Gujarat Weather: ગુજરાત (Gujarat) ભરમાં ઠંડીનો ચમકારો યથાવત જોવા મળી રહ્યો છે. છેલ્લા કેટલાક દિવસોથી ઉત્તર અને ઉત્તરપૂર્વ દિશાના પવનની ગતિમાં વધારો થવાને કારણે વહેલી સવાર અને મોડી રાતે ઠંડીનો અહેસાસ વધુ તીવ્ર બન્યો છે. ખાસ કરીને ગ્રામ્ય વિસ્તારો અને ખુલ્લા વિસ્તારોમાં લોકો કડકડતી ઠંડી અનુભવી રહ્યા છે.
ગુજરાત (Gujarat) માં અનેક શહેરોમાં ઠંડીની તીવ્રતા
હવામાન વિભાગના હાલના આંકડા મુજબ કચ્છ (Kutch) ના નલિયામાં સૌથી ઓછું 10.3 ડિગ્રી સેલ્સિયસ (Degrees Celsius) તાપમાન નોંધાયું છે, જ્યારે અમરેલી (Amreli) માં 10.8 ડિગ્રી તાપમાન સાથે ઠંડીનો પ્રભાવ સ્પષ્ટ થયો છે. કંડલામાં લઘુત્તમ તાપમાન 12 ડિગ્રી નોંધાયું છે. સાઉરાષ્ટ્ર (Saurashtra ) ના દરિયાકાંઠા વિસ્તારમાં આવેલા પોરબંદર (Porbandar) માં 12.8 ડિગ્રી તાપમાન રહ્યું છે.
ઉત્તર ગુજરાત (Gujarat) માં પણ ઠંડીની અસર જોવા મળી છે. ડીસામાં 12.4 ડિગ્રી અને ગાંધીનગરમાં 12.6 ડિગ્રી તાપમાન નોંધાયું છે. અમદાવાદ (Ahmedabad) માં લઘુત્તમ તાપમાન 14.5 ડિગ્રી રહ્યું છે, જ્યારે દીવમાં 11.9 ડિગ્રી તાપમાન સાથે ઠંડીનો અહેસાસ નોંધાયો છે.
સૌરાષ્ટ્ર (Saurashtra ) ના અન્ય વિસ્તારોમાં રાજકોટ (Rajkot) માં 13.3 ડિગ્રી, કેશોદમાં 13.9 ડિગ્રી અને મુન્દ્રામાં 13.9 ડિગ્રી તાપમાન નોંધાયું છે. સુરેન્દ્રનગર (Surendranagar) માં 14 ડિગ્રી તાપમાન સાથે ઠંડીની અસર યથાવત રહી છે.
હવામાન નિષ્ણાતોના જણાવ્યા મુજબ આગામી કેટલાક દિવસો સુધી ઠંડી યથાવત રહેવાની શક્યતા છે. પવનની ગતિ વધુ રહેવાના કારણે રાત્રી અને વહેલી સવારમાં લોકોને સાવચેતી રાખવાની જરૂર છે. ઠંડીથી બચવા ગરમ કપડાં પહેરવા તેમજ બાળકો અને વૃદ્ધોની ખાસ કાળજી લેવા હવામાન વિભાગે સૂચના આપી છે.
