સંયુક્ત આરબ અમીરાત (UAE)માં વિશ્વનો સૌથી મોટો મેળો દુબઈ એક્સ્પોનું આયોજન કરવામાં આવ્યું છે. આમાં દુનિયાભરના દેશોએ ભાગ લીધો છે. આ અઠવાડિયે આ એક્સ્પોમાં વિશ્વના સૌથી મોટા કુરાનના એક ભાગનું અનાવરણ કરવામાં આવ્યું હતું, જેણે એક્સ્પો જોવા માટે ભીડ એકઠી કરી હતી. આ દુર્લભ આર્ટવર્કની ખાસ વાત એ છે કે આ કુરાનના શબ્દો લખવા માટે સોના અને એલ્યુમિનિયમનો ઉપયોગ કરીને તેના શબ્દોને સુંદર રીતે કોતરવામાં આવ્યા છે.
એક પાકિસ્તાની અખબારના જણાવ્યા અનુસાર, આર્ટવર્કનું ઉદ્ઘાટન પાકિસ્તાનના વાણિજ્ય મંત્રી અબ્દુલ રઝાક દાઉદની સાથે સંયુક્ત આરબ અમીરાતમાં પાકિસ્તાનના રાજદૂત અફઝલ મહમૂદ, વરિષ્ઠ એક્સ્પો અધિકારીઓ અને રાજદ્વારીઓએ કર્યું હતું. કેનવાસ 8.5 ફૂટ (2.6 મીટર) લાંબો અને 6.5 ફૂટ (2 મીટર) પહોળો છે.
આ આર્ટવર્ક પાકિસ્તાનના પ્રખ્યાત કલાકાર શાહિદ રસમ દ્વારા તૈયાર કરવામાં આવી રહ્યું છે. તેમનું કાર્ય તુર્કી, અરબી અને ઈરાની આર્ટ ડિઝાઈનથી પ્રેરિત છે. રસમ અને તેના 200 થી વધુ સાથીદારો કુરાનની વિશ્વની સૌથી મોટી નકલ બનાવવા માટે 2017 થી કામ કરી રહ્યા છે. આ કુરાન 2026 માં પૂર્ણ થવાની અપેક્ષા છે. આ કુરાન 77,430 શબ્દો સાથે 550 પાનાનું હશે, જેને 200 કિલોથી વધુ સોનું, 2,000 કિલો એલ્યુમિનિયમ અને 600 કેનવાસ રોલનો ઉપયોગ કરીને બનાવવામાં આવશે.
