Surat Bangkok Flight Cancelled: ડાયમંડ સિટી અને ટેક્સટાઇલ હબ તરીકે ઓળખાતા સુરત શહેરના આંતરરાષ્ટ્રીય ઉડ્ડયન ક્ષેત્ર (Aviation Sector) માટે અત્યંત ચિંતાજનક અને માઠા સમાચાર સામે આવ્યા છે. સુરત એરપોર્ટ પરથી વિદેશ ઉડાન ભરવાનું સુરતીઓનું સપનું ફરી એકવાર રોળાયું છે. અગાઉ દુબઈ અને શારજાહની ફ્લાઈટ્સ બંધ થયા બાદ, હવે એર ઈન્ડિયા એક્સપ્રેસ દ્વારા સુરતથી બેંગકોક જતી સીધી ફ્લાઈટ પણ કાયમી ધોરણે બંધ કરવાનો આકરો નિર્ણય લેવામાં આવ્યો છે.
નફાના અભાવે 1 જુલાઈથી બુકિંગ સત્તાવાર રીતે બંધ
કોઈપણ વ્યવસાયિક એરલાઇન કંપની માટે આર્થિક સધ્ધરતા અને નફો સૌથી મહત્વનું પાસું હોય છે. પ્રાપ્ત માહિતી અનુસાર, સુરત-બેંગકોક રૂટ એર ઈન્ડિયા એક્સપ્રેસ માટે અપેક્ષા મુજબ નફાકારક સાબિત થઈ શક્યો નથી. નફાના અભાવે જ એરલાઇન મેનેજમેન્ટે આ રૂટ પરથી પોતાની સેવાઓ સમેટી લેવાનું નક્કી કર્યું છે. હાલમાં આ ફ્લાઈટ અઠવાડિયામાં ૪ દિવસ ઉડાન ભરી રહી છે, પરંતુ આગામી ૧ જુલાઈથી કંપનીએ આ ફ્લાઈટ માટેનું તમામ બુકિંગ સત્તાવાર રીતે બંધ કરી દીધું છે. એટલે કે, જુલાઈ મહિનાથી સુરતના આકાશમાંથી બેંગકોક જતું વિમાન જોવા મળશે નહીં.
Surat એરપોર્ટનો ઇન્ટરનેશનલ દરજ્જો માત્ર કાગળ પર?
સુરત એરપોર્ટને આંતરરાષ્ટ્રીય દરજ્જો તો મળી ગયો છે, પરંતુ એક પછી એક ઇન્ટરનેશનલ ફ્લાઈટ્સ અહીંથી છીનવાઈ રહી છે. આ પહેલા સુરતથી શારજાહ અને દુબઈ જતી મહત્વની આંતરરાષ્ટ્રીય ફ્લાઈટ્સ પણ બંધ કરી દેવામાં આવી છે. રનવે અને આધુનિક ટર્મિનલના કરોડો રૂપિયાના વિસ્તરણ બાદ પણ ગ્લોબલ કનેક્ટિવિટીમાં સતત થઈ રહેલો આ ઘટાડો એરપોર્ટ ઓથોરિટીની કામગીરી અને ભવિષ્યની વિશ્વસનીયતા સામે મોટા પ્રશ્નાર્થો ઊભા કરે છે.
સુરતીઓએ મુંબઈ કે અમદાવાદ સુધી લાંબા થવું પડશે
સુરતમાંથી મોટી સંખ્યામાં વેપારીઓ અને લોકો પ્રવાસ તથા બિઝનેસ અર્થે વિદેશ જતા હોય છે. બેંગકોક જેવો લોકપ્રિય રૂટ બંધ થવાના સમાચારથી દક્ષિણ ગુજરાતના વેપારી આલમ અને સ્થાનિક પ્રવાસીઓમાં ભારે રોષ અને હતાશા વ્યાપી ગઈ છે. આ કનેક્ટિવિટી તૂટવાથી હવે સુરતીઓએ વિદેશ જવા માટે ફરજિયાતપણે અમદાવાદ કે મુંબઈ એરપોર્ટ સુધી ધક્કો ખાવો પડશે, જેનાથી તેમના સમય અને નાણાં બંનેનો મોટો વ્યય થશે. સ્થાનિક સ્તરે ચૂંટાયેલા પ્રતિનિધિઓ આર્થિક વિકાસને ધીમી પાડતી આ ઘટના સામે હવે કેવા પગલાં લે છે, તેના પર સૌની નજર મંડાયેલી છે.
આ પણ વાંચો: સુરતમાં 13 વર્ષની માસૂમની જાહેરમાં છેડતી, બાઈક સવાર બોલ્યો- ‘ચાલ ગાડીમાં બેસી જા’
આ પણ વાંચો: સાહેબ… ઘરે પરિવાર શું ખાશે?” શ્રમિકની આ પીડા જોઈ સુરતના ઉદ્યોગપતિએ શોધ્યો અનોખો રસ્તો
આ પણ વાંચો: સુરત પોલીસે 24 વર્ષથી ભાગતા ફરતા હત્યાના આરોપીને ઝડપ્યો
