Gujarat Budget 2026 પર કોંગ્રેસની પ્રતિક્રિયા

બજેટ રજૂ કર્યા બાદ નાણામંત્રીએ પત્રકાર પરિષદમાં માહિતી આપી કે રાજ્ય સરકારે 4,08,053 કરોડ રૂપિયાનું બજેટ મૂક્યું છે, જેમાં લગભગ 8 ટકા વધારો નોંધાયો છે. તેમણે જણાવ્યું કે રાજ્યમાં જીએસટી કરદાતાઓની સંખ્યા વધીને 13.69 લાખ થઈ છે. વર્ષ 2026-27 માટે અંદાજે 1184 કરોડ રૂપિયાનું સરપ્લસ રહેવાની શક્યતા છે.

ઇલેક્ટ્રિક વાહનોને પ્રોત્સાહન આપવા માટે 5 ટકા સુધી રિબેટ આપવાની જાહેરાત કરવામાં આવી છે, જેના કારણે અંદાજે 210 કરોડ રૂપિયાની રાહત નાગરિકોને મળશે. નાણામંત્રીએ કહ્યું કે ગુજરાતનું દેવું નિયંત્રિત મર્યાદામાં છે અને કુલ દેવું 14.65 ટકા છે, જે ફિસ્કલ લિમિટમાં આવે છે. રાજ્યનું મોટાભાગનું દેવું 5.5 ટકા વ્યાજ દરે લેવાયેલું હોવાથી તે સસ્તુ ગણાય છે.

તેમણે વધુમાં કહ્યું કે ગુજરાતનો રાષ્ટ્રીય જીડીપીમાં મહત્વપૂર્ણ ફાળો છે અને માથાદીઠ આવકમાં નોંધપાત્ર વધારો થયો છે. વર્ષ 2021-22માં માથાદીઠ આવક 2.31 લાખ રૂપિયા હતી, જે 2023-24માં વધીને લગભગ 3 લાખ રૂપિયા થઈ છે.

Gujarat Budget 2026: કોંગ્રેસની પ્રતિક્રિયા

બજેટ અંગે કોંગ્રેસના પ્રદેશ પ્રમુખ અમિત ચાવડાએ સરકાર પર આક્ષેપ કર્યો કે લોકોની અપેક્ષાઓ મુજબ બજેટ રજૂ થયું નથી. તેમણે જણાવ્યું કે બજેટ વર્તમાન પરિસ્થિતિની વાસ્તવિકતા સાથે બંધબેસતું નથી અને માત્ર જાહેરાતો પૂરતું છે. જોકે સરકાર તરફથી યુવાનો માટે 3 હજાર જનરક્ષક ભરતી તથા મહેસૂલી કચેરીઓમાં 1546 નવી જગ્યાઓ ઊભી કરવાની જાહેરાત કરવામાં આવી છે.