મણિપુરમાં ચૂંટણીના બીજા અને છેલ્લા તબક્કામાં આજે કુલ 22 વિધાનસભા સીટો પર મતદાન શરૂ થઈ ગયું છે. છ જિલ્લાની આ 22 બેઠકો પર કુલ 92 ઉમેદવારો મેદાનમાં છે, જેમનું ભાવિ ઈવીએમમાં મતદારો નક્કી કરી રહ્યા છે. રાજ્યના મુખ્ય ચૂંટણી અધિકારી રાજેશ અગ્રવાલે જણાવ્યું હતું કે કોવિડ-19 સુરક્ષાના પ્રોટોકોલ અને સલામતી ધોરણોને અનુસરીને કુલ 1247 મતદાન મથકો સ્થાપિત કરવામાં આવ્યા છે.
પંચે ચૂંટણીના આ તબક્કામાં સુરક્ષાની વિસ્તૃત વ્યવસ્થા પણ કરી છે. કેન્દ્રીય અર્ધલશ્કરી દળના લગભગ 20,000 જવાનોને તૈનાત કરવામાં આવ્યા છે. આ તબક્કામાં કુલ 8.38 લાખ મતદારો તેમના મતાધિકારનો ઉપયોગ કરશે. જેમાં 4.28 લાખ મતદારો મહિલા છે. 223 પોલિંગ બૂથને પિંક બૂથ બનાવવામાં આવ્યા છે. સવારે 7 વાગ્યાથી શરૂ થયેલું મતદાન સાંજે 4 વાગ્યા સુધી ચાલશે.
આ તબક્કામાં જે અગ્રણી ઉમેદવારોના ભાવિનો નિર્ણય લેવાનો છે તેમાં ત્રણ વખતના મુખ્ય પ્રધાન ઓ ઇબોબી સિંહ અને ભૂતપૂર્વ નાયબ મુખ્ય પ્રધાન ગાયખાંગમ ગંગમાઈનો સમાવેશ થાય છે. આ બંને કોંગ્રેસના ઉમેદવાર છે. રાજ્યમાં ચૂંટણીના પ્રથમ તબક્કામાં 28 ફેબ્રુઆરીએ 38 વિધાનસભા બેઠકો પર મતદાન થયું હતું. પરિણામ 10 માર્ચે આવશે.
