મુંબઈની એક કોર્ટે ‘સેલમોન ભાઈ’ નામની ઓનલાઈન મોબાઈલ ગેમ પર અસ્થાયી ધોરણે પ્રતિબંધ લગાવ્યો છે. આ રમત કથિત રીતે ‘હિટ એન્ડ રન’ની એક ઘટના પર આધારિત છે જેમાં બોલિવૂડ અભિનેતા સલમાન ખાન સામેલ હતા. જજ કે.એમ. જયસ્વાલે સોમવારે આદેશ જારી કર્યો હતો, જેની કોપી મંગળવારે મળી હતી.
કોર્ટે રમત નિર્માતા પેરોડી સ્ટુડિયો પ્રાઇવેટ લિમિટેડ અને તેના નિર્દેશકોને રમત અને કોર્ટ સાથે સંબંધિત કોઈપણ સામગ્રીના પ્રસાર, લોન્ચિંગ અથવા ફરીથી લોન્ચિંગ અને પુનઉત્પાદન પર રોક લગાવી છે. કોર્ટે રમતના નિર્માતાઓને ગૂગલ પ્લે સ્ટોર અને અન્ય પ્લેટફોર્મ પરથી રમતને તાત્કાલિક દૂર કરવાનો નિર્દેશ પણ આપ્યો છે.
કોર્ટે કહ્યું, “પ્રથમ નજરે, રમત અને તેની તસવીરો જોઈને એવું લાગે છે કે તે સલમાન ખાનની ઓળખ સાથે મેળ ખાય છે અને તે હિટ એન્ડ રન કેસ સાથે સંબંધિત છે.” કોર્ટે કહ્યું કે સલમાન ખાને ક્યારેય આ રમત માટે પોતાની સંમતિ આપી નથી. કોર્ટના આદેશ બાદ લાગે છે કે રમતના નિર્માતાઓ પર તલવાર લટકેલી છે
કોર્ટના આદેશમાં કહેવામાં આવ્યું છે કે, “જ્યારે સલમાન ખાને આ રમતના નિર્માણ માટે પોતાની સંમતિ આપી નથી, જે તેમની ઓળખ અને તેની સામેના કેસ સાથે ખૂબ સમાન છે, ત્યારે તેમના અંગત અધિકારનું ચોક્કસપણે ઉલ્લંઘન થયું છે.” તેની છબીને પણ નુકસાન થયું છે.
કોર્ટે કહ્યું કે રમતના નિર્માતાઓએ આર્થિક લાભ માટે સલમાન ખાનની ઓળખ અને લોકપ્રિયતાનો ઉપયોગ કર્યો છે. ગત મહિને દબંગ ખાને રમત નિર્માતાઓ વિરુદ્ધ અરજી કરી હતી. અરજીમાં કહેવામાં આવ્યું હતું કે ‘સલમોન ભાઈ’ નો ઉચ્ચાર તેમના નામ ‘સલમાન ભાઈ’ જેવો જ છે જે ખાનના ચાહકોમાં લોકપ્રિય છે.
