અયોધ્યામાં રામ મંદિર નિર્માણને લઈને મંગળવારે સાંજે વડાપ્રધાન કાર્યાલય (PMO)માં એક બેઠક યોજાઈ હતી. બેઠકમાં હાજર એક વરિષ્ઠ અધિકારીએ કહ્યું કે અયોધ્યામાં મંદિર સ્થાપત્યનું મ્યુઝિયમ બનાવવાનો નિર્ણય લેવામાં આવ્યો છે. આ મ્યુઝિયમમાં દેશભરના પ્રસિદ્ધ હિંદુ મંદિરોની પ્રતિકૃતિઓ હશે, જે તેમના સ્થાપત્ય પર ધ્યાન કેન્દ્રિત કરશે. આ બેઠકમાં પીએમ નરેન્દ્ર મોદી પણ હાજર રહ્યા હતા અને તેમને અયોધ્યામાં ચાલી રહેલા પ્રોજેક્ટ્સ પર પ્રેઝન્ટેશન આપવામાં આવ્યું હતું. અધિકારીએ જણાવ્યું કે ઉત્તર પ્રદેશના મુખ્યમંત્રી યોગી આદિત્યનાથ અને રાજ્યના શહેરી વિકાસ મંત્રી એકે શર્માએ પણ બેઠકમાં હાજરી આપી હતી.
ઉત્તર પ્રદેશ સરકાર દ્વારા અયોધ્યામાં મંદિર મ્યુઝિયમ બનાવવાની માહિતી પણ આપવામાં આવી હતી. એવું કહેવામાં આવ્યું હતું કે દેશભરના પ્રખ્યાત મંદિરોના ઈતિહાસને દર્શાવવા માટે અયોધ્યામાં મ્યુઝિયમ બનાવવાની યોજના પર કામ ચાલી રહ્યું છે. એક અધિકારીએ જણાવ્યું કે સરકાર આ પ્રોજેક્ટ માટે બ્લૂ પ્રિન્ટ તૈયાર કરી રહી છે. અયોધ્યાના કમિશનર ગૌરવ દયાલે કહ્યું કે આ મંદિર 10 એકરથી વધુ જમીન પર બનાવવાની યોજના છે. આ સંદર્ભે મુખ્યમંત્રી યોગી આદિત્યનાથ સમક્ષ રજૂઆત કરવામાં આવી હતી.
જાણો મંદિરના સંગ્રહાલયની વિશેષતા
દયાલના જણાવ્યા અનુસાર, મ્યુઝિયમમાં મંદિરના વિવિધ પાસાઓ જેમ કે તેની ડિઝાઇન, બાંધકામ વગેરે દર્શાવતી વિવિધ ગેલેરીઓ હશે. તેમણે માહિતી આપી હતી કે સૂચિત મ્યુઝિયમની ગેલેરીઓમાં ચિત્રો અને ભીંતચિત્રો દ્વારા દેશના પ્રખ્યાત મંદિરોની વિશેષતા અને સ્થાપત્યને રજૂ કરવામાં આવશે. તેમાં ‘લાઇટ એન્ડ સાઉન્ડ શો’નું પણ આયોજન કરવામાં આવશે. આ મ્યુઝિયમનો મુખ્ય ઉદ્દેશ હિંદુ ધર્મ અને તેના વારસા વિશે જાગૃતિ લાવવાનો છે, સાથે જ અહીં ફિલસૂફી, ધાર્મિક વ્યક્તિત્વો, ધાર્મિક કેન્દ્રો, હિંદુ યાત્રાધામો પણ પ્રદર્શિત કરવામાં આવશે.
