પાકિસ્તાનમાં સામાન્ય ચૂંટણી માટે ગુરુવારે મતદાન થશે અને એવું માનવામાં આવે છે કે સૌથી આગળ, ભૂતપૂર્વ વડા પ્રધાન નવાઝ શરીફને સેનાનું સમર્થન છે. સામાન્ય ચૂંટણીની પૂર્વ સંધ્યાએ બુધવારે પણ હિંસાની ઘટનાઓ બની હતી. બલૂચિસ્તાન પ્રાંતમાં ચૂંટણી કાર્યાલયોને નિશાન બનાવતા બે બોમ્બ વિસ્ફોટોમાં ઓછામાં ઓછા 30 લોકો માર્યા ગયા અને 40 થી વધુ ઘાયલ થયા. પૂર્વ વડાપ્રધાન ઈમરાન ખાન જેલમાં હોવાથી શરીફની પાકિસ્તાન મુસ્લિમ લીગ-નવાઝ (PML-N) ચૂંટણીમાં સૌથી મોટી પાર્ટી તરીકે ઉભરી શકે છે. ખાનના પાકિસ્તાન તહરીક-એ-ઈન્સાફ (પીટીઆઈ)ના ઉમેદવાર અપક્ષ તરીકે ચૂંટણી લડી રહ્યા છે જ્યારે સુપ્રીમ કોર્ટે તેમની પાર્ટીના ચૂંટણી પ્રતીક ક્રિકેટ ‘બેટ’ને છીનવી લેવાના ચૂંટણી પંચના નિર્ણયને સમર્થન આપ્યું હતું.
74 વર્ષીય શરીફ ગુરુવારે યોજાનારી ચૂંટણીમાં વિક્રમી ચોથી વખત વડાપ્રધાન બનવા પર નજર રાખશે. બિલાવલ ભુટ્ટો-ઝરદારીની પાકિસ્તાન પીપલ્સ પાર્ટી (PPP) પણ આ હરીફાઈમાં સામેલ છે. બિલાવલ ભુટ્ટો-ઝરદારીને પાર્ટી દ્વારા વડાપ્રધાન પદનો ચહેરો જાહેર કરવામાં આવ્યો છે. પાકિસ્તાનના ચૂંટણી પંચે ગયા વર્ષે ડિસેમ્બરમાં ચૂંટણી યોજવા માટેનું સમયપત્રક જારી કર્યું હતું અને બગડતી સુરક્ષા પરિસ્થિતિ છતાં ચૂંટણી પ્રક્રિયાને યથાવત રાખી હતી. પાકિસ્તાનમાં સામાન્ય ચૂંટણી માટે લગભગ 6,50,000 સુરક્ષાકર્મીઓ તૈનાત કરવામાં આવ્યા છે.
અધિકારીઓએ જણાવ્યું કે આ ચૂંટણીમાં 12.85 કરોડથી વધુ નોંધાયેલા મતદારો મતદાન કરશે. ‘રેડિયો પાકિસ્તાન’ના સમાચાર મુજબ મતદારોની સુરક્ષા સુનિશ્ચિત કરવા માટે લગભગ 6,50,000 સુરક્ષાકર્મીઓ તૈનાત કરવામાં આવ્યા છે. જેમાં પોલીસ, સિવિલ સશસ્ત્ર દળો અને સશસ્ત્ર દળોના જવાનોનો સમાવેશ થાય છે. ગુરુવારે સવારે 8 વાગ્યાથી મતદાન શરૂ થશે અને સાંજે 5 વાગ્યા સુધી ચાલશે. પાકિસ્તાનના ચૂંટણી પંચ (ECP) અનુસાર, નેશનલ એસેમ્બલી માટે 5,121 ઉમેદવારો મેદાનમાં છે, જેમાં 4,807 પુરૂષો, 312 મહિલાઓ અને બે ટ્રાન્સજેન્ડરનો સમાવેશ થાય છે. ચાર પ્રાંતીય એસેમ્બલી માટે 12,695 ઉમેદવારો મેદાનમાં છે, જેમાં 12,123 પુરૂષો, 570 મહિલાઓ અને બે ટ્રાન્સજેન્ડરનો સમાવેશ થાય છે.
