National News: તાજેતરમાં સંત રામપાલ (Sant Rampal Controversy) દ્વારા કરવામાં આવેલા કેટલાક નિવેદનોને લઈને દેશભરમાં ચર્ચા અને વિવાદનો માહોલ સર્જાયો છે. અયોધ્યાના શ્રી રામ મંદિર (Ram Mandir) સાથે જોડાયેલા પ્રસાદ વિતરણના મુદ્દાનો ઉલ્લેખ કરતાં તેમણે મૂર્તિપૂજા અને પ્રાણ પ્રતિષ્ઠા અંગે પ્રશ્નો ઉઠાવ્યા હતા. તેમના આ નિવેદનોના વીડિયો સોશિયલ મીડિયા પર વાયરલ થતાં ધાર્મિક અને રાજકીય વર્તુળોમાં વિવિધ પ્રકારની પ્રતિક્રિયાઓ જોવા મળી રહી છે.

શું કહ્યું સંત રામપાલે?

“આપણા ધાર્મિક નેતાઓ લાંબા સમયથી આપણને મૂર્ખ બનાવતા આવ્યા છે. તેઓ મૂર્તિમાં જીવન રેડવાનો દાવો કરે છે. પ્રાણ પ્રતિષ્ઠા કરે છે.અને દાવો કરે છે કે મૂર્તિ હવે દેવતાના કાર્યો કરશે. તો શ્રી રામ ત્યાં હાજર હતા, અને ખરેખર મૂર્તિમાં પ્રાણ પ્રતિષ્ઠા કરવામાં આવ્યું હોત. તેમણે પોતાના હાથમાં ધનુષ્ય અને તીર પણ રાખ્યું હતું, તેમણે એક જ તીરથી રાવણનો વધ કર્યો હતો. જો મૂર્તિમાં ખરેખર જીવ હોત, તો ચોરી (Ram Mandir Prasad Theft) ક્યારેય ન થઈ હોત. આ સાબિત કરે છે કે તેઓ લોકોને છેતરે છે. શિક્ષિત હોવા છતાં, લોકો હજુ પણ તેમનું પાલન કરે છે.”

Sant Rampal Controversy: ધાર્મિક નેતાઓ અંગે પણ કરી ટીકા

પ્રવચન દરમિયાન સંત રામપાલે પ્રેમાનંદ મહારાજ, ધીરેન્દ્ર કૃષ્ણ શાસ્ત્રી સહિત કેટલાક જાણીતા ધાર્મિક વક્તાઓ અને સંતો અંગે પણ ટીકાત્મક ટિપ્પણીઓ કરી હતી. તેમણે આરોપ મૂક્યો કે કેટલાક ધાર્મિક નેતાઓ લોકોની આસ્થા સાથે જોડાયેલા મુદ્દાઓને લઈને ભ્રમ ફેલાવે છે. આ ટિપ્પણીઓ બાદ અનેક ધાર્મિક અનુયાયીઓમાં અસંતોષ જોવા મળ્યો છે. જોકે, સંબંધિત ધાર્મિક નેતાઓ તરફથી આ મુદ્દે કોઈ સત્તાવાર નિવેદન જાહેર થયું નથી.

વીડિયો સોશિયલ મીડિયા પર થયો વાયરલ

સંત રામપાલના સત્તાવાર સોશિયલ મીડિયા (Sant Rampal Controversy) પ્લેટફોર્મ પર આ પ્રવચનનો વીડિયો શેર કરવામાં આવ્યો હતો. થોડા જ સમયમાં વીડિયો લાખો લોકો સુધી પહોંચ્યો અને તેના આધારે અનેક ચર્ચાઓ શરૂ થઈ. સોશિયલ મીડિયા પર કેટલાક લોકોએ નિવેદનોની ટીકા કરી તો કેટલાકે સમર્થન પણ વ્યક્ત કર્યું.

રામ મંદિરના પ્રસાદ મુદ્દે શું છે સમગ્ર મામલો?

અયોધ્યાના રામ મંદિર સાથે જોડાયેલા પ્રસાદ વિતરણને લઈને અગાઉ કેટલાક રાજકીય નેતાઓ અને અન્ય વ્યક્તિઓ દ્વારા ગેરરીતિના આક્ષેપો કરવામાં આવ્યા હતા. આ મુદ્દે તપાસની માંગ પણ ઉઠી હતી. જોકે, સંબંધિત અધિકારીઓ તરફથી સમયાંતરે પ્રક્રિયા ચાલુ હોવાનું જણાવાયું છે. સંત રામપાલે પોતાના નિવેદનમાં આ જ ચર્ચાનો ઉલ્લેખ કરીને મૂર્તિપૂજા અને પ્રાણ પ્રતિષ્ઠા અંગે સવાલો ઉઠાવ્યા હતા, જેના કારણે વિવાદ વધુ ઊંડો બન્યો છે.

સંત રામપાલનો વિવાદો સાથેનો ઈતિહાસ

સંત રામપાલ અગાઉ પણ અનેક કાનૂની કેસોને (Religious Controversy) કારણે ચર્ચામાં રહ્યા છે. વર્ષ 2006માં હરિયાણાના કરોઠા આશ્રમમાં થયેલી હિંસક અથડામણ બાદ તેમની સામે કેસ નોંધાયો હતો. ત્યારબાદ 2014માં હિસાર જિલ્લાના બરવાલા સ્થિત સતલોક આશ્રમમાં પોલીસ કાર્યવાહી દરમિયાન પણ ગંભીર વિવાદ સર્જાયો હતો.આ બંને કેસોમાં તેમની સામે હત્યા, રાજદ્રોહ અને અન્ય ગંભીર કલમો હેઠળ કાર્યવાહી થઈ હતી. બાદમાં કોર્ટની વિવિધ કાર્યવાહી દરમિયાન તેમને અલગ-અલગ કેસોમાં રાહત અને જામીન મળ્યા હતા. 2026માં તેઓ લાંબા સમય બાદ જેલમાંથી બહાર આવ્યા અને ત્યારથી સોનીપત જિલ્લાના ધનાના સ્થિત સતલોક આશ્રમમાં રહે છે.

વિવિધ વર્ગોમાં ચર્ચા તેજ

સંત રામપાલના તાજેતરના નિવેદનો (Sant Rampal Controversy) બાદ ધાર્મિક અને રાજકીય વર્તુળોમાં ચર્ચા વધુ તેજ બની છે. કેટલાક લોકોનું માનવું છે કે ધાર્મિક આસ્થા સાથે જોડાયેલા વિષયો પર જાહેર નિવેદન આપતી વખતે જવાબદારી રાખવી જરૂરી છે, જ્યારે અન્ય લોકો તેને વ્યક્તિગત અભિપ્રાય તરીકે પણ જોઈ રહ્યા છે.આ સમગ્ર મામલે આગળ કોઈ કાનૂની કાર્યવાહી થાય છે કે સંબંધિત પક્ષો તરફથી વધુ સ્પષ્ટતા આવે છે કે નહીં, તેના પર સૌની નજર છે.

આ પણ વાંચો: ‘શ્રીકૃષ્ણ મુસ્લિમ હતા’ના દાવાથી વિવાદ, મૌલાના જરજિસ અન્સારીના નિવેદન પર ઉઠ્યો વિરોધ

આ પણ વાંચો: અયોધ્યાના રામ મંદિરના દાન મામલે સુપ્રીમ કોર્ટમાં આજે મહત્વપૂર્ણ સુનાવણી, SIT તપાસમાં ચોંકાવનારા ખુલાસા

આ પણ વાંચો: અયોધ્યામાં નવો વિવાદ! રૂપિયા. 5 કરોડની 147 કિલોની રામચરિતમાનસ ગુમ હોવાનો દાવો