Surat News/ આર્થિક નગરી સુરતના ઉધના રેલવે સ્ટેશન પરથી કાયદો અને વ્યવસ્થાની સ્થિતિ સામે ગંભીર સવાલો ઉઠાવતો એક આઘાતજનક વીડિયો સોશિયલ મીડિયા (Social media)પર જોરદાર વાયરલ થઈ રહ્યો છે. આ વીડિયોમાં એક પોલીસકર્મી સરેઆમ એક સામાન્ય મુસાફર સાથે અત્યંત અમાનવીય વર્તન કરીને તેને ઢોર માર મારતો નજરે પડી રહ્યો છે. જાહેર સ્થળે ખાખી વર્દીનો રોફ જમાવીને મુસાફર પર કરવામાં આવેલી આ હિંસક મારપીટને કારણે પોલીસ પ્રશાસનની કામગીરી સામે લોકોમાં ભારે રોષ જોવા મળી રહ્યો છે.
પોલીસની દાદાગીરીનો વિડીયો Social media માં વાયરલ
વાયરલ થઈ રહેલા વીડિયોમાં સ્પષ્ટ જોઈ શકાય છે કે, મુસાફરોની અવરજવર વચ્ચે એક પોલીસકર્મી કોઈ અજ્ઞાત કારણોસર એક યાત્રીને ઘેરીને ઊભો છે અને તેના માથાના વાળ પકડી નિર્દયતાપૂર્વક ગડદા-પાટુનો મારમારી રહ્યો છે. ઉધના રેલવે સ્ટેશન પર સામાન્ય રીતે પરપ્રાંતિય મુસાફરો અને શ્રમિકોની મોટી અવરજવર રહેતી હોય છે. તેવામાં કાયદાના રક્ષક ગણાતા પોલીસકર્મીનું આ પ્રકારનું હિંસક અને ગેરવર્તણૂકભર્યું વલણ જોઈને ત્યાં હાજર અન્ય મુસાફરો પણ સ્તબ્ધ થઈ ગયા હતા. ત્યાં હાજર કોઈ વ્યક્તિએ આ સમગ્ર ઘટના પોતાના મોબાઈલમાં કેદ કરી લીધી હતી, જે હવે ઇન્ટરનેટ પર ચર્ચાનો વિષય બની છે.
ગેરવર્તણૂક મુદ્દે પોલીસ તંત્ર સવાલોના ઘેરામાં
આ વીડિયો સોશિયલ મીડિયા પર વાયરલ થતાં જ યુઝર્સે સુરત પોલીસ અને રેલવે પ્રશાસનની ભારે આલોચના શરૂ કરી છે. લોકો સવાલ ઉઠાવી રહ્યા છે કે, જો મુસાફરે કોઈ ગુનો કે ભૂલ કરી હતી, તો તેની સામે કાયદેસરની કાર્યવાહી કરવાના બદલે જાહેરમાં આ રીતે માર મારવો કેટલું વ્યાજબી? લોકો સવાલ કરી રહ્યાં છે કે, સામાન્ય નાગરિકોની સુરક્ષા માટે તૈનાત પોલીસ જ જો રક્ષકના બદલે ભક્ષક બનશે, તો નાગરિકો ક્યાં જશે? આ ગંભીર ઘટનાએ રેલવે સ્ટેશનો પર મુસાફરોની સુરક્ષા અને તેમની સાથે થતા વ્યવહાર પર મોટા સવાલો ઊભા કર્યા છે.
ઉચ્ચ અધિકારીઓ તપાસ કરે તેવી માંગ
વીડિયો વાયરલ થયા બાદ સમગ્ર સુરત પંથકમાં ખાખીની છબી ખરડાઈ છે. સ્થાનિક લોકો અને સોશિયલ મીડિયા યુઝર્સ આ મામલે જવાબદાર પોલીસકર્મીને તાત્કાલિક અસરથી સસ્પેન્ડ કરીને તેની સામે કડક કાનૂની પગલાં લેવામાં આવે તેવી માંગ કરી રહ્યા છે. જોકે, આ બાબતે હજી સુધી રેલવે પોલીસ અથવા સ્થાનિક ઉચ્ચ અધિકારીઓ તરફથી કોઈ સત્તાવાર નિવેદન કે એક્શનની વિગતો સામે આવી નથી.
આ પણ વાંચો: રાજકોટમાં કાર ચાલકની દાદાગીરીનો વીડિયો વાયરલ
આ પણ વાંચો: જામનગરમાં શ્વાન પર ક્રૂરતા CCTVમાં કેદ, લાકડીથી માર મારતો વીડિયો વાયરલ થતાં રોષ ફેલાયો
આ પણ વાંચો: સુરત: ચાર્જિંગમાં મૂકેલી પાવર બેંકમાં થયો વિસ્ફોટ, જાણીતી કન્ટેન્ટ ક્રિએટર શિવાની કપિલાનો રૂમ બળીને ખાખ!
