લોકસભા ચૂંટણીના પાંચમા તબક્કાના પ્રચાર પ્રસાર આજે સાંજે 6 વાગ્યાથી શાંત થઈ જશે. પાંચમા તબક્કામાં સોમવારે (20 મે) 14 લોકસભા બેઠક અને એક વિધાનસભા બેઠક પર પેટાચૂંટણી માટે મતદાન થશે. પાંચમા તબક્કાની લોકસભા ચૂંટણી માટે 144 ઉમેદવારો મેદાનમાં છે અને લખનઉ પૂર્વ વિધાનસભા પેટાચૂંટણી માટે ચાર ઉમેદવારો મેદાનમાં છે.
મુખ્ય ચૂંટણી અધિકારી નવદીપ રિનવાએ જણાવ્યું કે શનિવારે સાંજે 6 વાગ્યાથી તમામ 14 લોકસભા મતવિસ્તારો અને લખનઉ પૂર્વ વિધાનસભા પેટાચૂંટણી માટે તમામ ચૂંટણી પ્રચાર સંબંધિત પ્રવૃત્તિઓ અને પ્રચાર પર પ્રતિબંધ રહેશે. ચૂંટણી પ્રચાર પૂરો થયા પછી, આ મતવિસ્તારોમાં તમામ રાજકીય પક્ષોના બહારના કાર્યકરો અને અધિકારીઓની હાજરી પર સંપૂર્ણ પ્રતિબંધ મૂકવામાં આવશે. પાંચમો તબક્કો મહત્વપૂર્ણ છે કારણ કે તેમાં કોંગ્રેસની રાયબરેલી અને અમેઠી બેઠકો માટે ચૂંટણી છે. આ વખતે કોંગ્રેસના પૂર્વ અધ્યક્ષ રાહુલ ગાંધી સોનિયા ગાંધીની રાયબરેલી બેઠક પરથી અને સ્મૃતિ ઈરાની અમેઠીથી ચૂંટણી લડી રહ્યા છે.
પાંચમા તબક્કામાં મોહનલાલગંજ, લખનઉ, રાયબરેલી, અમેઠી, જાલૌન, ઝાંસી, હમીરપુર, બાંદા, ફતેહપુર, કૌશામ્બી, બારાબંકી, ફૈઝાબાદ, કૈસરગંજ, ગોંડાની બેઠકો પર મતદાન થશે. તેમણે જણાવ્યું કે આ બેઠકો લખનૌ, સીતાપુર, રાયબરેલી, અમેઠી, સુલતાનપુર, જાલૌન, ઝાંસી, કાનપુર દેહાત, લલિતપુર, હમીરપુર, મહોબા, બાંદા, ચિત્રકૂટ, ફતેહપુર, કૌશામ્બી, પ્રતાપગઢ, બારાબંકી, અયોધ્યા, ગોંડા, બહરાઈચ અને બાલરામપુર જિલ્લાઓમાં આવે છે.
ચૂંટણી અધિકારીએ કહ્યું કે, આદર્શ આચારસંહિતાનું પાલન થાય તેની ખાતરી કરવા જિલ્લા ચૂંટણી અધિકારીઓને સૂચનાઓ આપવામાં આવી છે. ચૂંટણી પંચે મતદાનના દિવસે મતદાન મથકોની અંદર મોબાઈલ ફોન, સ્માર્ટ ફોન, વાયરલેસ સેટ વગેરે લઈ જવા પર પ્રતિબંધ મૂક્યો છે.
આ પણ વાંચો:હરિયાણામાં ધાર્મિક સ્થળોથી પરત ફરતાં 8 શ્રદ્ધાળુઓના મોત, 24 લોકો ઘાયલ
આ પણ વાંચો: PM મોદી આજે તેમના મત વિસ્તાર વારાણસીમાં કરશે ધુંઆધાર પ્રચાર
