અર્શદીપ સિંહ (Arshdeep Singh) નું નામ ન હતું.
શાનદાર ફોર્મમાં હોવા છતાં અર્શદીપ (Arshdeep) ને બહાર બેસાડીને હર્ષિત રાણા અને પ્રસિદ્ધ ક્રિષ્નાને તક આપવામાં આવતા સોશિયલ મીડિયા પર ક્રિકેટ ચાહકોએ હેડ કોચ ગૌતમ ગંભીર (Gautam Gambhir) ને આડે હાથ લીધા છે અને તેમના પર ખુલ્લેઆમ ‘પક્ષપાત’ કરવાનો આરોપ લગાવ્યો છે.
અર્શદીપ (Arshdeep)નું પ્રદર્શન vs અન્ય બોલરો
ચાહકોનો ગુસ્સો વ્યાજબી છે કારણ કે આંકડા અર્શદીપના પક્ષમાં છે.
અર્શદીપ સિંહ: સાઉથ આફ્રિકા સામેની છેલ્લી સિરીઝમાં અર્શદીપ (Arshdeep) સૌથી વધુ કિફાયતી બોલર રહ્યો હતો. તેણે 5.50 ની ઈકોનોમીથી 5 વિકેટ લીધી હતી.
હર્ષિત રાણા: આ જ સિરીઝમાં હર્ષિતે 4 વિકેટ લીધી હતી પણ તેની ઈકોનોમી 6.39 રહી હતી.
પ્રસિદ્ધ ક્રિષ્ના: તેણે સૌથી વધુ રન આપ્યા હતા. 7 વિકેટ લીધી હોવા છતાં તેની ઈકોનોમી 7.80 ની ઊંચી રહી હતી. આ ઉપરાંત, વિજય હઝારે ટ્રોફીમાં પણ અર્શદીપે સિક્કિમ સામે 5 વિકેટ ઝડપીને પોતાની ફિટનેસ અને ફોર્મ સાબિત કરી દીધું હતું. તેમ છતાં તેને બહાર રાખવો કોઈને ગળે ઉતરતું નથી.
ગૌતમ પર કેમ ઉઠ્યા ગંભીર સવાલો?
સોશિયલ મીડિયા પર ફેન્સ આને ‘ખુલ્લેઆમ પક્ષપાત’ ગણાવી રહ્યા છે.
બેટિંગનો તર્ક: એવું કહેવામાં આવી રહ્યું છે કે હર્ષિત રાણા લોઅર ઓર્ડરમાં થોડી બેટિંગ કરી શકે છે, તેથી તેને અર્શદીપ પર પસંદગી આપવામાં આવી છે.
બોલિંગ ડિસિપ્લિન: પરંતુ ક્રિકેટ એક્સપર્ટ્સનું માનવું છે કે અર્શદીપ (Arshdeep) નવી બોલ સાથે જે શિસ્ત (Discipline) અને સ્વિંગ લાવે છે, તેની તુલનામાં બેટિંગની ક્ષમતા ગૌણ હોવી જોઈએ.
KKR કનેક્શન? ઘણા ફેન્સ ઈશારામાં કહી રહ્યા છે કે ગૌતમ ગંભીર પોતાના માનીતા ખેલાડીઓને (જેમ કે હર્ષિત રાણા) વધારે તક આપી રહ્યા છે.
અર્શદીપના ભવિષ્ય પર પ્રશ્નાર્થ?
અર્શદીપ સિંહ (Arshdeep) છેલ્લા કેટલાક વર્ષોથી વ્હાઈટ બોલ ક્રિકેટમાં ભારતનો ભરોસાપાત્ર બોલર રહ્યો છે. 2027 ના વર્લ્ડ કપની તૈયારીઓ ચાલી રહી છે ત્યારે અર્શદીપ (Arshdeep) જેવા મેચ વિનરને સતત અંદર-બહાર કરવાથી તેનો આત્મવિશ્વાસ ડગી શકે છે. શું ભારતીય ટીમ મેનેજમેન્ટની યોજનામાં અર્શદીપ (Arshdeep) ફિટ નથી બેસતો? આ એક મોટો સવાલ છે.
બંને ટીમોની પ્લેઈંગ-11:
ભારત (India): શુભમન ગિલ (કેપ્ટન), રોહિત શર્મા, વિરાટ કોહલી, શ્રેયસ અય્યર, કે.એલ. રાહુલ (વિકેટકીપર), વોશિંગ્ટન સુંદર, રવિન્દ્ર જાડેજા, હર્ષિત રાણા, કુલદીપ યાદવ, પ્રસિદ્ધ ક્રિષ્ના અને મોહમ્મદ સિરાજ.
ન્યુઝીલેન્ડ (New Zealand): ડેવોન કોન્વે, હેનરી નિકોલ્સ, વિલ યંગ, ડેરિલ મિચેલ, ગ્લેન ફિલિપ્સ, મિચેલ હે (વિકેટકીપર), માઈકલ બ્રેસવેલ (કેપ્ટન), ઝાકરી ફાઉલકેસ, ક્રિશ્ચિયન ક્લાર્ક, કાઈલ જેમિસન અને આદિત્ય અશોક.
