Ahmedabad News : ભારતીય જળસીમાનો ઉપયોગ કરીને આશરે ₹380 કરોડના હેરોઇનનો જથ્થો ભારતમાં ઘુસાડવાનો પ્રયાસ કરનાર 6 પાકિસ્તાની(Pakistanis) નાગરિકોને કોર્ટ દ્વારા 20 વર્ષની સખત કેદની સજા ફટકારવામાં આવી છે. સાથે જ દરેક આરોપીને ₹2 લાખનો દંડ પણ ફટકારાયો છે.
ગુનાની વિગતો
આ બનાવ અંગે 21 ડિસેમ્બર 2021ના રોજ કેસ નોંધાયો હતો. આતંકવાદ વિરોધી દળ (ATS) ગુજરાતને વિશ્વસનીય સૂત્રો પાસેથી માહિતી મળી હતી કે કરાંચી બંદરેથી “અલ હુસૈની” નામની બોટમાં હેરોઇનનો જથ્થો લઈ જખૌ નજીક દરિયામાં ડિલિવરી થવાની છે.
સંયુક્ત ઓપરેશન
ATS ગુજરાત અને કોસ્ટગાર્ડની ટીમે સંયુક્ત રીતે દરિયામાં વોચ ગોઠવી હતી. 20 ડિસેમ્બર 2021ના રોજ વહેલી સવારે શંકાસ્પદ બોટને રોકી તપાસ કરતાં તેમાં 6 પાકિસ્તાની નાગરિકો (Pakistanis) મળી આવ્યા હતા.
જપ્તી
બોટમાંથી 5 થેલામાં કુલ 76.936 કિલોગ્રામ હેરોઇન મળી આવ્યું, જેની કિંમત આશરે ₹384.68 કરોડ ગણવામાં આવી. આ તમામ આરોપીઓ કરાંચી (પાકિસ્તાન)ના રહેવાસી હોવાનું સામે આવ્યું.
કાયદાકીય કાર્યવાહી
આ કેસમાં NDPS એક્ટ હેઠળ ગુનો દાખલ કરી તપાસ પૂર્ણ થયા બાદ ચાર્જશીટ દાખલ કરવામાં આવી હતી. પ્રોસિક્યુશન તરફથી 203 દસ્તાવેજી પુરાવા અને 13 સાક્ષીઓ રજૂ કરવામાં આવ્યા.
કોર્ટનો ચુકાદો
ભુજની સ્પેશિયલ NDPS કોર્ટએ તમામ પુરાવાનો વિચાર કરીને આરોપીઓને દોષિત ઠેરવ્યા. કોર્ટએ નોંધ્યું કે નશીલા પદાર્થોનો વ્યાપ દેશની આંતરિક સુરક્ષા માટે ગંભીર ખતરો છે અને યુવાનોને નશાની લતમાં ધકેલવાનો પ્રયાસ અત્યંત ગંભીર ગુનો છે.
સજા
કોર્ટ દ્વારા તમામ 6 આરોપીઓને NDPS એક્ટની કલમ 8(C), 22(C), 25 અને 29 હેઠળ 20 વર્ષની સખત કેદ અને ₹2 લાખ દંડની સજા ફટકારવામાં આવી.
