Sports News: ભારતના સ્ટાર ફાસ્ટ બોલર જસપ્રીત બુમરાહ (Jasprit Bumrah) શ્રીલંકા સામે 15 ઓગસ્ટથી શરૂ થનારી બે ટેસ્ટ મેચોની સિરીઝમાંથી બહાર રહે તેવી શક્યતા વ્યક્ત કરવામાં આવી રહી છે. ડાબા ઘૂંટણની ઈજામાંથી તેઓ હજુ સંપૂર્ણ રીતે સાજા થયા નથી. ભારતીય ક્રિકેટ ટીમ માટે આ મોટો ફટકો માનવામાં આવી રહ્યો છે, કારણ કે ટીમ મેનેજમેન્ટ તેમની ફિટનેસ અંગે કોઈ જોખમ લેવા માંગતું નથી. જો બુમરાહ ઉપલબ્ધ નહીં રહે તો તેમની જગ્યાએ આકિબ નબીને તક મળવાની શક્યતા છે.

Jasprit Bumrah ઈજાને કારણે ટેસ્ટ રમવા પર સસ્પેન્સ

જસપ્રીત બુમરાહને 16 જુલાઈએ ઈંગ્લેન્ડ સામેની વનડે મેચ દરમિયાન ફિલ્ડિંગ કરતી વખતે ડાબા ઘૂંટણમાં ઈજા થઈ હતી. ઈજાને કારણે ઘૂંટણમાં સોજો આવી ગયો હતો અને તેઓ સિરીઝની નિર્ણાયક વનડેમાં પણ રમી શક્યા નહોતા. તાજેતરના અહેવાલો અનુસાર, બુમરાહે હજુ સુધી સંપૂર્ણ બોલિંગ શરૂ કરી નથી. બેંગલુરુ સ્થિત BCCIના સેન્ટર ઑફ એક્સેલન્સમાં તેમની ફિટનેસ પર સતત નજર રાખવામાં આવી રહી છે. મેડિકલ ટીમનું માનવું છે કે ઉતાવળમાં મેદાન પર પરત ફરવાથી ઈજા વધુ ગંભીર બની શકે છે.

ટીમમાં પસંદગી થઈ હતી, પરંતુ ફિટનેસ પર અંતિમ નિર્ણય આધારિત

ભારતીય ટેસ્ટ ટીમની જાહેરાત સમયે બુમરાહનું નામ સામેલ કરવામાં આવ્યું હતું, પરંતુ તેમની પસંદગી સંપૂર્ણ ફિટનેસ ક્લિયરન્સ પર નિર્ભર હોવાનું જણાવાયું હતું. હવે જો તેઓ સમયસર ફિટ નહીં થાય તો મુખ્ય પસંદગી સમિતિ તેમના સ્થાને અન્ય ખેલાડીને તક આપી શકે છે. ટીમ મેનેજમેન્ટનો મુખ્ય ઉદ્દેશ બુમરાહને લાંબા ગાળે સંપૂર્ણ ફિટ રાખવાનો છે, ખાસ કરીને મહત્વપૂર્ણ આંતરરાષ્ટ્રીય ટૂર્નામેન્ટને ધ્યાનમાં રાખીને.

આકિબ નબી બની શકે સૌથી મજબૂત દાવેદાર

બુમરાહની ગેરહાજરીમાં જમ્મુ-કાશ્મીરના સીમ બોલિંગ ઓલરાઉન્ડર આકિબ નબી (Aaqib Nabi)સૌથી મજબૂત વિકલ્પ તરીકે સામે આવ્યા છે. તેમણે આ વર્ષની રણજી ટ્રોફીમાં જમ્મુ-કાશ્મીર માટે શાનદાર પ્રદર્શન કરતાં 60 વિકેટ ઝડપી હતી. તેમના સતત સારા પ્રદર્શનને કારણે પસંદગીકારો તેમની તરફ ગંભીરતાથી વિચારણા કરી રહ્યા છે. જો બુમરાહ બહાર રહેશે તો આકિબ નબીને ભારતીય ટેસ્ટ ટીમમાં સ્થાન મળવાની સંભાવના વધી શકે છે.

15 ઓગસ્ટથી શરૂ થશે ટેસ્ટ સિરીઝ

ભારત અને શ્રીલંકા (SriLanka)વચ્ચેની પ્રથમ ટેસ્ટ મેચ 15 ઓગસ્ટથી ગાલે ઇન્ટરનેશનલ સ્ટેડિયમમાં રમાશે. બીજી ટેસ્ટ 23થી 27 ઓગસ્ટ દરમિયાન કોલંબોના સિંહાલીઝ સ્પોર્ટ્સ ક્લબ ખાતે યોજાશે. ભારતીય ટીમ 4 ઓગસ્ટે શ્રીલંકા પહોંચશે અને 7થી 9 ઓગસ્ટ દરમિયાન ત્રણ દિવસની પ્રેક્ટિસ મેચ રમશે. બુમરાહની ઉપલબ્ધિ અંગે અંતિમ નિર્ણય મેડિકલ ટીમના અહેવાલ બાદ લેવામાં આવશે.

આ પણ વાંચો:રામ ચરણે જસપ્રીત બુમરાહની માંગી માફી, ક્રિકેટરને ફૂટબોલર સમજી કરી મોટી ભૂલ

આ પણ વાંચો:ક્રિકેટ ચાહકો માટે રાહતના સમાચાર : જસપ્રીત બુમરાહનું પુનરાગમન કન્ફર્મ, ઇંગ્લેન્ડ સામેની ચોથી ટેસ્ટમાં ટીમનો ભાગ બનશે

આ પણ વાંચો:શુભમન ગિલ કે જસપ્રીત બુમરાહ, કોણ ભારતનો આગામી ટેસ્ટ કેપ્ટન હોવો જોઈએ, વસીમ જાફરે કહ્યું