તેલંગાણાના વારાંગલના પાલમપેટમાં સ્થિત રામપ્પા મંદિરને યુનેસ્કોની વર્લ્ડ હેરિટેજ સાઇટ તરીકે માન્યતા આપવામાં આવી છે. આ માહિતી રવિવારે સંસ્કૃતિ મંત્રાલયે આપી હતી. કેન્દ્રીય સંસ્કૃતિ પ્રધાન જી કિશન રેડ્ડીએ ટ્વિટ કર્યું, મને એ જણાવતાં ખૂબ જ આનંદ થાય છે કે યુનેસ્કોએ તેલંગાનાના પેરમ્પેટ, રામપ્પા મંદિરને વર્લ્ડ હેરિટેજ સાઇટ તરીકે માન્યતા આપી છે.તેમણે કહ્યું કે, રાષ્ટ્ર અને ખાસ કરીને તેલંગાણાના લોકો વતી હું માનનીય વડા પ્રધાન નરેન્દ્ર મોદીના તેમના માર્ગદર્શન અને સમર્થન માટે આભારી છું. રામપ્પા મંદિર 13 મી સદીમાં બનાવવામાં આવ્યું હતું અને તેનું નામ તેના સ્થાપક રામપ્પાના નામથી રાખવામાં આવ્યું હતું. સરકારે યુનેસ્કોને તેને 2019 માટે વર્લ્ડ હેરિટેજ સાઇટ તરીકે માન્યતા આપવાની દરખાસ્ત કરી હતી.
વડા પ્રધાન નરેન્દ્ર મોદીએ ટ્વીટ કર્યું, ‘ઉત્તમ! બધાને અને ખાસ કરીને તેલંગાણાના લોકોને ખૂબ ખૂબ અભિનંદન. મૂર્તિમંત રામપ્પા મંદિર, મહાન કાકટિયા વંશની ઉત્કૃષ્ટ કારીગરી દર્શાવે છે. હું તમને બધાને આ ભવ્ય મંદિરના પરિસરની મુલાકાત લેવા અને તેની ભવ્યતાનો પહેલો અનુભવ લેવાનો આગ્રહ રાખુ છું.
ઉલ્લેખનીય છે કે રામપ્પા મંદિર માટે યુનેસ્કોમાં 2019માં વિશ્વ ધરોહરમાં સમાવેશ થાય તે માટે તેની રજૂઆત કરવામાં આવી હતી અને આ રજૂઆતને ગ્રાહ્ય રાખીને વિશ્વ ઐતિહાસિક ઇમારત તરીકે તેની પસંદગી કરવામાં આવી છે.
