- અમેરિકા સાઉદી અરેબિયા સાથેના સંબંધોની સમીક્ષા કરશે
- ઓપેકને ઓઇલના ઉત્પાદનમાં કાપ મૂકવો ભારે પડશે
- અમેરિકાના સાઉદી સામેના આગામી પગલા પર બધાની નજર
સાઉદી અરેબિયાની આગેવાની હેઠળના ઓઇલ ઉત્પાદક સંગઠન ઓપેકે અમેરિકાના વિરોધ વચ્ચે પણ ઉત્પાદનમાં કાપ મૂકીને રશિયાને સમર્થન આપતા બાઇડેન લાલઘૂમ થયા છે. બાઇડેને જણાવ્યું હતું કે સાઉદી અરેબિયાએ તેના ગંભીર પરિણામોનો સામનો કરવો પડશે. તેના પગલે ડેમોક્રેટ્સના સેનેટરો હવે અમેરિકાનો સાઉદી અરેબિયા સાથે બધા મોરચે સહયોગ રોકવાની હાકલ કરી રહ્યા છે. બાઇડેનના વહીવટીતંત્રએ જણાવ્યું છે કે તેઓ હવે સાઉદી અરેબિયા સાથેના સંબંધોની પુનઃ સમીક્ષા કરી રહ્યા છે.
રશિયા પણ ઓપેક પ્લસનું સભ્ય છે. માનવામાં આવે છે કે તેલ ઉત્પાદનમાં કાપ મુકવાથી રશિયાને ફાયદો થશે અને યુક્રેનના યુદ્ધ માટે ભંડોળ મળશે. બાઇડેને સીએનએનને આપેલા ઈન્ટરવ્યુમાં કહ્યું, ‘સાઉદીએ રશિયા સાથે જે કર્યું છે તેના વિપરીત પરિણામો આવશે. હું શું કરીશ અથવા મારા મગજમાં શું છે, હું તેને કહેવાનો નથી, પરંતુ તેના ગંભીર પરિણામો આવશે.’ બાઇડેને કહ્યું કે તેઓ આગળના પગલાઓ માટે કોંગ્રેસ સાથે પરામર્શ કરશે. તેમણે ડેમોક્રેટિક સેનેટરોના સાઉદીને શસ્ત્રોનું વેચાણ બંધ કરવાના કોલને સમર્થન આપ્યું ન હતું.
હવે સૌથી મોટો પ્રશ્ન એ છે કે રાષ્ટ્રપતિ બાઇડેન મધ્ય પૂર્વમાં મહત્વપૂર્ણ સાથી સાઉદી પ્રત્યે તેમની નારાજગી કેવી રીતે દર્શાવશે. રાષ્ટ્રપતિ બનતા પહેલા, બાઇડેને માનવાધિકારની સ્થિતિ પર સાઉદી અરેબિયા સાથેના અમેરિકાના સંબંધોને ફરીથી તપાસવાની પ્રતિજ્ઞા લીધી હતી. પરંતુ તે પછી આ વર્ષની શરૂઆતમાં તેણે સાઉદી અરેબિયાની પણ મુલાકાત લીધી હતી. વ્હાઇટ હાઉસની રાષ્ટ્રીય સુરક્ષા પરિષદના પ્રવક્તા જ્હોન કિર્બીએ જણાવ્યું હતું કે બાઇડેન માને છે કે સંબંધો પર પુનર્વિચાર કરવાની જરૂર છે અને શું તે આપણા રાષ્ટ્રીય હિતોના શ્રેષ્ઠ હિતમાં છે.
ઓપેક પ્લસે ગયા અઠવાડિયે જાહેરાત કરી હતી કે તે પ્રતિ દિન 20 લાખ બેરલ ક્રૂડ ઓઈલ ઉત્પાદનમાં ઘટાડશે. તેનો ધ્યેય તેલની કિંમતો વધારવાનો છે. યુદ્ધ દરમિયાન રશિયાને આર્થિક રીતે અસ્થિર કરવાના અમેરિકાના પ્રયાસને પણ ઉત્પાદન કાપનો સામનો કરવો પડ્યો છે. આટલું જ નહીં, અમેરિકામાં મધ્યસત્ર ચૂંટણી દરમિયાન કાપ મૂકવામાં આવ્યો છે, જે બાઇડેનને નુકસાન પહોંચાડશે તેવું માનવામાં આવે છે.
