પેરિસ,
ફ્રાંસમાં પેટ્રોલિયમ પેદાશોની કિંમતમાં વધારો, મોંઘવારી અને ટેક્સમાં થયેલી વૃદ્ધિના કારણે કરવામાં આવી રહેલું વિરોધ પ્રદર્શન હિંસક બની ગયું છે. હાલમાં ફ્રાંસ છેલ્લા ૫૦ વર્ષમાં ક્યારેય પણ ન થઇ હોય એ રીતે ભડકે સળગી રહ્યું છે.
આ હિંસક વિરોધ પ્રદર્શનમાં અંદાજે ૩૬,૦૦૦થી વધુ લોકો રસ્તા પર ઉતરી આવ્યા છે અને ઠેર-ઠેર જગ્યાએ તોડફોડ, આગજની દ્વારા હિંસક પ્રદર્શન કરાઈ રહ્યું છે.
આ મામલે પોલીસ દ્વારા ૪૦૦ પ્રદર્શનકારીઓની ધરપકડ કરવામાં આવી છે.
આ દરમિયાન થયેલી હિંસામાં ૧૧૦થી વધુ લોકો ઘાયલ થયા છે, જેમાં ૨૦ પોલીસકર્મીઓ પણ શામેલ છે.
ફ્રાંસના ગૃહમંત્રી ક્રિસ્ટોફે કેસ્ટનરે જણાવ્યું હતું કે, “પીળા કલરના જેકેટ પહેરી કરવામાં આવી રહેલા આ પ્રદર્શનમાં થયેલી ઝડપ દરમિયાન એક પ્રદર્શનકારી ગંભીરરૂપથી ઘાયલ થયો છે અને તેની હાલત નાજુક હોવાનું જણાવવામાં આવી રહ્યું છે”
બીજી બાજુ સોશિયલ મીડિયામાં પણ સરકારની નાણાકીય અને આર્થિક નીતિઓની આલોચના શરુ થઇ ગઈ છે. અમીરોને લાભ પહોચાડનારી અને ગરીબ કક્ષાના લોકોની ખરીદવાની ક્ષમતા ઘટાડનારી આ નીતિઓનો સખ્ત વિરોધ કરાઈ રહ્યો છે.
