US Midterm Elections 2026 Donald Trump Challenges: અમેરિકામાં નવેમ્બરમાં યોજાનારી મિડટર્મ ચૂંટણી પહેલાં રાષ્ટ્રપતિ ડોનાલ્ડ ટ્રમ્પની મુશ્કેલીઓ વધતી દેખાઈ રહી છે. ઇપ્સોસ-એએપીઆઈના એક સર્વે અનુસાર, મિડટર્મ ચૂંટણીમાં ટ્રમ્પની રિપબ્લિકન પાર્ટીની હારની સંભાવના 65 ટકા સુધી હોવાનું સામે આવ્યું છે. જો રિપબ્લિકન પાર્ટી કોંગ્રેસમાં બહુમતી ગુમાવે છે, તો ટ્રમ્પના બાકીના કાર્યકાળમાં તેમના નિર્ણયો પર વિરોધ પક્ષનું દબાણ વધી શકે છે.
મિડટર્મ ચૂંટણી Donald Trump માટે કેમ મહત્વની?
અમેરિકામાં રાષ્ટ્રપતિની ચૂંટણી દર ચાર વર્ષે યોજાય છે, જ્યારે મિડટર્મ ચૂંટણી રાષ્ટ્રપતિના ચાર વર્ષના કાર્યકાળની વચ્ચે થાય છે. આ ચૂંટણીમાં રાષ્ટ્રપતિ પદ માટે મતદાન થતું નથી, પરંતુ કોંગ્રેસના હાઉસ ઓફ રિપ્રેઝન્ટેટિવ્સ અને સેનેટ ઉપરાંત રાજ્યો અને સ્થાનિક સ્તરના અનેક મહત્વના પદો માટે ચૂંટણી થાય છે. જો રિપબ્લિકન પાર્ટી બહુમતી ગુમાવે છે, તો ટ્રમ્પ રાષ્ટ્રપતિ તરીકે ચાલુ રહેશે, પરંતુ કાયદા, બજેટ અને નીતિઓને મંજૂરી અપાવવામાં તેમને ડેમોક્રેટ્સ સાથે વધુ સમજૂતી કરવી પડી શકે છે.
મોંઘવારી સૌથી મોટો પડકાર
અમેરિકી મતદારો માટે મોંઘવારી અને અર્થતંત્ર સૌથી મહત્વના મુદ્દાઓમાંથી એક છે. સર્વેમાં 54 ટકા લોકોએ મોંઘવારી અને અર્થતંત્રને પોતાના મત માટે મહત્વનો મુદ્દો ગણાવ્યો છે. બીજા એક સર્વે અનુસાર, માત્ર 32 ટકા અમેરિકનો માને છે કે ટ્રમ્પ(Donald Trump) અર્થતંત્રને સારી રીતે સંભાળી રહ્યા છે. જ્યારે 69 ટકા લોકોને દેશની વર્તમાન આર્થિક સ્થિતિ ખરાબ લાગી રહી છે. રોજિંદી ચીજવસ્તુઓના વધતા ભાવ પણ ટ્રમ્પ સરકાર માટે ચિંતાનો વિષય બની શકે છે.
ઈરાન યુદ્ધની પણ અસર
ઈરાન સાથેના યુદ્ધનો મુદ્દો પણ મિડટર્મ ચૂંટણીમાં મહત્વનો બની શકે છે. સર્વેમાં લગભગ 20 ટકા મતદારોએ ઈરાન યુદ્ધને મહત્વનો ચૂંટણી મુદ્દો ગણાવ્યો છે. જો યુદ્ધ લાંબું ચાલે અને ક્રૂડ ઓઈલના ભાવ વધે તો પેટ્રોલ, પરિવહન અને અન્ય વસ્તુઓ મોંઘી થઈ શકે છે. આવી સ્થિતિમાં ટ્રમ્પ(Donald Trump) માટે વિદેશ નીતિ અને ઘરેલુ મોંઘવારી વચ્ચે સંતુલન જાળવવું મુશ્કેલ બની શકે છે.
ઇમિગ્રેશન નીતિથી પણ નારાજગી
ઇમિગ્રેશન પણ ટ્રમ્પ(Donald Trump) માટે મોટો પડકાર બની રહ્યો છે. સર્વે અનુસાર, 61 ટકા અમેરિકનોએ તેમની ઇમિગ્રેશન નીતિનો વિરોધ કર્યો છે, જ્યારે 39 ટકા લોકોએ સમર્થન આપ્યું છે.
બહુમતી ગઈ તો મહાભિયોગનો ખતરો?
જો ડેમોક્રેટ્સ કોંગ્રેસના બંને ગૃહોમાં મજબૂત સ્થિતિમાં આવે છે, તો ટ્રમ્પની(Donald Trump) નીતિઓ સામે તપાસ અને રાજકીય દબાણ વધી શકે છે. મહાભિયોગની પ્રક્રિયાની શક્યતા અંગે પણ ચર્ચા થઈ શકે છે. આ ઉપરાંત ટેરિફ, ઇમિગ્રેશન, વિઝા અને ઈરાન સંબંધિત નીતિઓમાં કોંગ્રેસ ટ્રમ્પ સરકાર પર નિયંત્રણ વધારી શકે છે. એટલે નવેમ્બરની મિડટર્મ ચૂંટણી ટ્રમ્પ માટે માત્ર ચૂંટણી નહીં, પરંતુ તેમના બીજા કાર્યકાળની મોટી રાજકીય કસોટી બની શકે છે.
આ પણ વાંચો:ચીનમાં ડોલ્ફિન વાવાઝોડાનો આતંક; 1300 ફ્લાઈટ્સ રદ, લાખો લોકોનું સ્થળાંતર
આ પણ વાંચો:પાકિસ્તાન સરહદે મળી આવી સદીઓ જૂની વસાહત; પુરાતત્વિય સાઇટ પર મોટા ખુલાસા
આ પણ વાંચો:અમેરિકી સાંસદનો ટ્રમ્પ પર ગંભીર આક્ષેપ; ઈરાન યુદ્ધ અને માર્કેટ સાથે રમત રમવાનો દાવો
