Global Earthquake Massive Updates: સમગ્ર વિશ્વમાં હાલ કુદરતી આફતનો એક અત્યંત ભયાનક માહોલ જોવા મળી રહ્યો છે. દક્ષિણ અમેરિકાના વેનેઝુએલામાં માત્ર 39 સેકન્ડની અંદર આવેલા 2 શક્તિશાળી ભૂકંપને કારણે ભારે હાહાકાર મચી ગયો છે. સ્થિતિ એટલી ગંભીર છે કે દેશમાં તાત્કાલિક અસરથી રાષ્ટ્રીય આટોકટી (National Emergency) જાહેર કરી દેવામાં આવી છે. આ હોનારતમાં અત્યાર સુધીમાં 32 લોકોના સત્તાવાર મોત નીપજ્યા છે, જ્યારે 700 થી વધુ લોકો ગંભીર રીતે ઘાયલ હોવાના અહેવાલ છે. વેનેઝુએલા ઉપરાંત અમેરિકાનું ઉત્તરી કેલિફોર્નિયા, જાપાન અને ભારતના જમ્મુ-કાશ્મીરમાં પણ ભૂકંપના જોરદાર આંચકા અનુભવાયા છે.
રાષ્ટ્રપતિ ડેલ્સી રોડ્રિગ્ઝે કટોકટી જાહેર કરી
વેનેઝુએલાની રાજધાની કારાકાસ અને મોરોન શહેરમાં આવેલા આ પ્રચંડ ભૂકંપના(Earthquake) કારણે ભારે વિનાશ સર્જાયો છે:
કાર્યવાહક રાષ્ટ્રપતિ ડેલ્સી રોડ્રિગ્ઝે રાષ્ટ્રજોગ સંબોધનમાં સમગ્ર દેશમાં ઇમરજન્સી જાહેર કરી છે. તેમણે તમામ ડોક્ટરો અને નર્સોને તાત્કાલિક હોસ્પિટલ પહોંચીને ઘાયલોની સારવાર શરૂ કરવા અપીલ કરી છે.
ભૂકંપના(Earthquake) કારણે કારાકાસ નજીક આવેલું માઇકેટિયા આંતરરાષ્ટ્રીય એરપોર્ટ પણ તૂટી ગયું છે, જેથી તેને આગામી સૂચના સુધી બંધ કરી દેવાયું છે. અનેક બહુમાળી ઇમારતો પત્તાના મહેલની જેમ ધરાશાયી થઈ ગઈ છે. તટીય વિસ્તારોમાં સુનામીનું એલર્ટ પણ આપવામાં આવ્યું છે. કારાકાસની બરુતા નગરપાલિકાના લાસ મિનાસ વિસ્તારમાં કાટમાળમાંથી મેયર ડાર્વિનની આગેવાની હેઠળ રેસ્ક્યૂ ઓપરેશન ચલાવી 3 મૃતદેહો બહાર કઢાયા હતા.
મોદી અને ટ્રમ્પે જાહેર કરી મોટી મદદ
આ મુશ્કેલ સમયમાં વિશ્વના બે શક્તિશાળી નેતાઓએ વેનેઝુએલાની વહારે આવવાની જાહેરાત કરી છે:
પીએમ મોદીએ સોશિયલ મીડિયા ‘X’ પર આ દુર્ઘટના પર ઊંડું દુઃખ વ્યક્ત કરતા લખ્યું કે, ભારત આ કપરા સમયમાં વેનેઝુએલાના નાગરિકોની સાથે ઊભું છે અને જરૂર પડ્યે તમામ શક્ય સહાય પૂરી પાડવા તૈયાર છે.
અમેરિકી પ્રમુખ ટ્રમ્પે યુએસ સહાયની જાહેરાત કરતા લખ્યું કે, “યુનાઇટેડ સ્ટેટ્સ મદદ કરવા સંપૂર્ણ સક્ષમ છે. મેં મારી તમામ સરકારી એજન્સીઓને તાત્કાલિક તૈયારી કરવા નિર્દેશ આપ્યો છે. અમે અમારા નવા અને સારા મિત્રોની સાથે ઊભા રહીશું.”
વેનેઝુએલાની 8 દેશોએ વધાર્યો સહયોગનો હાથ
ભૂકંપ બાદ દક્ષિણ અમેરિકાના અનેક દેશોએ વેનેઝુએલાને સહાયનો હાથ લંબાવ્યો છે. બ્રાઝિલ, આર્જેન્ટિના, પેરુ, મેક્સિકો, કોલંબિયા, બોલિવિયા, કોસ્ટા રિકા અને અલ સાલ્વાડોર સહિત કુલ 8 દેશોએ રાહત અને બચાવ કામગીરીમાં જરૂરી સહયોગ આપવાની તૈયારી દર્શાવી છે.
આ દેશોની સરકારોએ ભૂકંપથી(Earthquake) અસરગ્રસ્ત લોકો અને મૃતકોના પરિવારો પ્રત્યે શોક અને સંવેદના વ્યક્ત કરી છે. સાથે જ જરૂરિયાત મુજબ રાહત સામગ્રી, માનવતાવાદી સહાય અને બચાવ ટીમો મોકલવા માટે પણ પોતાની તૈયારી જાહેર કરી છે.
અમેરિકા અને જાપાનમાં પણ પ્રચંડ Earthquake ના આંચકા
વેનેઝુએલાની સાથે જ અમેરિકાના ઉત્તરી કેલિફોર્નિયામાં પણ ભીષણ ભૂકંપ આવ્યો હતો, જેની તીવ્રતા રિક્ટર સ્કેલ પર 5.6 માપવામાં આવી હતી. આંચકાના કારણે સેંકડો ઘરોમાં પાવર કટ (વીજળી ગુલ) થઈ ગયો હતો.
જાપાનના ઉત્તર-પૂર્વી તોહોકુ વિસ્તારમાં 6.9 ની અત્યંત ખતરનાક તીવ્રતાનો ભૂકંપ નોંધાયો હતો, જેનાથી ઇવાટે અને આઓમોરી પ્રાંતના દરિયાકાંઠાના વિસ્તારો હચમચી ગયા હતા અને બુલેટ ટ્રેનો રોકવી પડી હતી.
ભારતના જમ્મુ-કાશ્મીરમાં પુલવામા નજીક કેન્દ્રબિંદુ
વિશ્વના આ દેશો ઉપરાંત ભારતના જમ્મુ-કાશ્મીરમાં પણ વહેલી સવારે ધરતી ધ્રુજી હતી. રિક્ટર સ્કેલ પર તેની તીવ્રતા 3.5 માપવામાં આવી હતી. હવામાન વિભાગના જણાવ્યા અનુસાર, આ ભૂકંપનું કેન્દ્રબિંદુ પુલવામા ક્ષેત્ર નજીક 33..913° ઉત્તર અક્ષાંશ અને 75.095° પૂર્વ રેખાંશ પર જમીનની અંદર હતું, જેના કારણે લોકો ઘરની બહાર દોડી આવ્યા હતા.
શું પૃથ્વી કોઈ મોટા વિનાશનો સંકેત આપી રહી છે?
એક જ દિવસમાં પૃથ્વીના અલગ-અલગ છેડે આવેલા આ મોટા ભૂકંપના(Earthquake) કારણે લોકોમાં ભારે ચિંતા છે, પરંતુ વૈજ્ઞાનિકોનું કહેવું છે કે દુનિયાભરમાં દરરોજ આવા હજારો નાના-મોટા ભૂકંપ આવતા હોય છે. કોઈ મોટા વૈશ્વિક ખતરા અંગે હાલમાં કોઈ વૈજ્ઞાનિક પુરાવા નથી. સ્થાનિક એજન્સીઓ હાલ તમામ પ્રભાવિત વિસ્તારોમાં આફ્ટરશોક્સ પર કડક નજર રાખી રહી છે.
