Gujarat News : ગુજરાતના એક સરકારી પ્રાથમિક શાળાના શિક્ષક (Teacher) સામે સગીર વિદ્યાર્થીનીઓ સાથે અયોગ્ય વર્તન (Misconduct) અને જાતીય શોષણના ગંભીર આરોપો સામે આવતા સમગ્ર વિસ્તારમાં ચકચાર મચી ગઈ છે. પોલીસ દ્વારા આરોપી શિક્ષક દેવાનંદ બેરાની ધરપકડ કરવામાં આવી છે, જ્યારે શિક્ષણ વિભાગે તેને તાત્કાલિક અસરથી સસ્પેન્ડ કરી દીધો છે.
પોલીસના જણાવ્યા મુજબ, 56 વર્ષીય દેવાનંદ બેરા છેલ્લા ત્રણ વર્ષથી ગામની સરકારી પ્રાથમિક શાળામાં શિક્ષક (Teacher) તરીકે ફરજ બજાવતો હતો. આરોપ છે કે તેણે જૂન 2025થી મે 2026 દરમિયાન શાળામાં અભ્યાસ કરતી અનેક સગીર વિદ્યાર્થીનીઓ સાથે અયોગ્ય શારીરિક સંપર્ક કર્યો હતો અને તેમની નાની ઉંમર તથા નિર્દોષતાનો લાભ ઉઠાવ્યો હતો.
વિદ્યાર્થીનીએ માતા-પિતાને વાત કરતાં ખુલ્યો ભાંડો
આ સમગ્ર મામલો ત્યારે પ્રકાશમાં આવ્યો જ્યારે એક વિદ્યાર્થીનીએ પોતાના માતા-પિતાને શિક્ષક (Teacher) દ્વારા કરવામાં આવેલા કથિત અભદ્ર સ્પર્શ અને વર્તન અંગે જાણ કરી હતી. આ વાત સાંભળ્યા બાદ પરિવારજનો ચોંકી ઉઠ્યા અને અન્ય વિદ્યાર્થીઓ સાથે વાતચીત શરૂ કરી.
તપાસ દરમિયાન જાણવા મળ્યું કે વધુ ચાર વિદ્યાર્થીનીઓએ પણ શિક્ષક સામે સમાન પ્રકારના આરોપો લગાવ્યા હતા. આ ખુલાસા બાદ વાલીઓ અને સ્થાનિક લોકોમાં ભારે રોષ ફેલાયો હતો.
વાલીઓએ પોલીસનો સંપર્ક કર્યો
મામલો ગંભીર બનતા પીડિત વિદ્યાર્થીનીઓના પરિવારજનોએ પાટણવાવ પોલીસ સ્ટેશનમાં ફરિયાદ નોંધાવી હતી. ફરિયાદના આધારે પોલીસે તાત્કાલિક તપાસ શરૂ કરી અને પીડિતાઓ તેમજ તેમના માતા-પિતાના નિવેદનો નોંધ્યા હતા.
પોલીસે બાળકો અને આરોપી શિક્ષકની તબીબી તપાસ પણ કરાવી હતી. પ્રાથમિક તપાસમાં સામે આવ્યું કે શાળામાં CCTV કેમેરા ન હોવાથી તપાસ માટે અન્ય પુરાવાઓ અને સાક્ષીઓના નિવેદનોનો સહારો લેવાયો હતો.
POCSO સહિતની ગંભીર કલમો હેઠળ કેસ
પોલીસે આરોપી સામે ભારતીય ન્યાય સંહિતાની વિવિધ કલમો તેમજ POCSO (Protection of Children from Sexual Offences) Actની કલમ 6, 8, 10 અને 18 હેઠળ ગુનો નોંધ્યો છે. ત્યારબાદ આરોપીની ધરપકડ કરવામાં આવી હતી.
ઘટનાની જાણ થતાં જ શિક્ષણ વિભાગે પણ કડક કાર્યવાહી કરતા શિક્ષકને સસ્પેન્ડ કરી દીધો હતો. હાલ પોલીસ સમગ્ર મામલે વધુ તપાસ કરી રહી છે અને અન્ય કોઈ પીડિત વિદ્યાર્થીની હોય તો તેની પણ માહિતી એકત્રિત કરવામાં આવી રહી છે.
આ ઘટના બાદ વાલીઓમાં બાળકોની સુરક્ષાને લઈને ચિંતા વધી છે. સાથે જ શૈક્ષણિક સંસ્થાઓમાં બાળકોની સલામતી માટે વધુ કડક દેખરેખ અને સુરક્ષા વ્યવસ્થાની માંગ ઉઠી રહી છે.
