અમેરિકાના રાષ્ટ્રપતિના સત્તાવાર વિમાન એરફોર્સ વનને સુપરસોનિક વિમાનમાં અપગ્રેડ કરવા માટે યુએસ એરફોર્સ એક સ્ટાર્ટઅપ સાથે કામ કરી રહ્યું છે. ગયા વર્ષે અહેવાલ આવ્યો હતો કે યુએસ એરફોર્સે જ્યોર્જિયા સ્થિત એવિએશન સ્ટાર્ટઅપ કંપની હર્મિયસ સાથે જોડાણ કર્યું છે. કંપની યુએસ રાષ્ટ્રપતિના વિમાન માટે સુપરસોનિક એરક્રાફ્ટ એન્જિન બનાવશે.
સીએનએન ટ્રાવેલે એક્ઝોલોનિક દ્વારા બનાવવામાં આવતા લો બૂમ સુપરસોનિક મેક 1.8 ટ્વીનજેટના કેટલાક આંતરિક ફોટા જાહેર કર્યા છે. જેમાં વિમાનની આંતરિક સજાવટ બતાવવામાં આવી છે. આ વિમાન હાલના એરફોર્સ વન કરતા નાનું હશે પરંતુ તેની સ્પીડ ઘણી વધારે હશે. આ પ્રોજેક્ટને યુએસ એરફોર્સના પ્રેસિડેંશિયલ અને એક્ઝિક્યુટિવ એરલિફ્ટ ડિરેક્ટોરેટ દ્વારા નાણાં પૂરા પાડવામાં આવે છે. આ જ વિભાગ રાષ્ટ્રપતિના વિમાનની દેખરેખ પણ કરે છે. અમેરિકન વીવીઆઈપી મુલાકાતીઓ માટે રચાયેલ આ એક્ઝિક્યુટિવ ટ્રાન્સપોર્ટ પ્લેન આંતરીક ફોટામાં ખૂબ સુંદર લાગે છે. તે એક્ઝોસોનિકની 70-પેસેન્જર કમર્શિયલ એરલાઇનર કન્સેપ્ટ પર બનાવવામાં આવ્યું છે. જેમાં કુલ 31 લોકો અમેરિકન રાષ્ટ્રપતિ સાથે મુસાફરી કરી શકશે.
અમેરિકાનું નવું એરફોર્સ વન હવામાં ઉડતું મહેલ હશે
આ વિમાનના આંતરિક ભાગને સુંદર અને આરામદાયક બનાવવા માટે, લક્ઝરી ચામડા, ઓક લાકડું, ક્વાર્ટઝ ફિટિંગ્સ, ખાનગી સ્યુટસ આરામ કરવા માટે ઉપલબ્ધ છે. તેમાં અલ્ટ્રા લક્ઝરી ચેર લગાવવામાં આવી છે. આ વિમાનનો ઉપયોગ રાષ્ટ્રપતિની સુવિધા મુજબ કરવામાં આવશે. જોકે પ્રાપ્ત થતી પ્રાથમિક માહિતી અનુસાર શરૂઆતમાં આ વિમાનને એરફોર્સ ટુ તરીકે વાપરવાની યોજના છે. હાલમાં અમેરિકાના ઉપરાષ્ટ્રપતિના વિમાનને એરફોર્સ-2 કહેવામાં આવે છે. એક્ઝોસિનિકના પ્રિન્સિપલ એરક્રાફ્ટ ઇન્ટિરિયર ડિઝાઇનર સ્ટેફની ચહને જણાવ્યું હતું કે અમે અમારી પહેલેથી જ આયોજન કરેલી યોજનામાં નવી તકનીકોનો ઉપયોગ કરી રહ્યા છીએ, જે સાર્વજનિક રૂપે ઉપલબ્ધ નથી અથવા જે તમે હાલમાં કોઈ પણ વ્યવસાયિક વિમાનમાં જોતા નથી. તેમાં બનાવેલ બે ખાનગી સ્યુટમાંથી પ્રથમને ત્રણ લોકો માટે મીટિંગ રૂમમાં રૂપાંતરિત પણ કરી શકાય છે. તેમાં સુરક્ષિત વિડિઓ કોન્ફરન્સિંગની સુવિધા પણ હશે. જેથી આ વિમાનમાં મુસાફરી કરતા રાષ્ટ્રપતિ અથવા ઉપરાષ્ટ્રપતિ તેમનું કાર્ય, ઓનલાઇન અથવા મીડિયાને સંબોધન કરી શકે.
એક સમયે 9260 કિમી સુધીની ઉડાન ભરી શકે છે
આ વિમાનમાં બનાવવામાં આવેલા બીજા સ્યુટમાં 8 લોકોની જગ્યા છે. તેમાં ફ્લેટ બેઠકો, એડજસ્ટેબલ ટેબલ પણ છે, જેથી વિમાનમાં કાર્યરત વરિષ્ઠ અધિકારીઓને તેમના કામમાં કોઈ મુશ્કેલીનો સામનો કરવો ન પડે. આ વિમાનમાં 20 બીઝનેસ ક્લાસ સીટો સાથે બે ગેલેરીઓ, બે લેવોટરી, સ્ટોવેજ જગ્યા પણ છે, આધુનિક વિમાન ડિઝાઇન મુજબ, આ વિમાનની બેઠકોના પાછળના ભાગમાં મોનિટર નથી, પરંતુ તેના બદલે વ્યક્તિગત ઇલેક્ટ્રોનિક ગેજેટ્સ માટે એક અલગ જગ્યા છે. ડિઝાઇનરોએ જણાવ્યું હતું કે વિમાનની રચના યુએસ એક્ઝિક્યુટિવ શાખાના મિશન અને મૂલ્યના આધારે કરવામાં આવી છે. આ વિમાન એક સમયે 5000 નોટિકલ માઇલ (9260 કિલોમીટર) સુધીની ઉડાન કરી શકે છે. ઉપરાંત, બુમ સોફ્ટ ટેકનોલોજીને કારણે તે પૃથ્વી પર હાજર લોકોને ખલેલ પહોંચાડ્યા વિના ધ્વનિની ગતિથી બે ગણી ગતિ સાથે ઉડી શકે છે.
નવું વિમાન 90 મિનિટમાં 7 કલાકની યાત્રા પૂર્ણ કરશે
જો એરફોર્સ વન સુપરસોનિક એન્જિનથી સજ્જ છે, તો યુએસ રાષ્ટ્રપતિ મૈક 5 ની ગતિ સાથે માત્ર 90 મિનિટમાં ન્યૂયોર્કથી લંડન પહોંચી શકે છે. હાલમાં આ અંતર કાપવામાં 7 કલાકનો સમય લાગે છે. આ સ્ટાર્ટઅપ કંપનીએ એરફોર્સની સામે મૈક 5 એરક્રાફ્ટ એન્જિન દર્શાવ્યું હતું. જે બાદ તેને સરકારી ભંડોળ આપવામાં આવ્યું છે. આ સુપરસોનિક એન્જિન સંયુક્ત ટર્બોફેન ડિઝાઇન પર આધારિત છે જે સામાન્ય ટર્બોફેન એન્જિન અને રેમજેટ બંનેને એક જ એન્જિનમાં ફ્યુઝ કરે છે. એક સામાન્ય ટર્બોફેન એન્જિન આગળથી હવા ખેંચે છે અને પાછળથી પ્રેશર સાથે વિમાન ને ધક્કો મારે છે. આ એન્જિનથી પ્રાપ્ત શક્તિને કારણે વિમાન સબસોનિક ગતિથી ઉડાન માટે સક્ષમ છે. જ્યારે રેમજેટ એન્જિનોનો ઉપયોગ મોટાભાગે મિસાઇલોમાં થાય છે.
વર્તમાન એરફોર્સ વનની શું વિશેષતા છે..?
વર્તમાન યુ.એસ. એરફોર્સ વન વિમાન બે ખાસ ડિઝાઇન કરેલા બોઇંગ 747-2૦૦ બી સીરીઝના વિમાનોમાંનું એક છે. આ વિમાન હંમેશાં ઉડાન માટે તૈયાર રહે છે. વિમાનમાં આવ્યા પછી પણ યુએસ રાષ્ટ્રપતિ કોઈની સાથે જોડાયેલા રહી શકે છે અને યુ.એસ. પર હુમલો થવાની સ્થિતિમાં વિમાનનો ઉપયોગ મોબાઇલ કમાન્ડ સેન્ટર તરીકે કરી શકાય છે. ટ્રમ્પનું એરફોર્સ વન વિમાન ક્યારેય એકલુ ઉડતું નથી. કેટલાક કાર્ગો વિમાનો હંમેશાં તેની સામે હોય છે, જેના દ્વારા રાષ્ટ્રપતિ દૂરસ્થ સ્થાન પર પણ કંઈપણ ચૂકતા નથી. જો જોવામાં આવે તો, આ કાર્ગો વિમાનો યુએસ રાષ્ટ્રપતિના એરફોર્સ વનને સુરક્ષિત રાખવા માટે પણ સેવા આપે છે. એરફોર્સ વન કલાકના 1,013 કિલોમીટરની ઝડપે 35,000 ફૂટની ઉચાઇએ ઉડી શકે છે. આ વિમાન એક સમયે 6,800 માઇલની મુસાફરી કરી શકે છે. વિમાન મહત્તમ 45,100 ફૂટની ઉંચાઈએ ઉડી શકે છે. તેના ઉડ્યન પાછળ કલાકે 1,81,000 ડોલર (લગભગ 1 કરોડ 30 લાખ રૂપિયા) ખર્ચ થાય છે.