બાંગ્લાદેશે સંયુકત રાષ્ટ્રને બંગાળની ખાડીના દક્ષિણ ભાગમાં દરિયાઇ સીમાને લઇને ભારત સાથે દાયકાઓ જૂના વિવાદનો ઉકેલ લાવવા અપીલ કરી છે. બાંગ્લાદેશના પૂર્વ વિદેશ સચિવ શાહિદુલ હકે કહ્યું કે આ વિવાદ બંને દેશો વચ્ચે ઘણા વર્ષોથી લટકેલો છે. આ મુદ્દે બંને દેશો વચ્ચે ડઝનેક દ્વિપક્ષીય બેઠકો પણ થઈ છે પરંતુ તેઓ આ મુદ્દાને ઉકેલવામાં નિષ્ફળ રહ્યા છે.વિદેશ મંત્રાલયના એક સૂત્રના જણાવ્યા અનુસાર, યુએન હેડક્વાર્ટરમાં બાંગ્લાદેશના કાયમી મિશનએ યુએન સેક્રેટરી જનરલ સમક્ષ ભારત વિરુદ્ધ બે અપીલ દાખલ કરી છે.
હકે વધુમાં કહ્યું કે હવે બંને દેશોએ સંયુક્ત રાષ્ટ્રમાં જવાનો નિર્ણય કર્યો છે અને અમને આશા છે કે યુએન આ મુદ્દાનો કાયમી ઉકેલ શોધી શકશે. તેમણે એમ પણ કહ્યું કે યુએનમાં અરજી દાખલ કરવામાં બાંગ્લાદેશે પોતાનો ભાગ ભજવ્યો છે. નોંધપાત્ર બાબત એ છે કે આ વર્ષે એપ્રિલ મહિનામાં ભારતે સંયુક્ત રાષ્ટ્રને પત્ર લખીને બાંગ્લાદેશ દ્વારા નક્કી કરેલી બેઝલાઇન સામે પોતાનો વિરોધ વ્યક્ત કર્યો હતો.
ઢાકા વિશ્વવિદ્યાલયના આંતરરાષ્ટ્રીય સંબંધોનાં પ્રોફેસર અને રાજદ્વારી વિશ્લેષક ચૌધરી રફીકુલ અબારરે અનાડોલુ એજન્સી સાથેની વાતચીતમાં જણાવ્યું હતું કે બંગાળની ખાડી બાંગ્લાદેશ માટે એક અનોખો અને મહત્વનો સ્ત્રોત છે અને બાંગ્લાદેશની સાર્વભૌમત્વ આ દેશના દરિયાઈ ક્ષેત્ર સાથે સંબંધિત છે.
રફીકુલે ભારતને આ વિવાદ ઉકેલવામાં યુનાઈટેડ નેશન્સ કન્વેન્શન ઓફ ધ લો ઓફ ધ સીના કાયદાની જોગવાઈઓનું પાલન કરવા અનુરોધ કર્યો છે. તેમણે કહ્યું કે ભારત અને બાંગ્લાદેશ દાવો કરી રહ્યા છે કે બંને દેશો વચ્ચે સારા સંબંધો છે. આવી સ્થિતિમાં, હું આશા રાખું છું કે બંને દેશો યુનાઈટેડ નેશન્સ દ્વારા લેવામાં આવેલા કોઈપણ નિર્ણયને સ્વીકારીને આ દાયકાઓ જૂના વિવાદનો ઉકેલ લાવી શકશે.
