બર્મિંગહામમાં 28 જુલાઈથી શરૂ થઈ રહેલી કોમનવેલ્થ ગેમ્સની 12 લાખ ટિકિટો વેચાઈ છે અને આયોજકોનું કહેવું છે કે સ્થાનિક લોકો ભારત અને પાકિસ્તાનની મહિલા ક્રિકેટ ટીમો વચ્ચેની મેચમાં ખૂબ જ રસ લઈ રહ્યા છે. મહિલા ક્રિકેટ કોમનવેલ્થ ગેમ્સમાં પદાર્પણ કરવા જઈ રહી છે અને ભારત-પાકિસ્તાન મેચ 31 જુલાઈએ થશે. બર્મિંગહામમાં ભારતીય અને પાકિસ્તાની મૂળના ઘણા લોકો રહે છે.
બર્મિંગહામ ગેમ્સના સીઈઓ ઈયાન રીડે જણાવ્યું હતું કે સેમીફાઈનલ અને ફાઈનલની ટિકિટો વેચાઈ ગઈ છે અને ભારત-પાકિસ્તાન મેચ માટે પણ સ્ટેડિયમ ભરાઈ જશે તેવી અપેક્ષા છે. તેંમણે કહ્યું હું પોતે પણ ક્રિકેટનો ફેન છું. ભારત અને પાકિસ્તાન એક જ ગ્રુપમાં છે, તેથી અહીંના લોકોને તે મેચમાં ખૂબ જ રસ છે. ભારતીય પુરુષ ટીમ હાલમાં જ અહીં રમવા આવી ગઈ છે અને હવે આ મેચ આકર્ષણનું કેન્દ્ર બનશે.
તેમણે કહ્યું કે સેમી ફાઈનલ અને ફાઈનલની ટિકિટો વેચાઈ ગઈ છે. આશા છે કે ભારત અને ઈંગ્લેન્ડ તેમાં રમશે. ભારત અને પાકિસ્તાનની મેચની ટિકિટો પણ લગભગ વેચાઈ ગઈ છે. લંડન ઓલિમ્પિક 2012 પછી ઈંગ્લેન્ડમાં સૌથી મોટી રમતોત્સવમાં 72 કોમનવેલ્થ દેશોના 5000થી વધુ ખેલાડીઓ ભાગ લઈ રહ્યા છે.